ខេត្តស្វាយរៀងៈ ដំំំំណាំបន្លែចម្រុះជាច្រើនមុខ ដែលបងប្អូនប្រជាពលរដ្ឋក្នុងខេត្តស្វាយរៀង បានដាំដុះដូចជាត្រសក់ ននោង ត្រឡាច ម្រះ ត្រកួន ផ្ទី និង គ្រឿងជីសព្វមុខក្រៅពីទុកសម្រាប់ផ្គត់ផ្គង់ នៅទីផ្សារក្នុងស្រុក ភោជនីយដ្ឋាន កាស៊ីណូ ត្រូវបាននាំយកផ្គត់ផ្គង់បន្តទៅផ្សារទំនើប អីអន រួមនិងផ្សារទំនើបនានាផ្សេងទៀត ជាង១០ផ្សារនៅរាជធានីភ្នំពេញ តាមរយៈមជ្ឈមណ្ឌលប្រមូលផ្ដុំកសិផលស្វាយរៀង។
លោក សុខ សាំ ជាប្រជាពលរដ្ឋរស់នៅភូមិ តាស្អាង ឃុំ កំពង់ចំឡង ស្រុក ស្វាយជ្រំ ខេត្តស្វាយរៀង ជាកសិករគំរូម្នាក់ បានឱ្យដឹងថាៈ ការដាំដំណាំបន្លែសរីរាង្គ ដែលអាចរកប្រាក់ចំណូល ដើម្បីចិញ្ចឹមជីវភាពគ្រួសារប្រសើរជាងមុខរបរកសិកម្មផ្សេងទៀត។
លោកបានរៀបរាប់ប្រាប់ឲ្យដឹងទៀតថា៖ បន្លែដែលលោកបានដាំមានជាច្រើនមុខដូចជាត្រសក់ ននោង ត្រឡាច ម្រះ ផ្ទី និងគ្រឿងជីសព្វមុខសម្រាប់ ផ្គត់ផ្គង់តាមទីផ្សារនានា នៅក្នុងក្រុងស្វាយរៀង និងមានបញ្ជាទិញសហគមន៍ទៅលក់ឲ្យផ្សារអីអន និងផ្សារទំនើបនានា តាមរយៈមជ្ឈមណ្ឌលប្រមូលផ្ដុំកសិផលស្វាយរៀង និងមានម៉ូយមកទិញដល់ផ្ទះយកទៅលក់ នៅទីផ្សារផងដែរ។
ដោយឡែកបុគ្គលិកដែលបម្រើការងារ នៅក្នុងមជ្ឈមណ្ឌលប្រមូលផ្តុំកសិផលស្វាយរៀង បានឲ្យដឹងថា ក្នុងរយៈពេល ២ ថ្ងៃ លោកស្រីប្រមូលទិញម្ដង ពីប្រជាពលរដ្ឋដែលបានដាំបន្លែគ្មានសារធាតុគីមី គឺប្រើជីធម្មជាតិសុទ្ធសាធ (ជីឡឧស្ម័ន) សម្រាប់យកទៅផ្គត់ផ្គង់នៅផ្សារអីអនភ្នំពេញ។
លោកស្រីបានបន្តថា ការទិញស្តុកបន្លែនេះ ដោយសារលោកស្រីមានសហគមន៍ដាំបន្លែធម្មជាតិស្រស់ៗ ពីបងប្អូនប្រជាពលរដ្ឋនៅក្នុងមូលដ្ឋាន របស់អ្នកស្រី ដែលបានបង្កើតសហគមន៍នៅក្នុងខេត្តស្វាយរៀង ហើយនៅក្នុងការទិញបន្លែពីប្រជាពលរដ្ឋនេះ មានតម្លៃសមរម្យនិងអាចទទួលយកបានទៅតាមមុខទំនិញបន្លែផ្សេងៗ។
បើតាម នុត សាមាន អនុប្រធានក្រុមប្រឹក្សាភិបាលមជ្ឈមណ្ឌលប្រមូលផ្ដុំកសិផលស្វាយរៀង កន្លងមកបានបា្រប់ឲ្យដឹងថា៖ សព្វថ្ងៃប្រជាសហគមន៍ ដែលដាំដុះបន្លែចម្រុះចងក្រងជាសហគមន៍ ជាង៣០០គ្រួសារ ស្មើ៥ក្រុងស្រុកក្នុងខេត្តស្វាយរៀង ហើយរាល់ដំណាំកសិផលដែលពួកគាត់ ដាំគឺប្រើជីឡឧស្ម័នផលិតពីលីមកសត្វ ហើយផលិតបានគឺមានប្រធានតំបន់នីមួយៗតាមការបញ្ជាទិញរបស់ ភោជនីយដ្ឋាន កាសីណូ និងផ្សារទំនើប ក្រៅពីនេះពួកគាត់មានម៉ូយមកទិញ និងយកទៅលក់នៅតាមទីផ្សារនានា ដែលនៅជិតតំបន់របស់ពួកគាត់។
លោកបានបន្តទៀតថា៖ ការបញ្ជាទិញទៅដាក់លក់នៅតាមទីផ្សារទំនើបនានា នៅរាជនីភ្នំពេញនោះ ក្នុងជើងមានបន្លែស្លឹក និងបន្លែផ្លែប្រមាណជាង៥០០គីឡូក្រាម ដែលគេបញ្ជាទិញក្នុងមួយរំលងមួយថ្ងៃ ព្រោះរថយន្តដឹកមិនទាន់។
លោកបានបញ្ជាក់បន្ថែមទៀតថា៖ បន្លែដែលខាងមជ្ឈមណ្ឌលប្រមូលផ្តុំកសិផលស្វាយរៀង ប្រមូលទិញនោះ មានការត្រួតពិនិត្យយ៉ាងច្បាស់លាស់ ពីសំណាក់ប្រធានតំបន់នីមួយៗ នៅតាមតំបន់ខ្លួនយកមកវេចខ្ចប់ តាមស្តង់ដារអនាម័យ មុននិងធ្វើការដឹកជញ្ជូន ទៅកាន់ទីផ្សារទំនើបនិងកាស៊ីណូជាដើម។
ប្រជាកសិករជាអ្នកដាំបន្លែសហគមន៍ បានធ្វើការសំណូមពរ ទៅដល់ក្រសួងមន្ទីរ ដែលមានការពាក់ព័ន្ធ មេត្តាជួយរកទីផ្សារ ដែលផ្គត់ផ្គង់ឲ្យបានច្រើន ហើយសម្រាប់ឲ្យពួកគាត់បន្តការងារលក់ឲ្យបានតម្លៃខ្ពស់បន្តិច ហើយកាត់បន្ថយការដឹកបន្លែ នាំចូលពីប្រទេសក្រៅ កុំឲ្យមានហូរចូលច្រើនពេក ទុកឲ្យកសិផលក្នុងស្រុក ផលិតនិងលក់មានតម្លៃ និងមានការងារធ្វើរកប្រាក់ ដើម្បីផ្គត់ផ្គង់ជីវភាពគ្រួសារផង៕ដោយ៖វ៉ៃកូ
