បាត់ដំបង ៖ នៅថ្ងៃទី២២ ខែតុលា ឆ្នាំ២០១៩ សាលាដំបូងខេត្តបាត់ដំបង ចេញដីកាបង្គាប់ឲ្យឃុំខ្លួនសមាជិកក្រុមឧទ្ទាមម្នាក់ទៀត ដែលពាក់ព័ន្ធនឹងរដ្ឋប្រហារខុសច្បាប់ ដែលរៀបចំដោយទណ្ឌិត សម រង្ស៊ី ដើម្បីផ្តួលរំលំរាជរដ្ឋាភិបាល។
បើតាមសេចក្តីជូនដំណឹងរបស់សាលាដំបូងខេត្តបាត់ដំបង បានបញ្ជាក់ថា ជនត្រូវចោទមានឈ្មោះ ស៊ឹម ឡៅ ភេទប្រុស អាយុ៣៩ឆ្នាំ ត្រូវបានតុលាការចោទប្រកាន់ពីបទ រួមគំនិតក្បត់ តាមមាត្រា ៤៥៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា។
ការចោទប្រកាន់ខាងលើ គឺពាក់ព័ន្ធនឹងសកម្មភាពរបស់ឈ្មោះ ស៊ឹម ឡៅ ដែលបានកៀរគរប្រមូលបក្ខពួក ហូបអាហារសាមគ្គី និងបានធ្វើសកម្មភាពផ្សព្វផ្សាយ បំផុសឲ្យប្រជាពលរដ្ឋចូលរួមក្នុងផែនការផ្តួលរំលំរាជរដ្ឋាភិបាល នៃព្រះរាជាណាចក្រកម្ពុជា ក្រោមឧបាយកល ផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្ស៊ី។
សាលាដំបូងខេត្តបាត់ដំបង បានបញ្ជាក់ថា អ្នកពាក់ព័ន្ធនឹងការគាំទ្រ ឬចូលរួមរអនុវត្តផែនការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាល នឹងត្រូវប្រឈមនឹង ការចោទប្រកាន់បញ្ជូនទៅតុលាការកាត់ទោសតាមច្បាប់ ពីបទ រួមគំនិតក្បត់ ដែលអាចមានទោសជាប់ពន្ធនាគារពី៥ (ប្រាំ)ឆ្នាំ ទៅ ១០(ដប់)ឆ្នាំ តាមមាត្រា ៤៥៣ នៃក្រមព្រហ្មទណ្ឌលើកលែងតែអ្នកពាក់ព័ន្ធទាំងនោះបានចូលមកសារភាពទាន់ពេលវេលា ដែលអាចនឹងត្រូវលើកលែងឲ្យរួចពីទោសបញ្ញត្តិពិសេស នៃមាត្រា ៤៥៤ នៃក្រមព្រហ្មទណ្ឌ៕ ដោយ៖បញ្ញាស័ក្តិ
