ភ្នំពេញ៖ អភិបាលរាជធានីភ្នំពេញលោកឃួង ស្រេង បានដាក់កំហិតដល់មន្ត្រីក្រោមឱវាទរដ្ឋបាលរាជធានីភ្នំពេញ ត្រូវកាត់បន្ថយការធ្វើដំណើរទៅ ក្រៅប្រទេស ក្នុងដំណាក់កាល ដែលរាជធានីភ្នំពេញកំពុងត្រៀមខ្លួនធ្វើជាម្ចាស់ផ្ទះពិធីបុណ្យ ធំៗនាពេលដ៏ ខ្លីខាងមុខនេះ ដើម្បីរួមគ្នាបំពេញភារកិច្ចឲ្យទទួលបានលទ្ធផលល្អក្នុងនោះមាន បុណ្យឯករាជ្យជាតិ៩វិច្ឆិកា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកក្នុងខែវិច្ឆិកាខាងមុខនេះ។
អ្វីដែលជាចំណុចសំខាន់មួយទៀតនោះគឺ រាជធានីភ្នំពេញក៏បានត្រៀមខ្លួន ធ្វើជាម្ចាស់ផ្ទះនៃមហាសន្និបាត សមាគមអន្តរជាតិ នៃអភិបាលក្រុងប្រើប្រាស់ភាសាបារាំង (AIMF) លើកទី៣៩ ដែលនឹងមានបណ្តា ទីក្រុងជាសមាជិករបស់ AIMF ប្រមាណ៣០០ទីក្រុង មកពីគ្រប់ទ្វីបមកចូលរួម ដែលនឹងប្រព្រឹត្តទៅនៅដើមខែធ្នូ ឆ្នាំ២០១៩ខាងមុខនេះ។
ការដាក់កំហិតដល់មន្ត្រីក្រោមឱវាទបែបនេះ របស់លោកអភិបាលរាជធានីភ្នំពេញ បានធ្វើឡើងក្នុងកិច្ចប្រជុំត្រួតពិនិត្យវឌ្ឍនភាពរបស់គណៈកម្មការ និងអនុគណៈកម្មការរៀបចំមហាសន្និបាត កាលពីរសៀលថ្ងៃទី២២តុលា នៅសាលារាជធានីភ្នំពេញ។
លោកឃួង ស្រេង បានថ្លែងថា មហាសន្និបាតរបស់ AIMF ប្រព្រឹត្តទៅត្រូវនឹងខួបកំណើតលើកទី៤០ ថ្ងៃបង្កើតសមាគម AIMF និងខួប៤០ឆ្នាំ របស់កម្ពុជាក្រោយថ្ងៃរំដោះពី របបប្រល័យពូជសាសន៍ ក្រោមប្រធានបទ ទីក្រុងដែលមានភាពធន់ ការគិតគូពី បញ្ហាប្រឈម និងការស្ថាបនាទីក្រុងឡើងវិញ។
លោកបានបន្តថា នេះជាកិត្តិយសធំធេងណាស់សំរាប់រាជធានីភ្នំពេញ ក៏ដូចកិត្តិយសជាតិទាំងមូល ដែលទទួលបានប្រតិភូជាង៣០០ទីក្រុង ក្នុងពិភពលោក ដែលធ្វើឲ្យកម្ពុជាពិសេសរាជធានីភ្នំពេញ ល្បីរន្ទឺលើឆាកអន្តរជាតិ។
លោកអភិបាល បន្តទៀតថា ការងារទាំងអស់យើងគិតគូរៀបចំយ៉ាងហ្មត់ចត់ទាំងការធ្វើបដិសណ្ឋារកិច្ចភ្ញៀវ ការស្នាក់នៅរបស់ប្រតិភូ ការ រៀបចំតាំងពិព័រណ៍បង្ហាញពីដំណើរការអភិវឌ្ឍរាជធានីភ្នំពេញ ការរៀបចំកែលម្អសួនច្បារ ការតុបតែងលម្អតាមទីសាធារណៈជាដើម។ ចំណុចសំខាន់បំផុត នោះគឺការពង្រឹងសន្តិសុខសណ្តាប់ធ្នាប់ របៀបរៀបរយសាធារណៈ ត្រូវតែឲ្យបានល្អប្រសើរ ទើបការធ្វើដំណើរទៅក្រៅប្រទេស របស់មន្ត្រីក្រោមឱវាទរដ្ឋបាលរាជធានីភ្នំពេញ ក្នុងដំណាក់កាលនេះ ត្រូវបានកំហិតជាចាំបាច់៕ដោយ៖កូឡាប