ប្រទេសតួកគី និងរុស្សីបានសម្រេចកិច្ចព្រមព្រៀងប្រវត្តិសាស្រ្តមួយ ក្នុងគោលបំណងបណ្តេញ និងកុំឲ្យកងកម្លាំងឃឹត (Kurd) មកនៅតាមតំបន់ព្រំដែនស៊ីរី ក្បែរប្រទេសតួកគី។
កាលពីពេលថ្មីៗនេះ ប្រទេសតួកគីបានធ្វើប្រតិបត្តិការយោធា ដើម្បីបណ្តេញកងកម្លាំងឃឹត ដែលជាសម្ព័ន្ធមិត្តរបស់អាមេរិច ចេញពីតំបន់ព្រំដែនខាងជើង និងដើម្បីបង្កើតតំបន់សុវត្ថិភាព។
រុស្សីគឺជាសម្ព័ន្ធមិត្តរបស់ប្រធានាធិបតីស៊ីរី Bashar al-Assad និងបានបង្ហាញក្តីកង្វល់ពីការជ្រៀតជ្រែង ពីសំណាក់បរទេសចូលក្នុងកិច្ចការរបស់ស៊ីរី។
ក្រោយសម្រេចបង្កើតព្រមព្រៀងជាមួយគ្នា តួកគី និងរុស្សីនឹងចាប់ផ្តើមធ្វើប្រតិបត្តិការយាមល្បាតនៅតាមព្រំដែន។
កិច្ចព្រមព្រៀងជាប្រវត្តិសាស្រ្តនោះកើតឡើង ក្រោយពេលអាមេរិចបានប្រកាសដកទ័ពចេញពីស៊ីរី ដែលអ្នកវិភាគមើលឃើញថា ការគ្មានវត្ថមានរបស់អាមេរិច នាំឲ្យតួកគី និងរុស្សីមានឥទ្ធិពលនៅតំបន់ទាំងនោះ។
ប្រធានាធិបតីដូណាល់ ត្រាំបានប្រកាសថា អាមេរិចនឹងរក្សាទ័ពមួយចំនួនដើម្បីទុកការពារតំបន់ផលិតប្រេងនៅស៊ីរី។
បច្ចុប្បន្នតួកគីបានកាន់កាប់តំបន់ចំងាយ ១២០គីឡូម៉ែត្ររវាងទីក្រុង Ras al-Ain និងទីក្រុងTal Abyad ដើម្បីបង្កើតតំបន់សុវត្ថិភាព សម្រាប់ផ្តល់កន្លែងតាំងទីលំនៅដល់ជនភៀសខ្លួនស៊ីរីរហូតដល់ ២លាននាក់ ដែលពួកគេបច្ចុប្បន្នកំពុងរស់នៅក្នុងប្រទេសតួកគី៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC