ព្រះមហាក្សត្រថៃ Vajiralongkorn បានដកតំណែង និងតួនាទីទាំងអស់ពីអ្នកម្នាងម្នាក់ដោយសារតែការប្រព្រឹត្តិមិនត្រឹមត្រូវ និងមិនស្មោះត្រង់ចំពោះព្រះរាជា។
បើយោតាមសេចក្តីប្រកាសផ្លូវការបានឲ្យដឹងថា អ្នកម្នាង Sineenat Wongvajirapakdi មានមហិច្ឆតាខ្លាំង និងព្យាយាមលើកដង្កើនខ្លួនឲ្យស្មើនឹងព្រះមហាក្សត្រីយានី។ អាកប្បកិរិយានោះ ត្រូវបានគេចាត់ទុកថាជាការមិនគោរព។
អ្នកម្នាង Sineenat Wongvajirapakdi ត្រូវបានតែងតាំងកាលពីខែកក្កដា តែប្រមាណ ២ខែក្រោយពេលព្រះមហាក្សត្រថៃ បានរៀបអភិសេកជាមួយនឹងព្រះមហាក្សត្រីយានីព្រះនាម សុធីតា (Suthida) ដែលជាប្រពន្ធទី ៤របស់ព្រះអង្គ។
Sineenat Wongvajirapakdi ដែលជាឧត្តមសេនីយ៍ និងជាអ្នកបើកយន្តហោះកំពុងស្ថិតក្នុងការហ្វឹកហាត់ ជាគិលានុបដ្ឋាយិកា និងជាអង្គរក្សផងដែរនោះ បានក្លាយជាមនុស្សដំបូងដែលត្រូវបានទទួលបានតំណែងជាអ្នកម្នាង (Royal Noble Consort) ក្នុងរយៈពេលជិតមួយសតវត្សរ៍មកនេះ។
នៅក្នុងព្រះរាជក្រឹត្យកាលពីថ្ងៃចន្ទ បានឲ្យដឹងថា អ្នកម្នាង Sineenat Wongvajirapakdi បានបង្ហាញពីភាពរឹងរូស និងការដាក់សម្ពាធគ្រប់បែបយ៉ាង ដើម្បីរារាំងកុំឲ្យមានការតែងតាំងព្រះមហាក្សត្រីយានី Suthida មុនពេលពិធីឡើងសោយរាជ្យកាលពីខែឧសភា។
សេចក្តីប្រកាសបញ្ជាក់ថា “ព្រះមហាក្សត្រផ្តល់តំណែងដល់នាង ដោយសង្ឃឹមថានឹងមានការបន្ធូរបន្ថយសម្ពាធ និងបញ្ហាដែលប៉ះពាល់ដល់ព្រះរាជា”។
សេចក្តីប្រកាសក៏បានចោទប្រកាន់អ្នកម្នាងនោះថា មានការប្រឆាំងនឹងព្រះមហាក្សត្រ និងព្រះមហាក្សត្រីយានី និងការរំលោភអំណាច ដោយធ្វើការបញ្ជាជំនួសព្រះមហាក្សត្រ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
