តាកែវ៖ អភិបាលខេត្តតាកែវ លោក អ៊ូច ភា បានធ្វើការជំរុញ ក៏ដូចជាណែនាំទៅដល់សភាពាណិជ្ជកម្មខេត្តតាកែវ ត្រូវមានចក្ខុវិស័យវែងឆ្ងាយ និងផែនការច្បាស់ ពីគម្រោងការកៀរគររកអ្នកវិនិយោគិន មកវិនិយោគនៅក្នុងខេត្តរបស់ខ្លួន ដើម្បីបង្កើតឱកាសការងារដល់បងប្អូនប្រជាពលរដ្ឋក្នុងខេត្ត មានការងារធ្វើកាន់តែច្រើនឡើង ។
ថ្លែងនៅក្នុងឱកាសអនុញ្ញាតដល់សភាពាណិជ្ជកម្មខេត្តតាកែវ ដឹកនាំដោយលោក ជីប ភក្តីភាព ប្រធានសភាពាណិជ្ជកម្មខេត្ត ចូលជួបសម្តែងការគួរសម និងសុំមតិយោបល់ល្អៗពីលោកអភិបាលខេត្ត នាព្រឹកថ្ងៃចន្ទ ទី២១ ខែតុលា ឆ្នាំ២០១៩ លោក អ៊ូច ភា អភិបាលខេត្ត បានមានប្រសាសន៍បន្តថា ការងារដែលសភាពាណិជ្ជកម្ម ចាំបាច់ត្រូវធ្វើ គឺការកៀរគររកអ្នកវិនិយោគិនទាំងក្នុង និងក្រៅប្រទេស មកបណ្តាក់ទុករកស៊ីនៅក្នុងខេត្តរបស់ខ្លួន ដោយធ្វើយ៉ាងណា ត្រូវមានវិធីសាស្រ្តក្នុងការអូសទាញក្រុមអ្នក វិនិយោគឲ្យបាន តាមដែលអាចធ្វើទៅបាន ព្រោះតួនាទីសភាពាណិជ្ជកម្មនេះ សំខាន់ខ្លាំងណាស់ អាចនិយាយបានថាសម្របសម្រួល ការប្រកបអាជីវកម្មក្នុងខេត្ត និងទាក់ទាញអ្នកវិនិយោគក្នុងស្រុក និងនៅក្រៅប្រទេស មកវិនិយោគនៅក្នុងខេត្ត ដើម្បីបង្កើតការងារឲ្យបានច្រើន ជូនបងប្អូនប្រជាពលរដ្ឋបានធ្វើ មានចំណូលសម្រាប់ទ្រទ្រង់ជីវភាព និងជួយកាត់បន្ថយការចំណាកស្រុក របស់ប្រជាពលរដ្ឋផងដែរ។
លោក អ៊ូច ភា បន្ថែមទៀតថា សភាពាណិជ្ជកម្មគឺជាស្ថាប័នតំណាងវិស័យឯកជនក្នុងខេត្តសម្រាប់ជួយដំណោះរការអាជីវកម្ម នៅក្នុងខេត្តនិងជួយទាក់ទាញ ការវិនិយោគ ដើម្បីអភិវឌ្ឍន៍សេដ្ឋកិច្ចខេត្តឲ្យមានការរីកចម្រើន ស្របតាមគោលនយោបាយរបស់រាជរដ្ឋាភិបាលកម្ពុជា ដើម្បីបង្កើតការងារលើកកម្ពស់ សហគ្រាសធុនតូច និងមធ្យម សហគ្រិនភាព ពង្រឹងភាពប្រកួតប្រជែងក្បាលម៉ាស៊ីន និងជំរុញសេដ្ឋកិច្ចក្នុងខេត្ត ឲ្យមានដំណើរការបានឆាប់រហ័សបន្ថែមទៀត។
បើតាមលោក អ៊ូច ភា អភិបាលខេត្តតាកែវ ក៏បានជំរុញទៅដល់សភាពាណិជ្ជកម្មខេត្ត ត្រូវតែចងក្រងទីផ្សារសហគមន៍ របស់បងប្អូនប្រជាពលរដ្ឋ ក្នុងមូលដ្ឋាន ពិសេសទីផ្សារសហគមន៍ពងទាកូន និងបង្កងធម្មជាតិរបស់ខេត្ត ដោយធ្វើយ៉ាងណាត្រូវបង្កើនការ ផលិត និងការលក់របស់បងប្អូនប្រជាពលរដ្ឋ នឹងជួយរកទីផ្សារបន្ថែមទៀត សម្រាប់ពួកគាត់ ព្រោះប្រសិនបើសភាពាណិជ្ជកម្ម ជួយសម្រប សម្រួលច្រើនលើបញ្ហារកទីផ្សារនេះ វានឹងជួយឲ្យបងប្អូនប្រជាពលរដ្ឋ មានប្រាក់ចំណូលគ្រប់គ្រាន់ ហើយជីវភាពនឹងកាន់តែធូរធារថែមទៀត ៕ដោយ៖តាកែវ
