ភ្នំពេញ៖ ប្រជាពលរដ្ឋប្រមាណ ២១គ្រួសារ ដែលមានដី និងលំនៅដ្ឋានរស់នៅ ជាប់ព្រំដី ឬចំណីប្រឡាយស្ទឹងមានជ័យ ស្ថិតក្នុងភូមិមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានបន្តព្រួយបារម្ភខ្លាចបាត់បង់ដីលំនៅដ្ឋាន ផ្តើមដោយផែនការស្តារអភិវឌ្ឍន៍ប្រឡាយស្ទឹងមានជ័យ។
ទាក់ទិនបញ្ហានេះ ក្រុមប្រជាពលរដ្ឋ ២១គ្រួសារ ដែលផ្ទុះការតវ៉ា កាលពីព្រឹកថ្ងៃទី២១ ខែតុលាឆ្នាំ២០១៩នោះ ជាថ្មីម្តងទៀត នៅថ្ងៃពុធ ទី២៣ ខែតុលា បានអំពាវនាវដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តរាគមន៍ និងបញ្ជូនមន្ត្រីចុះអង្កេតទៅលើសកម្មភាពដឹកនាំគ្រឿងចក្រជីកស្តារប្រឡាយ របស់លោក ឡុង ង៉ែត អភិបាលរងខណ្ឌមានជ័យ ថាបានប៉ះពាល់ដល់ដីលំនៅដ្ឋានកំពុងរស់នៅ និងទ្រព្យសម្បត្តិ របស់ពួកគាត់អស់ជាច្រើន។
ត្រង់ចំណុចនេះ តំណាងប្រជាពលរដ្ឋ ២១គ្រួសារ បានអះអាងថា ក្រោយពេល លោក ឡុង ង៉ែត អភិបាលរងខណ្ឌមានជ័យ បានដឹកនាំគណៈបញ្ជាការឯកភាព ចុះបោះបង្គោលព្រំដីប្រឡាយ កាលពីថ្ងៃទី២១ ខែតុលាថ្មីៗនេះ បាន
រុះរើបំផ្លាញទ្រព្យសម្បត្តិ របស់ប្រជាពលរដ្ឋពួកគាត់អស់ជាច្រើន។ ហើយថា ចំពោះសកម្មភាពចុះស្តារប្រឡាយខាងលើនេះ មិនមានបង្ហាញប្លង់ និងឯកសារច្បាស់លាស់ជូនពួកគាត់ បានឃើញនោះទេ។
ប្រជាពលរដ្ឋបន្តថា កន្លងមក ប្រជាពលរដ្ឋទាំង ២១គ្រួសារ មានការសប្បាយចិត្ត ដោយបានឮព័ត៌មានថា សាលារាជធានីភ្នំពេញ នឹងធ្វើការអភិវឌ្ឍប្រឡាយស្ទឹងមានជ័យ ឲ្យមានអនាម័យ និងមានសោភ័ណភាពឡើងវិញ។ ហើយថា ការអភិវឌ្ឍនេះ ប្រជាពលរដ្ឋពួកគាត់ នឹងចូលរួមសហការ និងគោរពតាមគោលការណ៍ របស់សាលារាជធានីភ្នំពេញ។ ប៉ុន្ដែអ្វីដែលពួកគាត់បានផ្ទុះការតវ៉ា កាលពីថ្ងៃទី២១ ខែតុលា ក៏ដោយសារតែក្រុមការងារចុះមកបោះបង្គោលព្រំដី ឬព្រំដីចំណីប្រឡាយដឹកនាំដោយ លោក ឡុង ង៉ែត អភិបាលរងខណ្ឌមានជ័យ បានធ្វើសកម្មភាពហាក់ដូចជាមានភាពអាថ៌កំបាំង និងមានភាពមិនប្រក្រតី ចំពោះសកម្មភាពចុះបោះបង្គោលកំណត់ព្រំប្រឡាយស្ទឹងមានជ័យ ដើម្បីស្តារ និងអភិវឌ្ឍន៍ខាងលើនេះ។
ប្រជាពលរដ្ឋបន្តថា ចំពោះភាពមិនប្រក្រតី របស់ក្រុមការងារ ដឹកនាំដោយ លោក ឡុង ង៉ែត ខាងលើនេះ គឺនៅពេលប្រជាពលរដ្ឋពួកគាត់ បានសួររកឯកសារ និងប្លង់មេ នៃការអភិវឌ្ឍប្រឡាយខាងលើ បែរជា លោក ឡុង ង៉ែត អភិបាលរងខណ្ឌមានជ័យរូបនេះ ឆ្លើយថា មិនបានយកប្លង់មកជាប់តាមខ្លួនទេ។ ហើយបែរជា ឲ្យពួកគាត់មើលប្លង់ ដែលគ្មានចុះហត្ថលេខាទទួលស្គាល់ពីក្រសួងណាមួយទៅវិញ ដែលធ្វើឲ្យពួកគាត់មានមន្ទឹលថា បើការអភិវឌ្ឍប្រឡាយស្ទឹងមានជ័យនេះ មានប្លង់ចេញពីសាលារាជធានីភ្នំពេញពិតមែននោះ ហេតុអ្វីបានជា លោក ឡុង ង៉ែត អភិបាលរងខណ្ឌមានជ័យ មិនបង្ហាញពួកគាត់ឲ្យអស់ចិត្តផង? ឬមួយក៏ បោះបង្កោលរំលោភយកដី របស់ប្រជាពលរដ្ឋពួកគាត់រួចហើយ ទើបចេញប្លង់តាមក្រោយ?
យ៉ាងណាក៏ដោយចុះ លោក ឡុង ង៉ែត អភិបាលរងខណ្ឌមានជ័យ មិនទាន់ធ្វើអត្ថាធិប្បាយទេ ដោយរង់ចាំឆ្លងយោបល់ថ្នាក់លើជាមុនសិន។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្លាប់បានផ្ញើសាររំលឹកដល់មន្ត្រីជាបន្តបន្ទាប់ថា “មន្រ្តីរាជការគឺជាអ្នកបម្រើរាស្ត្រ គឺមិនមែនជាចៅហ្វាយរាស្ត្រនោះទេ”។
យ៉ាងណាក៏ដោយចុះ ប្រជាពលរដ្ឋទាំង ២១គ្រួសារ ដែលមានដី និងផ្ទះ នៅអមជាប់ប្រឡាយស្ទឹងមានជ័យ បានសំណូមពរដល់ សម្តេចនាយករដ្ឋមន្ត្រី ហ៊ុន សែន ឲ្យជួយពិនិត្យ និងអន្តរាគមន៍ ដល់ពួកគាត់ ដោយអនុគ្រោះ ព្រោះសកម្មភាពចុះជីកស្តារប្រឡាយ របស់ក្រុមការងារជំនាញខណ្ឌស្ទឹងមានជ័យ ដឹកនាំដោយ លោក ឡុង ង៉ែត អភិបាលរងខណ្ឌមានជ័យ បានប៉ះពាល់ដល់ដីលំនៅដ្ឋាន និងខូចខាតទ្រព្យសម្បត្តិ របស់ប្រជាពលពួកគាត់អស់ជាច្រើនគ្រួសារ៕ ដោយ៖ ដែន សីមា