ខេត្តស្វាយរៀង ៖ លោកនាយឧត្ដមសេនីយ៍ សំរឹទ្ធ ឌី រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនិងលោកម៉ែន វិបុល អភិបាលនៃគណៈអភិបាលខេត្តស្វាយរៀង
នៅរសៀលថ្ងៃអង្គារ៩រោច ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២២ ខែតុលា ឆ្នាំ២០១៩នេះ បានអញ្ជើញសួរសុខទុក្ខ និងត្រួតពិនិត្យសកម្មភាពការងាររបស់កងកម្លាំងនគរបាលការពារព្រំដែនខេត្តស្វាយរៀង ដែលធ្វើឡើងនៅវរៈការពារព្រំដែនលេខ៦០៩ ក្រុងបាវិត។
អញ្ជើញចូលរួមក្នុងកិច្ចប្រជុំនេះមានលោកនាយឧត្ដមសេនីយ៍ ឧត្ដមសេនីយ៍អនុរដ្ឋលេខាធិការ អគ្គស្នងការរងនគរបាលជាតិ អគ្គនាយករង អគ្គលេខាធិការរង និងគណៈប្រិតិភូក្រសួងមហាផ្ទៃ លោកស្នងការនគរបាលខេត្ត លោកអភិបាលក្រុងបាលក្រុងបាវិត និងកងកម្លាំងវរៈការពារព្រំដែនសរុបវត្តមានចំនួន១៥០នាក់ ។
លោក ម៉ែន វិបុល អភិបាលខេត្តស្វាយរៀងបានមានប្រសាសន៍ថ្លែងនូវការអរគុណយ៉ាងជ្រាលជ្រៅ ចំពោះលោក សំរិទ្ធិ ឌី និងគណៈប្រតិភូអមដំណើរដែលបានចំណាយពេលវេលាដ៏មានតម្លៃ ក្នុងកាយវិការបង្ហាញឲ្យឃើញយ៉ាងច្បាស់នូវការយកចិត្តទុកដាក់របស់រាជរដ្ឋាភិបាល ចំពោះសុខទុក្ខកងកម្លាំងការពារព្រំដែននៃខេត្តស្វាយរៀង ។ សម្ដេចតេជោនាយករដ្ឋមន្ត្រី តែងតែគិតគូពីបុព្វហេតុ ការការពារបូរណភាពទឹកដី និងប្រជាជនរស់ក្រោមដំបូលសុខសន្តិភាព និងការការពារថែរក្សាសន្តិភាពឲ្យបានគង់វង្សដែលជាមូលដ្ឋានគ្រឹះ ក្នុងកិច្ចការអភិវឌ្ឍជាតិឲ្យមាន ការរីកចម្រើនលើគ្រប់វិស័យជាមួយ និងសន្តិសុខសុវត្ថិភាពល្អប្រសើររហូតដល់សព្វថ្ងៃនេះ។
លោកឧត្ដមនាយឧត្ដមសេនីយ៍ សំរឹទ្ធ ឌី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានផ្ដាំផ្ញើដល់កងកម្លាំងនគរបាលការពារព្រំដែនគោកខេត្តស្វាយរៀងទាំងអស់ ត្រូវយកចិត្តទុកដាក់ពង្រឹងវិន័យ និងថែទាំសុខភាព ជាពិសេសត្រូវយកចិត្តទុកដាក់ហ្វឹកហ្វឺន កសាងលេណដ្ឋាន និងការពង្រឹងកម្លាំងនៅតាមបណ្ដាមូលដ្ឋាននីមួយៗឱ្យបានរឹងមាំ និង ទប់ស្កាត់ឱ្យបាននូវក្រុមឧទ្ទាមក្រៅច្បាប់ដឹកនាំដោយទណ្ឌិត សម រង្ស៉ី ដែលមានបំណងចង់ផ្តួលរំលំរាជរដ្ឋាភិបាលស្របច្បាប់ ព្រមទាំងជំរុញដល់កងកម្លាំងប្រដាប់អាវុធទាំងអស់ត្រូវយកចិត្តទុកដាក់ពង្រឹងកិច្ចសហការគ្នាជាមួយសមត្ថកិច្ចពាក់ព័ន្ធ ឱ្យបានជិតស្និទ្ធ ជាពិសេសភាគីវៀតណាម ដើម្បីថែរក្សាការពារសន្តិសុខសណ្តាប់ធ្នាប់ជូនប្រជាពលរដ្ឋ និងការពារបូរណៈភាពទឹកដីរបស់ព្រះរាជាណាចក្រកម្ពុជាយើងឱ្យបានគង់វង្ស។
សូមបញ្ជាក់ថានៅក្នុងឱកាសនោះដែរ លោកនាយឧត្ដមសេនីយ៍ រដ្ឋលេខាធិការក្រសួងមហាផ្ទៃ និងប្រតិភូមអមដំណើរ ក៍បាននាំយកនូវអំណោយ និងថវិការបស់សម្តេចក្រឡាហោម ស ខេង និងអំណោយរបស់រដ្ឋបាលខេត្តស្វាយរៀងសរុបចំនួន ១៤ លានរៀល និង មី២១កេសធំ,ត្រី ខ១កេស ធំ ជូនដល់កងកម្លាំងវរៈសេនាតូចនគរបាលការពារព្រំដែនគោកលេខ៦០៩ និង៦១១ បន្ទាប់មកគណៈប្រតិភូទាំងអស់បានអញ្ជើញចុះពិនិត្យមើលតាមប៉ុស្តិ៍រដ្ឋបាលការពារព្រំដែនផងដែរ៕ ដោយ ៖ វ៉ៃកូ
