ប្រធានាធិបតីអាមេរិច ដូណាល់ ត្រាំ បាននិយាយថា នឹងរក្សាទាហ៊ានមួយចំនួននៅក្នុងប្រទេសស៊ីរី បើទោះបីជាលោកប្រកាសឲ្យមានការដកទ័ពចេញក្តី។
លោកថ្លែងថា ទាហ៊ានអាមេរិចមួយចំនួន នឹងនៅរក្សាតំបន់ប្រេង ខណៈមួយចំនួនទៀត នឹងបោះទីតាំងនៅក្បែរប្រទេសអ៊ីស្រាអ៊ែល និងហ៊្សកដានី។
កាលពី ២សប្តាហ៍មុន លោបានប្រកាសដកទ័ពចេញពីព្រំដែនតួកគី និងស៊ីរី ហើយការសម្រេចចិត្តនោះ បានធ្វើឲ្យមានការរិះគន់យ៉ាងខ្លាំងពីសំណាក់អ្នកគាំទ្ររូបលោក។
ភ្លាមៗក្រោយពេលប្រកាសដកទ័ពចេញ ប្រទេសតួកគីបានធ្វើការវាយប្រហារប្រឆាំងនឹងក្រុមឃឺត (Kurd) ដែលជាអតីតសម្ព័ន្ធមិត្តរបស់អាមេរិច។ ក្រុមនេះបានជួយអាមេរិចប្រយុទ្ធប្រឆាំងនឹងក្រុមរដ្ឋអ៊ីស្លាម (IS) ប៉ុន្តែតួកគីចាត់ទុកក្រុមនេះជាក្រុមភេរវករ។
លោកត្រាំ ក៏បានថ្លែងការពារការសម្រេចចិត្តរបស់ខ្លួន ក្នុងការដកទ័ពចេញដែរ ក្រោយពេលមានការចោទប្រកាន់ថា លោកបានក្បត់នឹងកងកម្លាំងដែលដឹកនាំដោយក្រុមឃឺត ដែលបានដើរតួនាទីយ៉ាងសមខាន់ក្នុងការប្រយុទ្ធប្រឆាំងនឹងក្រុម IS។
សូមបញ្ជាក់ថា ក្រោយពេលប្រកាសដកទ័ពចេញភ្លាម ប្រទេសតួកគីបានធ្វើប្រតិបត្តិការយោធាប្រឆាំងនឹងក្រុមឃឺត ដើម្បីបណ្តេញក្រុមនេះចេញពីតំបន់ព្រំដែន នៅភាគខាងជើងប្រទេសស៊ីរី និងដើម្បីបង្កើតតំបន់សុវត្ថិភាពសម្រាប់ជាទីលំនៅ របស់ជនភៀសខ្លួនស៊ីរីរហូតដល់ ២លាននាក់ ដែលបច្ចុប្បន្នកំពុងរស់នៅក្នុងប្រទេសតួកគី៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC