ភ្នំពេញ៖ ប្រជាពលរដ្ឋប្រមាណជាង៥០០នាក់ មកពីសហគមន៍ដីធ្លី អង្គការសង្គមស៊ីវិល សហជីព និងក្រុមអ្នកវិភាគឯករាជ្យ បានជួបជុំគ្នា នៅរាជធានីភ្នំពេញនៅព្រឹកថ្ងៃពុធទី២៣តុលានេះ ដើម្បីប្រារព្ធខួបលើកទី២៨ នៃកិច្ចព្រមព្រៀងសន្ដិភាពទីក្រុងប៉ារីស។នេះបើតាមការផ្សាយរបស់អង្គការ LICADHO លីកាដូ។
ការប្រារព្ធទិវានេះ ធ្វើឡើងនៅទីលានប្រជាធិបតេយ្យថ្មី ដោយមានការបញ្ចេញមតិលើកឡើងពីការសន្យាដូចជា ការរក្សាសន្ដិភាព លទ្ធិប្រជាធិបតេយ្យ ការគោរពសិទ្ធិមនុស្ស និងការអភិវឌ្ឍន៍ ដូចមានចែងនៅក្នុងកិច្ចព្រមព្រៀងសន្ដិភាពទីក្រុងប៉ារីស។ តំណាងមួយចំនួនមកពីស្ថានទូតសហរដ្ឋអាមេរិក និងសហភាពអឺរ៉ុប ក៏បានចូលរួមនៅក្នុងកម្មវិធីនេះដែរ ដើម្បីស្ដាប់ការបញ្ចេញមតិរបស់អ្នកវិភាគឯករាជ្យ និងប្រធានសហជីពមួយចំនួន ដែលបានពិភាក្សាគ្នាអំពីសារសំខាន់នៃការគោរពសិទ្ធិមនុស្ស និងលទ្ធិប្រជាធិបតេយ្យសេរីពហុបក្ស។ កងសន្ដិសុខស្លៀកពាក់ស៊ីវិល និងឯកសណ្ឋានរាប់សិបនាក់ ក៏មានវត្តមាននៅទីនេះផងដែរ។
អ្នករៀបចំការប្រារព្ធទិវានេះ មិនត្រូវបានអនុញ្ញាតឱ្យធ្វើការដង្ហែក្បួនពី ក្រុមប្រឹក្សាអភិវឌ្ឍន៍កម្ពុជា មកកាន់ទីលានប្រជាធិបតេយ្យទេ ប៉ុន្តែអាចរៀបចំកម្មវិធីនេះ នៅក្នុងទីលានប្រជាធិបតេយ្យតែម្ដង។ អាជ្ញាធរបានប្រកាសថ្មីៗនេះថា ទិវាកិច្ចព្រមព្រៀងសន្ដិភាពទីក្រុងប៉ារីស ថ្ងៃទី២៣ ខែតុលា នឹងត្រូវកាត់ចោលពីថ្ងៃឈប់សម្រាកផ្លូវការរបស់រដ្ឋចាប់ផ្ដើមពីឆ្នាំក្រោយទៅ៕ ដោយ៖កូឡាប