ភ្នំពេញ៖ លោកហេង រតនា អគ្គនាយកស៊ីម៉ាក់ បានសរសេរលើហ្វេសប៊ុកនៅថ្ងៃទី២៣តុលានេះថា រំលឹកខួប “កិច្ចព្រមព្រៀងសន្តិភាពក្រុងប៉ារីសឆ្នាំ១៩៩១ សម្រាប់កម្ពុជា” មានអាយុ២៨ឆ្នាំហើយ ២៣ តុលា ១៩៩១-២៣ តុលា ២០១៩។
លោក បានថ្លែងថា អាយុ២៨ឆ្នាំនេះ បានបង្កើតជាកូន ពូនជាចៅច្រើនណាស់ ហើយកូនខែ្មរបានសម្រេចការបង្រួបបង្រួម បញ្ចប់សង្គ្រាមដោយខ្លួនឯង នៅឆ្នាំ១៩៩៨ នៅពេលបេសកកម្មរបស់UNឆ្នាំ១៩៩២-១៩៩៣ មិនអាចសម្រេចភារកិច្ចសំខាន់បំផុត ក្នុងការបញ្ចប់សង្គ្រាមស៊ីវិលនៅកម្ពុជា បាននោះទេ។ សូមរួមគ្នាថែរក្សាសន្តិភាព ដែលរកបានមកវិញ យ៉ាងលំបាកបំផុតនេះ។
ហ្វេសប៊ុកព្រះបរមរាជវាំង Royal du Cambodge បានចេញសារសាទរខួបអនុស្សាវរីយ៍លើកទី ២៨ឆ្នាំ នៃសន្ធិសញ្ញាសន្តិភាពទីក្រុងប៉ារីស ២៣ តុលា ១៩៩១ – ២៣ តុលា ២០១៩។
ក្រោមព្រះរាជបូជនីយកិច្ច នៃព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី ឯកភាពជាតិខ្មែរ ព្រះបរមរតនកោដ្ឋ ព្រះវររាជបិតាបង្រួបបង្រួមជាតិ ជាទីគោរពសក្ការៈដ៏ខ្ពង់ខ្ពស់បំផុត ដែលបាននាំឲ្យកម្ពុជាទទួលបាននូវសុខសន្តិភាពឡើងវិញ បន្ទាប់ពីសង្រ្គោមដ៏រាំរ៉ៃជាច្រើនទសវត្សរ៍ តាមរយៈការចរចាបង្រួបបង្រួមបញ្ចប់សង្រ្គោម រហូតឈានដល់ការចុះហត្ថលេខាសន្តិភាព ទីក្រុងប៉ារីសពីបណ្តាភាគីធំៗ ។ កូនចៅប្រជានុរាស្រ្តគ្រប់ៗរូបសូមចងចាំជានិច្ច នូវព្រះរាជបូជនីយកិច្ចដ៏ធំធេងនៃ អង្គព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ចំពោះជាតិមាតុភូមិកម្ពុជា សូមថ្វាយមហាព្រះរាជកុសល ថ្វាយព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងសោយសុខក្នុងឋានព្រះបរមសុខកុំបីឃ្លៀងឃ្លាតឡើយ។
សន្ធិសញ្ញាសន្តិភាពទីក្រុងប៉ារីស ត្រូវបានចុះហត្ថលេខានៅថ្ងៃទី២៣ តុលា ១៩៩១ ដែលជាសញ្ញានៃការបញ្ចប់ជាផ្លូវការនៅសង្គ្រាមកម្ពុជា។ កិច្ចព្រមព្រៀងនេះត្រូវបានការដាក់ពង្រាយជាលើកដំបូង បង្អស់ក្រោយពីសម័យកាលនៃសង្គ្រាមត្រជាក់ នូវបេសកកម្មរក្សាសន្តិភាព (អ៊ុនតាក់) ហើយក៏ជាឱកាសជាលើកដំបូង ក្នុងប្រវត្តិសាស្ត្រនៃអង្គការសហប្រជាជាតិ ដែលបានក្លាយខ្លួនជារដ្ឋាភិបាល គ្រប់គ្រងកាន់កាប់មកលើរដ្ឋមួយ។ នៅខណៈនោះគឺ មានរដ្ឋាភិបាលចំនួន ១៩ នាក់ ដែលបានបានចុះហត្ថលេខាមកលើកិច្ចព្រមព្រៀងទាំងនេះ៕ ដោយ៖កូឡាប
