សៀមរាប៖ បារមីវត្តប្រាសាទអធ្វារ ពិតជាខ្លាំងពូកែស័ក្តិសិទ្ធិមែនធ្វើឲ្យមន្ត្រីរដ្ឋបាលព្រៃឈើបន្ទាយស្រី ខេត្តសៀមរាប ចាញ់ឫទ្ធី បានប្រគល់ឈើដែលកម្លាំងចម្រុះដកហូត ជូនមកឲ្យវត្តប្រាសាទអធ្វារវិញ ហេីយនៅថ្ងៃទី២២ ខែតុលា។
បើយោងតាមការបង្ហោះសារហ្វេសប៊ុករបស់លោកស្រី ហ៊ុន ស៊ីណាត ប្អូនស្រីសម្តេចតេជោ បានរៀបរាប់ឲ្យដឹងថា៖ “ខ្ញុំសូមថ្លែងអំណរគុណសារជាថ្មីចំពោះឯកឧត្តមអភិបាលខេត្ត និង មន្ត្រីរដ្ឋបាលព្រៃឈើបន្ទាយស្រី ខេត្តសៀមរាប បានប្រគល់ឈើដែលកម្លាំងចម្រុះដកហូតកាលពីថ្ងៃទី ១៥ តុលា ជូនមកឲ្យវត្តប្រាសាទអធ្វារវិញហេីយ។ ជំនួសមុខព្រះសង្ឃនិងពុទ្ធបរិស័ទចំណុះជើងវត្តប្រាសាទអធ្វាសុំជូនពរដល់ឯកឧត្តម ព្រមទាំងកម្លាំងចម្រុះសូមប្រកបដោយពុទ្ធពរទាំង ៥ ប្រការកុំបីឃ្លៀងឃ្លាតឡើយ”។
នៅព្រឹកថ្ងៃទី២២ ខែតុលា ឆ្នាំ២០១៩នេះ លោកទា គឹមសុទ្ធ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានដឹកនាំមន្ត្រីរដ្ឋបាលព្រៃឈើខេត្ត នាំយកឈើដែលបានរឹបអូសកាលពីវេលាម៉ោង១០និង២៦នាទីយប់ថ្ងៃទី១៥ តុលា ឆ្នាំ២០១៩ ទៅប្រគេនជូនព្រះសង្ឃនៃវត្តប្រាសាទអធ្វារវិញ និងបានចូលរួមបច្ច័យចំនួន១លានរៀល ប្រគេនព្រះសង្ឃ ដើម្បីរួមចំណែកកសាងវត្តអធ្វារ។
លោកទា គឹមសុទ្ធ ប្រធានមន្ទីរកសិកម្មខេត្ត បានថ្លែងប្រាប់អ្នកសារព័ត៌មាននៅវត្តអធ្វារ នាថ្ងៃទី២២ ខែតុលាឆ្នាំ២០១៩ នេះថា ការប្រគេនឈើជូនព្រះសង្ឃវិញនេះ គឺធ្វើតាមអនុសាស្ត្រណែនាំរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ និងលោកអភិបាលខេត្តសៀមរាប។
បើតាមលោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានបញ្ជាក់ថា ដោយមានសេក្ដីរាយការណ៍ពីករណីកាប់ដើមឈើនៅវត្តអធ្វា ទើបកម្លាំងនគរបាលប្រឆាំងបទល្មើសសេដ្ឋកិច្ចខេត្ត ចុះសហការជាមួយខណ្ឌរដ្ឋបាលព្រៃឈើសៀមរាប និងអាជ្ញាធរពាក់ព័ន្ធបានចុះត្រួតពិនិត្យជាក់ស្ដែង ។ ក្នុងនោះក្រុមមន្ត្រីបានប្រទះឃើញឈើអាររួច ប្រភេទឈើទាលចំនួន៤៦សន្លឹក និងឈើមូលចំនួន២កំណាត់ ។
