ភ្នំពេញ៖ កីឡាករ កីឡាការិនីកីឡារាំកម្ពុជាបានបញ្ចប់បេសកកម្មដោយជោគជ័យ ដោយបាននាំយកមេដាយ៣គ្រឿង គឺមេដាយមាស១ និងប្រាក់២ ពីព្រឹត្តិការណ៍កីឡារាំអាស៊ី ADSF Asian Adult Open Latin Dance 2019 ព្រមទាំងដណ្តើមបានចំណាត់ថ្នាក់លេខ៤ នៅក្នុងការប្រកួតកីឡារាំពិភពលោក WDSF Taipei Open 2019។
ថ្លែងនៅក្នុងឱកាសវិលត្រឡប់មកដល់មាតុប្រទេសរបស់ជម្រើសជាតិកីឡារាំកម្ពុជា នៅអាកាសយានដ្ឋានអន្តរជាតិភ្នំពេញ នៅថ្ងៃទី២២ ខែតុលា ឆ្នាំ២០១៩ លោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា បញ្ជាក់ថា ជាមួយនឹងលទ្ធផលដ៏គាប់ប្រសើរមួយនេះ លោកស្រីបានដាក់ក្តីសង្ឃឹមយ៉ាងខ្ពស់ផងដែរ ក្នុងការប្រជែងយកមេដាយមាស សម្រាប់ស៊ីហ្គេម លើកទី៣០ នៅប្រទេសហ្វីលីពីន ដែលគ្រោងនឹងដំណើរការពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ដោយប្រភេទកីឡារាំកម្ពុជា នឹងបង្ហាញខ្លួនជាលើកដំបូងនៅក្នុងព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ រៀងរាល់២ឆ្នាំម្តងនេះ។
លោកស្រីបន្ថែមថា កីឡាករ កីឡាការិនីរាំកម្ពុជា បានចូលរួមប្រកួតនៅក្នុងព្រឹត្តិការណ៍កីឡារាំអាស៊ី និងពិភពលោក នៅតៃប៉ិ ដោយមាន១៧ប្រទេសចូលរួមប្រកួតប្រជែងមេដាយ ហើយក្នុងនោះក៏មានកីឡាករ កីឡាការិនីខ្លាំងៗចំណាត់ថ្នាក់លេខ៣កម្រិតពិភពលោកផងដែ។ ក្នុងនាមសហព័ន្ធលោកស្រីបានបង្ហាញនូវមោទនភាព ដែលកីឡាករ កីឡាការិនីជម្រើសជាតិកីឡារាំកម្ពុជា បានខិតខំអស់ពីសមត្ថភាពទាំងពេលហ្វឹកហាត់ និងការប្រកួត ក្នុងព្រឹត្តិការណ៍អន្តរជាតិនេះ ទទួលបានជោគជ័យដ៏ត្រចះត្រចង់យកមកជូនជាតិ។ លោកស្រីបន្ថែមថា នេះគឺជាជោគជ័យថ្មីមួយបន្ថែមទៀត សម្រាប់វិស័យកីឡារាំកម្ពុជា ដោយទទួលបាននូវលទ្ធផលផ្លែផ្កាលើសពីការរំពឹងទុក ដោយជម្រើសជាតិរាំកម្ពុជា មានសមត្ថភាពប្រកួតប្រជែងស្មើមុខស្មើមាត់ ដូចបណ្តាប្រទេសនានាដែលខ្លាំងៗផងដែរ។
សូមបញ្ជាក់ថា កីឡាករ កីឡាការិនី នៃសហព័ន្ធរាំកម្ពុជា លោក ច័ន្ទ វិទ័រ និង កញ្ញា ព្រាប ដានីអែលឡា ដណ្តើមបានមេដាយមាស១វិញ្ញាសា (ចំណាត់ថ្នាក់លេខ១) ក្នងការប្រកួត ADSF Asian Adult Open Latin Dance 2019 និងមេដាយប្រាក់ចំនួន២គ្រឿង (ចំណាត់ថ្នាក់លេខ២) ក្នុងការប្រកួត ADSF Single Dance Cha Cha Cha និង Paso Doble និងចំណាត់ថ្នាក់លេខ៤ ក្នុងការប្រកួតកីឡារាំពិភពលោក WDSF Taipei Open 2019។ កីឡាករ សេង សុគីម និងកីឡាការិនី ម៉ូវ ដានីតា ដណ្តើមបានចំណាត់ថ្នាក់លេខ៤ ក្នុងការប្រកួតកីឡារាំអាស៊ី ADSF Single Dance Jive និងចំណាត់ថ្នាក់លេខ៥ ក្នុងកាប្រកួត Youth U21 &Youth Open Grade C Latin Dance៕ ដោយ ៖ បញ្ញាស័ក្តិ
