ភ្នំពេញ៖ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា ទទួលបន្ទុកប្រធានប្រតិភូ និងគ្រូបង្វឹកបានដឹកនាំក្រុមកីឡាករ កីឡាការិនីចំនួន១០នាក់ ចេញទៅប្រកួតនៅសាធារណរដ្ឋកូរ៉េ សម្រាប់កម្មវិធីប្រកួត Korea Open និង Pre-Sea Games លើកទី៣០ នៅប្រទេសហ្វីលីពីន ចុងឆ្នាំ២០១៩នេះ។
ថ្លែងទៅកាន់ក្រុមអ្នកសារព័ត៌មាន នៅអាកាសយានដ្ឋានអន្តរជាតិភ្នំពេញ កាលពីយប់ថ្ងៃចន្ទ ទី២១តុលា លោក ណយ ផាណា បញ្ជាក់ថា សម្រាប់ការចូលរួមប្រកួតនៅប្រទេសកូរ៉េខាងត្បូងនេះ គឺមានគោលដៅ ចម្បងៗមួយចំនួន ដូចជាត្រៀមខ្លួន សម្រាប់ចូលរួមប្រកួតប្រជែងមេដាយ នៅក្នុងស៊ីហ្គេម នៅប្រទេសហ្វីលីពីន លើកទី៣០ ដែលគ្រោងនឹងដំណើរការជាផ្លូវការពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ហើយម្យ៉ាង ទៀតសម្រាប់កីឡាករ កីឡាការិនីថ្នាលបានចូលរួមក្នុងការប្រកួតអន្តរជាតិ ដើម្បីទទួលបាននូវបទពិសោធន៍កាន់ តែល្អ នាពេលខាងមុខ ជាពិសេសគឺគោលដៅដំណើរឆ្ពោះទៅធ្វើម្ចាស់ផ្ទះ ស៊ីហ្គេម លើកទី៣២ នាឆ្នាំ២០២៣។ ចំពោះ Korea Open នេះអាចមានកីឡាករ កីឡាការិនីមកពីបណ្តាប្រទេសនានាក្នុងចន្លោះពី១០ទៅ២០ប្រទេស ឬច្រើនជាងនេះ ពីថ្ងៃទី២៣ដល់ថ្ងៃទី២៥ ខែតុលា ហើយសម្រាប់ការចេញដំណើរទៅចូលរួមរបស់ក្រុមកាយ សម្ព័ន្ធកម្ពុជាគឺទទួលបានការជួយឧបត្ថម្ភជាលើកដំបូងពីគណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍ (Sea Games) លើកទី៣២ ឆ្នាំ២០២៣ (CAMSOC) និងទទួលបានការជួយឧបត្ថម្ភជ្រោមជ្រែង លើកទឹកចិត្ត ពីលោកថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជា និងអនុប្រធានសហព័ន្ធ លោកឧកញ៉ា សុខ ហុង។
អគ្គលេខាធិការរូបនេះបន្ថែមទៀតថា សម្រាប់រយៈពេល៣ឆ្នាំចុងក្រោយនេះ លើកនេះគឺជាលើកទី១ ដែលបានចូលរួមប្រកួតលក្ខណៈទ្រង់ទ្រាយធំជាក្រុម ហើយស៊ីហ្គេម ឆ្នាំ២០១៩នេះ សហព័ន្ធកីឡាកាយសម្ព័ន្ធ កម្ពុជាក៏បានត្រៀមបេក្ខភាពចំនួន៦នាក់ ចូលរួមប្រកួតប្រជែងផងដែរ។ លោក ណយ ផាណា ចាត់ទុកថា នេះគឺ ជាបេសកកម្មដ៏ល្អ ដើម្បីបង្កើនគុណភាពបច្ចេកទេសផង និងទទួលបាននូវបទពិសោធន៍ឲ្យកាន់តែច្រើន ដោយ ការចូលរួមប្រកួតលក្ខណៈអន្តរជាតិបែបនេះ គឺត្រូវតែចូលរួមឲ្យបាន២ទៅ៣ដង។
គ្រូបង្វឹកកីឡាកាយសម្ព័ន្ធរូបនេះ ក៏បានបន្ថែមឲ្យដឹងនូវប្រភេទកីឡាកាយសម្ព័ន្ធ នៅក្នុងអាស៊ីអាគ្នេយ៍ មានប្រទេសខ្លាំងៗពី៥ទៅ៦ប្រទេសផងដែរ ដែលប្រកួតជម្រុះអូឡាំពិក ហើយប្រភេទកីឡាអូឡាំពិកនានា ដូចជា ប្រភេទកីឡាកាយសម្ព័ន្ធនេះ ក៏មានការលំបាកក្នុងការដណ្តើមមេដាយណាស់។ “ទោះយ៉ាងនេះក្តី បច្ចុប្បន្ន ប្រទេសកម្ពុជា ដែលមានសិទ្ធិសេរីភាព រស់ក្នុងសន្និភាពពេញលេញ ស្ថេរភាពនយោបាយ គឺយើងនឹងអាច ប្រកួតប្រជែងបានដូចគ្នា ប្រសិនបើយើងធ្វើការទៅតាមផែនការរបស់សហព័ន្ធ ក៏ដូចជាផែនការមេរបស់ រាជរដ្ឋាភិបាលកម្ពុជា, ក្រសួងអប់រំ យុវជន និងកីឡា, CAMSOC, NOCC”៕ដោយ៖បញ្ញាស័ក្តិ