លោក ទា គឹមសុទ្ធ បញ្ជាក់ថា ដោយពេលវេលាយប់ជ្រៅ និងទីតាំងកើតហេតុ ក្រៅបរិវេណវត្ត ពុំមានអ្នកទទួលខុសត្រូវ ទើបសមត្ថកិច្ចសម្រេចដឹកជញ្ជូនវត្ថុតាងយកទៅរក្សាទុកជាបណ្តោះអាសន្ននៅផ្នែករដ្ឋបាលព្រៃឈើបន្ទាយស្រី។
លោកបានបញ្ជាក់បន្ថែមថា តាមការស្រាវជ្រាវរបស់មន្ត្រីនៅទីតាំងជាក់ស្តែង ព្រះសង្ឃព្រះនាម ភ្លឿន រ័ត្ន ព្រះគ្រូសូត្រស្តាំ តំណាងព្រះចៅអធិការវត្ត បានមានថេរដីកាថា ការកាប់ដើមឈើទាលមួយដើមនេះ ដោយសារដើមឈើនេះត្រូវរន្ទះបាញ់ចាប់ផ្តើមងាប់ និងមានមែកឈើមួយចំនួនបាក់ធ្លាក់មកដី អាចបង្កគ្រោះថ្នាក់ជាយថាហេតុ។ ប៉ុន្តែគណៈ កម្មការអាចារ្យវត្ត ពុំបានជូនដំណឹងទៅអាជ្ញាធរមូលដ្ឋាន និងសមត្ថកិច្ចពាក់ព័ន្ធនោះទេ។
លោកបានបញ្ជាក់បន្ថែមថា ដោយពិនិត្យឃើញថា វត្តកំពុងសាងសង់កុដិ និងដោយមានការស្នើសុំបិណ្ឌបាតពីព្រះសង្ឃ និងគណៈកម្មការអាចារ្យវត្ត ទើបក្រុមមន្ត្រីរដ្ឋបាលព្រៃឈើបានសម្រេចប្រគេនឈើទៅព្រះសង្ឃវិញនិងបានចូលបច្ច័យសាងសង់កុដិចំនួន១លានរៀលថែមទៀតផង ។
គួរបញ្ជាក់ថា អស្ចារ្សពិតជាគួរអោយកោតសរសើរណាស់ មន្ត្រីចម្រុះនៃរដ្ឋបាលខេត្តសៀមរាប ដឹកនាំដោយ មន្ត្រីនគរបាលសេដ្ឋកិច្ច ខេត្តសៀមរាប បង្ក្រាបបទលើ្មសព្រៃឈើជាក់ស្តែង នៅក្នុងវត្ត ប្រាសាទអធ្វារ ស្ថិតនៅភូមិក្រសាំងរីង សង្កាត់សៀមរាប ក្រុង.ខេត្ត សៀមរាប កាលពីថ្ងៃទី ១៥ តុលា ២០១៩ ម៉ោង២២និង២៦នាទីយប់។
ជាក់ស្តែងក្នុងប្រត្តិបត្តិការនេះ កម្លាំងចម្រុះដកហូតបានឈើអារ ៤៦ សន្លឹក, ឈើមូល ២ ដើម, ជំនៀរឈើមួយចំនួន , រណាយន្ត០១គ្រឿង។ សមត្ថកិច្ចបានអោយដឹងថា វត្ថុតាងទាំងអស់ ត្រូវបញ្ជូនទៅ រដ្ឋបាលព្រៃឈើបន្ទាយស្រី ដើម្បីបន្តរនិតិវិធី ដោយអនុលោម តាមច្បាប់ស្តីពីព្រៃឈើ។ ប៉ុន្តែតាមការបំភ្លឺរបស់លោកគ្រូសូត្រស្តាំថា វត្តពិតជាបានកាប់ឈើមែន តែមិនមែនយកទៅលក់ដូរ ដូចពួកមនុស្សអាក្រក់ និងសារព័ត៌មាន ( ចង់បានលុយ )មួយចំនួន ចុះផ្សាយឡើយ គឺកាប់យកទៅធ្វើកុដ និងរោងបាយក្នុងវត្តប៉ុណ្ណោះ៕ ដោយ៖កូឡាប
