រាជធានីភ្នំពេញ ៖ សម្តេចតេជោ ហ៊ុន សែន បានថ្លែងថា ក្រុមហ៊ុនស៊ិនទ្រីតែមួយ មិនអាចប្រមូលសំរាមនៅភ្នំពេញ មានប្រសិទ្ធភាពនោះឡើយ។ សម្តេចតេជោ ហ៊ុន សែន បានថ្លែងថា ត្រូវមានក្រុមហ៊ុនយ៉ាងតិច៣ ប្រតិបត្តិការក្នុងការប្រមូលសំរាមនៅរាជធានីភ្នំពេញ។
សម្តេចតេជោបានមានប្រសាសន៍ នាឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យបៀលប្រាយ ដែលប្រារព្ធឡើងនៅមជ្ឈមណ្ឌលកោះពេជ្រ រាជធានីភ្នំពេញ នៅព្រឹកថ្ងៃទី២២ ខែតុលា ថា ដកហូតសិទ្ធិប្រមូលសំរាមរបស់ក្រុមហ៊ុនស៊ិនទ្រី ហើយដាក់ឱ្យដេញថ្លៃជាថ្មី តែត្រូវមានក្រុមហ៊ុនយ៉ាងតិច៣។
សម្តេចតេជោ ហ៊ុន សែន បានថ្លែងថា បើប្រជាពលរដ្ឋហូបហើយមិនបោះពាសវាលពាសកាល មិនធ្វើឱ្យសំរាមរាយប៉ាយនោះឡើយ។
សម្តេចតេជោ ហ៊ុន សែន បានថ្លែងថា ប្រជាពលរដ្ឋត្រូវចេះការពាររាជធានីភ្នំពេញរបស់ខ្លួន ដោយទុកដាក់សំរាមឱ្យបានត្រឹមត្រូវ។
សម្តេចតេជោ ហ៊ុន សែន បញ្ជាឱ្យសិក្សាបង្កើតរោងចក្រអគ្គិសនីដោយបំប្លែងពីសំរាម បើទោះថ្លៃបន្តិចក៏រដ្ឋចេញខាតដែរ។
ក្នុងន័យគ្រប់គ្រង និងប្រមូលសំរាមឲ្យមានប្រសិទ្ធភាព សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា ដើម្បីជួយសម្រួលកុំឲ្យក្រុមហ៊ុនសំរាម ស៊ីនទ្រី ត្រូវខាតបង់នោះ រដ្ឋនឹងទិញយកសម្ភារៈ និងបុគ្គលិករបស់ក្រុមហ៊ុនសំរាមស៊ីនទ្រីទាំងអស់ជារបស់រដ្ឋ បន្ទាប់មកនឹងមានការរៀបចំដេញថ្លៃឲ្យមានក្រុមហ៊ុនសំរាមយ៉ាងហោចណាស់៣ ឬ ៤ ក្រុមហ៊ុនសម្រាប់ការគ្រប់គ្រង និងប្រមូលសំរាមនៅក្រុងភ្នំពេញ ។ កាលពីពេលចុះហត្ថលេខា ជាមួយក្រុមហ៊ុនសំរាមស៊ីនទ្រីនោះ គឺសំរាមនៅរាជធានីភ្នំពេញ គឺមានក្នុងរង្វង់តែ ៣០០ ទៅ ៥០០ តោនក្នុងមួយថ្ងៃ ដែលគ្រានោះក្រុងភ្នំពេញ គឺមានទំហំប្រហែល ៣០០ គីឡូម៉ែត្រការ៉េ ។
តែបច្ចុប្បន្ននេះ ក្រុងភ្នំពេញមានវិសាលភាពដល់ទៅជាង ៦០០ គីឡូម៉ែត្រការ៉េ ដែលផលិតសំរាមជាង ៣០០០តោនក្នុងមួយថ្ងៃ ដូច្នេះហើយឧទាហរណ៍បើសិនទុកឲ្យស៊ីនទ្រីមួយ បើស៊ីនទ្រីមិនកម្រើកដៃនោះ សំរាមគរដូចភ្នំ។
សម្តេចបានបន្តថា ក្រោយពេលរដ្ឋគ្រប់គ្រងក្រុមហ៊ុនសំរាមមួយរយៈ នោះនឹងរៀបចំការដេញថ្លៃ ដោយក្នុងនោះក្រុមហ៊ុនស៊ីនទ្រី ក៏អាចចូលរួមដេញថ្លៃផងដែរ ។
សម្តេចបានបញ្ជាក់ថា លែងឲ្យមានក្រុមហ៊ុនសំរាមតែមួយទៀតហើយ ក្នុងការប្រមូលសំរាមនៅភ្នំពេញ ដូច្នេះនឹងមានការរៀបចំនូវខណ្ឌ ដើម្បីបែងចែកជាតំបន់ ដែលក្នុងមួយតំបន់អនុញ្ញាតឲ្យមានក្រុមហ៊ុនប្រមូលសំរាមតែមួយ ដែលក្នុងនោះក្នុងមួយតំបន់អាចមាន ៤ ខណ្ឌ នៅក្នុងនោះ ប៉ុន្តែមិនឲ្យស៊ីនទ្រីខាតទេ ទិញយកសម្ភារៈ ឡាន និងបន្ទាប់មកបានយើងដាក់ថា ប៉ុន្មានខណ្ឌ ដាក់មួយតំបន់ ចែកក្រុមហ៊ុនមួយ ប្រមូលសំរាម៕ ដោយ៖កូឡាប