តាកែវ ៖ត្រឹមរយៈពេលតែជាង១០ម៉ោង កម្លាំងជំនាញស្នងការដ្ឋាននគរបាលខេត្ត សហការជាមួយកម្លាំងអធិការដ្ឋាននគរបាលស្រុកសំរោង ក្រោមការដឹកនាំបញ្ជាផ្ទាល់របស់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បង្ក្រាបបានជនសង្ស័យក្នុងសំណុំរឿងមនុស្សឃាត ដោយចេតនា នៅស្រុកសំរោងបានដោយជោគជ័យ ។
តាមរបាយការណ៍របស់អធិការដ្ឋាននគរបាលស្រុកសំរោង បានឱ្យដឹងថា នៅវេលាម៉ោង៥ និង៣០នាទីព្រឹក ថ្ងៃទី២២ ខែតុលា ឆ្នាំ២០១៩ មានរណីមនុស្សឃាតមួយកើតឡើង នៅចំណុចមុខខ្លោងទ្វារចូលសាលាវិទ្យាល័យ ប៊ុនរ៉ានី ហ៊ុន សែន ភ្នំជីសូរ ស្ថិតក្នុងភូមិដកពរ ឃុំរវៀង ស្រុកសំរោង ខេត្តតាកែវ បង្កឡើងដោយជនសង្ស័យ ឈ្មោះ សែម ហាក់ឡី ភេទប្រុស អាយុ៣១ឆ្នាំ មុខរបរជាងកាត់សក់ មានទីលំនៅភូមិពោធិ៍ ឃុំស្លា ស្រុកសំរោង ខេត្តតាកែវ បានធ្វើសកម្មភាពយកកាំបិតតាំងតោកាប់ទៅលើជនរងគ្រោះឈ្មោះ ហៀង សុខុន ភេទស្រី អាយុ៣៥ឆ្នាំ មុខរបរលក់ដូរ មានទីលំនៅភូមិ-ឃុំជាមួយគ្នា បណ្ដាលឱ្យស្លាប់ភ្លាមៗនៅកន្លែងកើតហេតុ ខណៈពេលជនរងគ្រោះកំពុងជិះម៉ូតូទៅផ្សារ ក្រោយពេលធ្វើសកម្មភាពរួច ជនសង្ស័យបានជិះម៉ូតូរត់គេចខ្លួនបាត់ ។ ក្រោយពីទទួលបានព័ត៌មានភ្លាម លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានបញ្ជាកម្លាំងជំនាញអធិការដ្ឋាននគរបាលស្រុកសំរោង ដឹកនាំដោយលោកវរសេនីយ៍ឯក មឿង សារុន អធិការនគរបាលស្រុក ចុះប្រតិបត្តិការក្តៅ តាមចាប់ខ្លួនជនសង្ស័យខាងលើឱ្យខាងតែបាន ។ បន្ទាប់ពីធ្វើការស្រាវជ្រាវ និងតាមដានយ៉ាងហ្មត់ចត់ នៅវេលាម៉ោង១៩ និង០០នាទី កម្លាំងជំនាញបានឃាត់ខ្លួនជនសង្ស័យខាងលើ បាននៅចំណុចកំពង់ចម្លងស្វាយជ្រុំ ស្ថិតក្នុងភូមិ៣ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ និងបាននាំខ្លួនជនសង្ស័យមកស្នងការដ្ឋាននគរបាលខេត្តតាកែវ ដើម្បីសាកសួរបន្ត ។ បច្ចុប្បន្ន ជនសង្ស័យកម្លាំងជំនាញកំពុងកសាងសំណុំរឿងបញ្ជូន ទៅសាលាដំបូងខេត្តតាកែវ ចាត់ការតាមផ្លូវច្បាប់ ៕ដោយ៖តាកែវ
