កំពង់ធំ៖ នៅថ្ងៃទី ២២ ខែ តុលា ឆ្នាំ២០១៩ នគរបាលខេត្តកំពង់ធំ បានធ្វើសន្និសីទសារព័ត៌មាន បង្ហាញមុខមេខ្លោងជួញដូរគ្រឿងញៀន ដែលមានលក្ខណៈទ្រង់ទ្រាយធំ ដកហូតបាន ថ្នាំញៀនចំនួន ៤០ កញ្ចប់មានទម្ងន់ ៤០គីឡូក្រាម ។ នេះបើតាមលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ។
លោកស្នងការ បានបន្ថែមថា ក្រោមការដឹកនាំដ៏ខ្ពង់ខ្ពស់របស់ សម្ដេចក្រឡាហោមស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ
លោក នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ លោក សុខ លូ អភិបាលខេត្តកំពង់ធំ លោកបានយកចិត្តទុកដាក់លើកិច្ចការងារគ្រឿងញៀន ជាការងារស្នូលសំខាន់បំផុត ក្នុងខេត្តកំពង់ធំ និងជំរុញ ដល់មន្ត្រីជំនាញទាំងអស់ ឲ្យយកចិត្តទុកដាក់ ចំពោះការងារបង្ការ ទប់ស្កាត់ បង្ក្រាបបទល្មើសគ្រឿងញៀន ក្នុងខេត្តកំពង់ធំ ។ ជាក់ស្តែង នៅថ្ងៃទី ២១ ខែ តុលា ឆ្នាំ២០១៩វេលាម៉ោង ១៤ និង ៣០នាទី ដោយមានការសម្របសម្រួលនីតិវិធីពីលោក ព្រះរាជអាជ្ញាអមសាលាដំបូងខេត្តកំពង់ធំ និងកិច្ចសហការជាមួយកម្លាំងមន្ទីរប្រឆាំងគ្រឿងញៀន កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពង់ធំបានចុះបង្រ្កាបករណីជួញដូរ ១ករណី ឃាត់ខ្លួនជនសង្ស័យបានចំនួន ៤ នាក់ ដកហូតថ្នាំញៀនចំនួន ៤០ កញ្ចប់ មានទម្ងន់ ៤០គីឡូក្រាម នៅចំណុចអាហាដ្ឋាន រស់ សុខុម ផ្លូវជាតិលេខ៦A ភូមិសំណាក ឃុំ កកោះ ស្រុក សន្ទុក ខេត្តកំពង់ធំ ឃាត់ខ្លួនជនសង្ស័យ ៤ នាក់ ប្រុស ៖ ១-ឈ្មោះ សាក់ ស៊ាងសង ភេទ ប្រុស អាយុ ៣២ឆ្នាំ ជនជាតិថៃ រស់នៅ ប្រទេសថៃ ២-ឈ្មោះ សុខ ប៊ុនសិរិឆ័យ ភេទ ប្រុស អាយុ ៤២ ឆ្នាំ ជនជាតិខ្មែរ រស់នៅភូមិប្រកាប ឃុំ រួងជ្រៃ ស្រុក ថ្មគោល ខេត្តបាត់ដំបង ។ ៣-ឈ្មោះ លី តឹក ភេទ ប្រុសអាយុ ៥៣ឆ្នាំ ជនជាតិខ្មែរ រស់នៅភូមិ និមិត្តថ្មី ឃុំ និមិត្ត ក្រុង ប៉ោយប៉ែត ខេត្តបន្ទាយមានជ័យ ។ ៤-ឈ្មោះ គង់ វណ្ណៈ ភេទ ប្រុសអាយុ ៤០ឆ្នាំ ជនជាតិខ្មែរ រស់នៅភូមិ ខ្នាចមាស ឃុំ ខ្នាចមាស ស្រុក បវិល ខេត្តបាត់ដំបង ។
លោកស្នងការនគរបាលខេត្ត “សូមអំពាវនាវ ដល់បងប្អូនប្រជាពលរដ្ឋ គ្រប់ស្រទាប់វណ្ណៈត្រូវឆ្លើយថាទេ ចំពោះគ្រឿងញៀន ជៀសឲ្យឆ្ងាយពីគ្រឿងញៀន គ្រឿងញៀន ជាថ្នាំបំពុលស្មារតី មិនថាមនុស្សតូច ឬធំឡើយ បើមនុស្សយើងត្រូវបានគ្រឿងញៀនគ្រប់គ្រង បានហើយធ្វើឲ្យមនុស្ស បាត់បង់ សតិសម្បជញ្ញៈ លែងស្គាល់ខុស ត្រូវ អំពីល្អ អំពើអាក្រក់ សាច់ញាតិ ឪពុកម្តាយ បងប្អូន មនុស្សជាទីស្រឡាញ់ឡើយ ហើយស្នើដល់បងប្អូនប្រជាពលរដ្ឋ ទូទាំងប្រទេសកម្ពុជា សូមចាត់ទុកការងារប្រយុទ្ធប្រឆាំង បទល្មើសគ្រឿងញៀនជាការងារសម្រាប់យើងគ្រប់ៗគ្នា ដែលទាមទារឲ្យយើងទាំងអស់គ្នាចូលរួមសហការជាមួយសមត្ថកិច្ច បើឃើញមានបទល្មើសគ្រឿងញៀន សូមរាយការណ៍ មកសមត្ថកិច្ចជំនាញ ដើម្បីមានវិធានការបង្ក្រាបបានទាន់ពេលវេលា “។
បន្ទាប់ពីធ្វើសន្និសីទការសែតរួចហើយ ស្នងការដ្ឋាននគរបាលខេត្ត បានកសាងសំណុំរឿង បញ្ជូនជនសង្ស័យទាំង៤នាក់ទៅតុលាការ ដើម្បីបន្តនីតិវិធីច្បាប់៕ដោយ៖កូឡាប
