ភ្នំពេញ ៖ ឯកអគ្គរាជទូតជប៉ុនថ្មីប្រចាំនៅកម្ពុជា បានថ្លែងថា ប្រទេសជប៉ុន នៅតែបន្តគាំទ្រដល់ប្រទេសកម្ពុជា ជាពិសេសជំរុញកិច្ចសហប្រតិបត្តិការ ទៅលើផ្នែកនយោបាយ សេដ្ឋកិច្ច វប្បធម៌ រួមទាំងវិស័យផ្សេងៗច្រើនទៀត។
នៅវិមានសន្តិភាព នាព្រឹកថ្ងៃទី២៣ ខែតុលា ឆ្នាំ២០១៩នេះ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយនឹង លោក Masahiro Mikami ឯកអគ្គរាជទូតជប៉ុនថ្មីប្រចាំនៅកម្ពុជា។
លោកឯកអគ្គរាជទូតជប៉ុនក៏បាន បានគូសបញ្ជាក់ថា បច្ចុប្បន្ន ទំនាក់ទំនងភាគីរវាងកម្ពុជា និងជប៉ុនគឺមានទំនាក់ទំនងល្អ។ កន្លងមកកម្ពុជាបានឆ្លងកាត់នៅសង្គ្រាមស៊ីវិល ក៏ប៉ុន្តែពេលនេះឃើញថា កម្ពុជាមានការអភិវឌ្ឍរីកចម្រើនយ៉ាងឆាប់រហ័ស ក្រោមការដឹកនាំរបស់សម្ដេចតេជោជានាយករដ្ឋមន្ត្រី។ ប្រទេសជប៉ុននៅតែបន្តគាំទ្រដល់ប្រទេសកម្ពុជា ជាពិសេសជំរុញកិច្ចសហប្រតិបត្តិការទៅលើផ្នែកនយោបាយ សេដ្ឋកិច្ចវប្បធម៌ រួមទាំងវិស័យផ្សេងៗច្រើនទៀត។
សម្ដេចតេជោ ហ៊ុន សែន បានមានប្រសាសន៍ថា សម្ដេចពិតជាអរគុណចំពោះប្រទេសជប៉ុន ដែលបានចូលរួមយ៉ាងសកម្ម ក្នុងការស្វែងរកសន្តិភាព សម្រាប់ប្រទេសកម្ពុជាក្នុងទសវត្សរ៍ទី៨០ និងការចូលរួមថែរក្សាសន្តិភាព ក្នុងក្របខ័ណ្ឌអង្គការសហប្រជាជាតិកន្លងទៅនេះ។ សម្ដេចបានបន្តទៀតថា កន្លងមក ជប៉ុនក៏បានចូលរួមចំណែក ក្នុងការផ្ដល់ជំនួយប្រទេសកម្ពុជា ដូចជាការកសាងនូវវិស័យហេដ្ឋារចនាសម្ព័ន្ធ ដែលរួមចំណែកក្នុងការអភិវឌ្ឍនឹងធ្វើឲ្យកម្ពុជារីកចម្រើនផងដែរ។ បច្ចុប្បន្ននេះ ទំនាក់ទំនងទ្វេភាគីរវាងប្រទេសយើងទាំងពីរ មានដល់កម្រិតខ្ពស់ ពិសេសក្នុងកម្រិតដៃគូយុទ្ធសាស្ត្រ ដោយសារតែកន្លងមក មានការផ្លាស់ប្ដូរនៃថ្នាក់ដឹកនាំកំពូល រវាងប្រទេសទាំងពីរ ហើយលើសពីនេះទៅទៀត បច្ចុប្បន្នយើងមានការហោះហើរត្រង់ ទៅមករវាងប្រទេសទាំងពីរផងដែរ ដែលអាចជួយសម្រួលដល់ការធ្វើដំណើរ សម្រាប់អ្នកវិនិយោគ និងភ្ញៀវទេសចរផងដែរ។
