ភ្នំពេញ៖ ឯកអគ្គរាជទូតអាល្លឺម៉ង់ប្រចាំនៅកម្ពុជា ថ្លែងថា ប្រទេសយើងទាំងពីរ កម្ពុជានិងអាល្លឺម៉ង់ នៅមានសក្តានុពលយ៉ាងច្រើន ហើយជាពិសេស ឥឡូវនេះ សភាពពាណិជ្ជកម្មអាល្លឺម៉ង់ ចង់បើកការិយាល័យ នៅប្រទេសកម្ពុជា ជាលើកដំបូង ដោយសារតែក្រុមហ៊ុនអាល្លឺម៉ង់ មានការចាប់អារម្មណ៍ លើសេដ្ឋកិច្ចកម្ពុជា គឺចង់មកបណ្ដាក់ទុននៅកម្ពុជា។
សម្ដេចតេជោនាយករដ្ឋមន្ត្រី បានជួបពិភាក្សាការងារជាមួយ នឹង លោកChristian Berger ឯកអគ្គរាជទូតអាល្លឺម៉ង់ប្រចាំនៅកម្ពុជា កាលពីថ្ងៃទី២៣ខែតុលាឆ្នាំ២០១៩ នៅវិមាននាយករដ្ឋមន្ត្រី។
នៅក្នុងជំនួបនោះ សម្ដេចតេជោ ហ៊ុន សែន មានប្រសាសន៍ថា នៅពេលដែលលោកឯកអគ្គរាជទូតអាល្លឺម៉ង់ បានចូលរួមនៅបេសកកម្មការទូត នៅក្នុងប្រទេសកម្ពុជានេះ សង្ឃឹមថា “ឯកឧត្តម នឹងជួយជំរុញ ក្នុងការពង្រីកពង្រឹងទំនាក់ទំនង និងកិច្ចសហប្រតិបត្តិការទ្វេភាគី រវាងប្រទេសទាំងពីរ”។
លោកឯកអគ្គរាជទូតអាល្លឺម៉ង់ បានសន្យាថា នឹងព្យាយាមឲ្យអស់លទ្ធភាព ក្នុងការបន្តពង្រឹង នូវកិច្ចសហប្រតិបត្តិការរវាងកម្ពុជា និងអាល្លឺម៉ង់។ លោក បានបន្តថា ប្រទេសយើងទាំងពីរ មានទំនាក់ទំនងនឹងគ្នា ជាយូរមកហើយ ។ លោក ក៏បានអរគុណ ចំពោះរាជរដ្ឋាភិបាលកម្ពុជា ដែលបានគាំទ្រចំពោះបេក្ខភាពប្រទេសអាល្លឺម៉ង់ នៅអង្គការសហប្រជាជាតិកន្លងមក ជាពិសេស លោកក៏បានបញ្ជាក់ពីភាពជោគជ័យ នៃដំណើរទស្សនកិច្ចរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទៅកាន់ប្រទេសអាល្លឺម៉ង់កន្លងមកនេះ ដែលដំណើរទស្សនកិច្ចនេះ គឺបានគូសបញ្ជាក់អំពីទំនាក់ទំនងល្អ រវាងប្រទេសទាំងពីរ ជាពិសេស លោកចង់ឃើញកិច្ចសហប្រតិបត្តិការល្អនឹងគ្នា។ លោកបានបញ្ជាក់ថា ប្រទេសយើងទាំងពីរនៅមានសក្តានុពលយ៉ាងច្រើន ហើយអ្វីដែលឯកឧត្តមចាប់អារម្មណ៍បំផុតនោះគឺឥឡូវនេះជាសភាពពាណិជ្ជកម្មអាល្លឺម៉ង់ចង់បើកការិយាល័យនៅប្រទេសកម្ពុជាជាលើកដំបូង ដោយសារតែក្រុមហ៊ុនអាល្លឺម៉ង់មានការចាប់អារម្មណ៍លើសេដ្ឋកិច្ចកម្ពុជាគឺចង់មកបណ្ដាក់ទុននៅកម្ពុជា។
ជាការឆ្លើយតប សម្តេចតេជោនាយករដ្ឋមន្ត្រីបានមានប្រសាសន៍ថា បច្ចុប្បន្ននេះ បើយើងក្រឡេកទៅមើលវិស័យសេដ្ឋកិច្ច និងពាណិជ្ជកម្មនៃប្រទេសទាំងពីរ គឺមានការរីកចម្រើនយ៉ាងច្រើន ហើយកម្ពុជាក៏មានការនាំចូលពីអាល្លឺម៉ង់ច្រើនដែរ ដូចជារថយន្តជាដើម ហើយកម្ពុជាក៏មានការនាំចេញទៅអាល្លឺម៉ង់ច្រើនដែរ ដូចជាផលិតផលស្បែកជើង សម្លៀកបំពាក់ផងដែរ។ សម្តេចបានមានប្រសាសន៍ថា កន្លងមកនេះ កម្ពុជាបានសម្រេចចិត្តទិញម៉ាស៊ីនភ្លើង ដែលមួយគ្រឿងទិញពីប្រទេសអាល្លឺម៉ង់ ហើយបច្ចុប្បន្ននេះកម្ពុជា ក៏មានផលិតផលដូចជា ស្រាបៀររបស់ប្រទេសអាល្លឺម៉ង់ ចែកចាយក្នុងប្រទេកម្ពុជាផងដែរ ដូច្នេះបើយើងក្រឡេកទៅមើលវិស័យធុរកិច្ច កម្ពុជានិងអាល្លឺម៉ង់នេះ គឺប្រទេសយើងទាំងពីរ នៅមានសក្តានុពលច្រើន។
ក្នុងជំនួបនេះ សម្ដេចតេជោ បានមានប្រសាសន៍ថា កម្ពុជានឹងត្រូវត្រៀមធ្វើជាម្ចាស់ផ្ទះ នៃកិច្ចប្រជុំកំពូលអាស៊ីអឺរ៉ុបឆ្នាំ២០២០ ខាងមុខនេះ ហើយជាពេលវេលាមួយ ដែលសមស្របសម្រាប់ប្រទេសអាល្លឺម៉ង់ ធ្វើជាប្រធាននៃសហភាពអឺរ៉ុប ពីព្រោះនៅសហភាពអឺរ៉ុប គេមានធ្វើជាប្រធានប្តូរវេន ដូច្នេះ ប្រទេសទាំងពីរ និងសហការគ្នា ធ្វើយ៉ាងណាឲ្យកិច្ចប្រជុំនេះ ទទួលបាននូវភាពជោគជ័យ។
លោកអគ្គរដ្ឋទូត បានបន្តទៀតថា នៅក្នុងអាណត្តិនេះ លោកនឹងព្យាយាមជំរុញ ធ្វើយ៉ាងណាឱ្យប្រទេសយើងទាំងពីរ បន្តនូវកិច្ចសហប្រតិបត្តិការល្អគ្នា ជាបន្តទៀត៕ ដោយ៖កូឡាប
