ភ្នំពេញ៖លោក ឃួង ស្រេង អភិបាលរាជធានីភ្នំពេញ បានអញ្ជើញជាអធិបតីភាពក្នុងពិធីបិទវគ្គបណ្ដុះបណ្ដាល ការប្រាស្រ័យទាក់ទង និងបដិសណ្ឋារកិច្ច ក្នុងការផ្ដល់សេវារដ្ឋបាលសាធារណៈ ជូនប្រជាពលរដ្ឋតាមសង្កាត់ក្នុងរាជធានីភ្នំពេញ ប្រកបដោយស្នាមញញឹម តម្លាភាព គណនេយ្យភាព និងទាន់ពេលវេលាជូនបងប្អូនប្រជាពលរដ្ឋ តាមតម្រូវការប្រើប្រាស់ចាំបាច់ កាលពីរសៀលថ្ងៃទី២២ខែតុលា ឆ្នាំ២០១៩ នៅសាលារាជធានីភ្នំពេញ។
លោកអភិបាល បានថ្លែងថា ការដែលប្រជាពលរដ្ឋចង់ជួបចៅសង្កាត់ ដើម្បីឲ្យផ្ដល់សេវាផ្សេងៗ ពិបាកជាងចង់ជួបរដ្ឋមន្ត្រីនោះ ពាក្យនេះ ត្រូវបានសាបរលាបហើយ ដោយសារតែនៅថ្នាក់សង្កាត់ មានមន្ត្រីចាំទទួលការផ្តល់សេវានេះ គ្រប់ពេលពីប្រជាពលរដ្ឋ។
លោកឃួង ស្រេង បានបន្តទៀតថា ក្នុងកំណែទម្រង់ចតុកោណតំណាក់កាលពី៤ របស់រាជរដ្ឋាភិបាល គឺការបង្ខិចសេវាឲ្យនៅកៀកកិតជាមួយប្រជាពលរដ្ឋ នៅថ្នាក់សង្កាត់ បានបង្កើតឲ្យមានក្រុមការងារមួយ ដែលមានចៅរងទី១ ចៅរងទី២ ក៏ដូចជាស្មៀនជាដើម នៅចាំទទួលសេវាកម្មផ្សេងៗ ពីប្រជាពលរដ្ឋ បើសិនជាលោកចៅសង្កាត់មិននៅ ។
លោកឃួង ស្រេង បានបញ្ជាក់ទៀតថា ការបង្កើតឲ្យមានវគ្គបណ្ដុះបណ្ដាលការប្រាស្រ័យទាក់ទង និងបដិសណ្ឋារកិច្ចក្នុងការផ្ដល់សេវារដ្ឋបាលសាធារណៈ ជូនប្រជាពលរដ្ឋតាមសង្កាត់ ក្នុងរាជធានីភ្នំពេញនេះ គឺក្នុងគោលបំណងធ្វើយ៉ាងណា ឲ្យការផ្ដល់សេវាជូនប្រជាពលរដ្ឋនេះ នៅកៀកកិតជាមួយនឹងប្រជាពលរដ្ឋ ហើយអ្នកផ្តល់សេវាមានស្នាមញញឹម ការផ្តល់សេវាមានតម្លាភាព គណនេយ្យភាព និងទាន់ពេលវេលា ទៅតាមតម្រូវការប្រើប្រាស់ចាំបាច់ បងប្អូនប្រជាពលរដ្ឋ។
លោកឃួង ស្រេង បានមានប្រសាសន៍ថា កន្លងមកនេះ ការផ្ដល់សេវាកម្មជូនប្រជាពលរដ្ឋឃើញថា មន្ត្រីរបស់យើងអនុវត្តន៍បានល្អប្រសើរហើយ ប៉ុន្តែទោះបីជាយ៉ាងណាក្តី ត្រូវតែខិតខំបន្ថែមទៀត ដើម្បីឱ្យការផ្ដល់សេវានេះកាន់តែល្អប្រសើរ។ ជាងនេះទៅទៀត អ្វីដែលសំខាន់មិនអាចខ្វះបានមួយទៀតនោះ គឺសាមគ្គីភាពផ្ទៃក្នុង ដែលមន្ត្រីទាំងអស់ ត្រូវតែមានសាមគ្គីភាពផ្ទៃក្នុង ទើបការអនុវត្តការងារ នៅក្នុងអង្គភាពរបស់ខ្លួន ទទួលបានភាពជោគជ័យ។
គួរបញ្ជាក់ថា វគ្គបណ្ដុះបណ្ដាលការប្រាស្រ័យទាក់ទង និងបដិសណ្ឋារកិច្ច ក្នុងការផ្ដល់សេវារដ្ឋបាលសាធារណៈ ជូនប្រជាពលរដ្ឋតាមសង្កាត់ ក្នុងរាជធានីភ្នំពេញ គឺមានការចូលរួមពីអស់លោកជាចៅសង្កាត់ ស្មៀនសង្កាត់ ១០៥ នៅក្នុងរាជធានីភ្នំពេញ ហើយក៏ជាវគ្គបណ្តុះបណ្តាលដំបូងផងដែរ៕ដោយ៖កូឡាប