ភ្នំពេញ៖ លោកឃួង ស្រេង បានមានប្រសាសន៍ថា ទិវាមនុស្សចាស់អន្តរជាតិថ្ងៃទី១ ខែតុលា ឆ្នាំ២០១៩ ក្រោមប្រធានបទ “គាំទ្រសុខុមាលភាពមនុស្សចាស់ គឺជាកត្តាដ៏សំខាន់ ក្នុងការអនុវត្តប្រព័ន្ធគាំពារសុខុមាលភាពមនុស្សគ្រប់វ័យ ក្នុងសង្គមជាតិនៅកម្ពុជា” ដែលប្រធានបទនេះ បានបង្ហាញឱ្យឃើញអំពីយន្តការគាំទ្រសំដៅធ្វើយ៉ាងណា ឱ្យមានការចូលរួមកាន់តែប្រសើរឡើង ចំពោះការលើកស្ទួយសុខុមាលភាព និងការផ្តល់ភាពកក់ក្តៅបន្ថែមទៀត ជូនមនុស្សចាស់។
រដ្ឋបាលរាជធានីភ្នំពេញ កាលពីរសៀលថ្ងៃចន្ទ ទី២១ ខែតុលា ឆ្នាំ២០១៩ បានធ្វើពិធី អបអរសាទរខួបលើកទី២១ ទិវាមនុស្សចាស់កម្ពុជា និងទិវាមនុស្សចាស់អន្តរជាតិថ្ងៃទី១ ខែតុលា ដែលការប្រារពពីធីនេះឡើង ដើម្បីបង្ហាញអំពីការយកចិត្តទុកដាក់ ក្នុងការគាំពារថែរក្សាផ្តល់តម្លៃ និងលើកទឹកចិត្តចំពោះមនុស្សចាស់ ដែលជាប្រភពនៃបទពិសោធន៍ មិនចេះរីងស្ងួត សម្រាប់មនុស្សវ័យក្មេងជំនាន់បច្ចុប្បន្ន និងតទៅជំនាន់ក្រោយៗទៀត។
លោកស្រីមុំ ចាន់ដានី ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទារាជធានីភ្នំពេញ បានមានប្រសាសន៍ថា មនុស្សចាស់កំណត់ត្រឹមអាយុ៦០ឡើងទៅ។ មនុស្សចាស់ជាឃ្លាំងបទពិសោធន៍ល្អៗសម្រាប់កូនចៅជំនន់ក្រោយ ដោយនៅរាជធានីភ្នំពេញមានមនុស្សចាស់សរុបចំនួន១៤៦៥៩៩នាក់។ លោកស្រីថា រាជធានីភ្នំពេញបានចងក្រងជាសមាគមន៍មនុស្សចាស់ តាំងពីឆ្នាំ២០១០មកម្លេះ ប៉ុន្តែមិនបានគ្រប់សង្កាត់នូវឡើយ។ តែសម្រាប់ឆ្នាំ២០១៩នេះ ក្រោមការសហការជាមួយអាជ្ញាធរមូលដ្ឋាន បានកសាងសមាគមននេះ បានគ្រប់ចំនួនហើយនៅខណ្ឌនីមួយៗ និងបានជួយឧបត្ថមពួកគាត់ ជាបន្តបន្ទាប់ មិនថាសម្ភារៈនិងថវិការទទួលបានភាពកក់ក្តៅមិនឯកកោ។
លោកឃួង ស្រេង អភិបាលរាជធានីភ្នំពេញ បានមានប្រសាសន៍ថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសគណៈកម្មាធិការជាតិកម្ពុជា ជានិច្ចកាល សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តែងបានផ្តល់ក្តីអាណិតស្រឡាញ់យកចិត្តទុកដាក់ ផ្តល់តម្លៃនិងគិតគូរពីសុខទុក្ខ របស់បងប្អូនមន្ត្រីរាជការនិវត្តជនជារៀមច្បង និងមនុស្សចាស់ទាំងអស់ដូចអ្វី ដែលរាជរដ្ឋាភិបាលនិង សង្គមជាតិយើងបានផ្តល់តម្លៃយ៉ាងធំធេង តាមរយៈការកំណត់យកថ្ងៃទី១ ខែតុលា ជាថ្ងៃប្រារព្ធទិវាមនុស្សចាស់កម្ពុជា និងទិវាមនុស្សចាស់អន្តរជាតិជារៀងរាល់ឆ្នាំ។
លោកឃួង ស្រេង បានបញ្ជាក់ផងដែរថា សម្រាប់គោលបំណងនៃការប្រារព្ធទិវានេះ គឺដើម្បីបង្ហាញអំពីការយកចិត្តទុកដាក់ និងការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការគាំពារថែរក្សាផ្តល់តម្លៃ និងលើកទឹកចិត្តចំពោះមនុស្សចាស់ ដែលជាប្រភពនៃបទពិសោធន៍មិនចេះរីងស្ងួត សម្រាប់មនុស្សវ័យក្មេងជំនាន់បច្ចុប្បន្ន និងតទៅជំនាន់ក្រោយៗទៀត។ ការប្រារព្ធទិវានេះ ក៏ជាការរំលឹកដល់គុណូបការៈចំពោះបងៗ ជាមន្ត្រីរាជការនិវត្តជនទាំងអស់ ដែលធ្លាប់បានចូលរួមចំណែកស្តារកសាង និងអភិវឌ្ឍន៍រាជធានីភ្នំពេញ ក្នុងរយៈពេលជាច្រើនឆ្នាំកន្លងមក រហូតសម្រេចបាននូវស្នាដៃ និងសមិទ្ធផលជាច្រើនឥតគណនា។
លោកបន្តថា តាមគោលនយោបាយជាតិ ស្តីពីមនុស្សវ័យចាស់ និងស្ថិតិ របស់ក្រសួងផែនការ បានបង្ហាញឱ្យឃើញថា ចំនួនមនុស្សវ័យចាស់ក្នុងឆ្នាំ២០១៧ មានអត្រាកើនឡើងប្រមាណ៧,២% និងមាននិន្នាការកើនឡើងបន្ថែមទៀត នៅចន្លោះឆ្នាំ២០២០ -២០៣០ ក្នុងអត្រាប្រមាណ៤% ក្នុងមួយឆ្នាំ ខណៈពេលដែលមនុស្សវ័យក្មេង មានអត្រាកើនឡើងត្រឹមតែ១% ក្នុងមួយឆ្នាំ ហើយតាមការព្យាករណ៍ចំនួនមនុស្សវ័យចាស់ នៅកម្ពុជានឹងកើនឡើងដល់ប្រមាណ២លាននាក់ ស្មើនឹង១១% នៃប្រជាជនសរុប១៨លាននាក់ នៅឆ្នាំ២០៣០ ដែលនេះគឺជាសារមួយដ៏មានសារសំខាន់ តម្រូវឱ្យថ្នាក់ដឹកនាំគ្រប់លំដាប់ថ្នាក់ ត្រូវបន្តរួមគ្នាគិតគូរយកចិត្តទុកដាក់អំពីយន្តការ ដើម្បីគាំពារផ្តល់ភាពកក់ក្តៅទាំងផ្លូវកាយ និងផ្លូវចិត្តជូនដល់មនុស្សវ័យចាស់ ចៀសវាងទុកពួកគាត់ ឱ្យនៅឯកា និងគ្មានការផ្តល់តម្លៃណាមួយនោះ៕ដោយ៖កូឡាប