សម្ដេចតេជោ ក៏បានបញ្ជាក់អំពីទំហំពាណិជ្ជកម្ម រវាងប្រទេសទាំងពីរ មានការកើនឡើងមានការកើនឡើងជាលំដាប់ ហើយសម្តេចចង់បន្តឃើញទំហំពាណិជ្ជកម្មរវាងប្រទេសកម្ពុជា និងជប៉ុនមានការកើនឡើងជាបន្តទៀត រួមទាំងការបណ្ដាក់ទុន ពីអ្នកវិនិយោគជប៉ុនមកកម្ពុជាផងដែរ។ សម្ដេចតេជោចង់ឲ្យបង្កើនកិច្ចសហប្រតិបត្តិការ រវាងប្រទេសយើងទាំងពីរបន្ថែមទៀត ជាពិសេសលើការពង្រីកនូវសេដ្ឋកិច្ច ពាណិជ្ជកម្ម និងវិស័យផ្សេងៗជាច្រើនទៀត។
សម្តេចបន្តទៀតថា កម្ពុជានឹងបន្តអនុវត្តនូវនីតិរដ្ឋ ដើម្បីពង្រឹងប្រជាធិបតេយ្យនៅក្នុងប្រទេសកម្ពុជា អ្វីដែលជាអាទិភាពរបស់សម្ដេច ក៏ដូចជារាជរដ្ឋាភិបាលកម្ពុជា គឺការរក្សាសន្តិភាពឲ្យបានស្ថិតស្ថេរ ហើយដំណើរការលទ្ធិប្រជាធិបតេយ្យនេះនៅតែបន្ត។ លើសពីនេះទៀត សម្ដេចតេជោនាយករដ្ឋមន្ត្រី និងលោក ឯកអគ្គរាជទូតជប៉ុនប្រចាំនៅកម្ពុជា បានផ្លាស់ប្ដូរមតិជុំវិញ កិច្ចសហប្រតិបត្តិការលើអនុតំបន់ និងអន្តរជាតិ ជាពិសេសគឺពាក់ព័ន្ធធ្វើយ៉ាងណា ឱ្យប្រទេសយើងទាំងពីរ បង្កើននូវកិច្ចសហប្រតិបត្តិការនេះបន្ថែមទៀត។ ជាពិសេសសម្ដេច បានស្វាគមន៍ចំពោះការអញ្ជើញយុវជន ពីប្រទេសកម្ពុជាទៅទស្សនកិច្ច ក៏ដូចជាសិក្សានៅប្រទេសជប៉ុនកន្លងទៅ ក៏ដូចជារយៈពេលខាងមុខទៀត។
លោកឯកអគ្គរាជទូជប៉ុន បានមានប្រសាសន៍ពីអ្វី ដែលជប៉ុននឹងបន្តជួយដល់កម្ពុជា ជាបន្តទៀត ជាពិសេសគឺពាក់ព័ន្ធការវិនិយោគ របស់ក្រុមហ៊ុនជប៉ុនមកកម្ពុជា ។ លោកក៏មានប្រសាសន៍ថា ជប៉ុននឹងសកម្មភាពដែលសហការជាមួយនឹងស៊ីម៉ាក់ ក្នុងការដោះមីននៅកម្ពុជាផងដែរ ជប៉ុននឹងបន្តលើការផ្ដល់ជំនួយ លើវិស័យថាមពលអគ្គិសនី និងធ្វើផែនការមេសម្រាប់កំពង់ផែស្វ័យយ័តទឹកជ្រៅ នៅខេត្តព្រះសីហនុ។ ហើយត្រង់ចំណុចនេះ សម្តេចតេជោបានមានប្រសាសន៍ថា ចង់ឲ្យជប៉ុនសម្រេចនូវផែនការមេនេះ ដើម្បីឲ្យទទួលបាននូវភាពជោគជ័យ មានន័យថាធ្វើយ៉ាងណាដើម្បីឲ្យកប៉ាល់ធំៗនោះ ចុះចតដោយផ្ទាល់នៅកំពង់ផែទឹកជ្រៅនេះតែម្ដង ដោយមិនចាំបាច់មានការផ្ទេរទៅតាមបណ្ដាប្រទេសជិតខាងឡើយ៕ដោយ៖កូឡាប