ព្រះសីហនុ ៖ នារីវ័យក្មេងជនជាតិថៃម្នាក់ បន្ទាប់ពីបានចាកចេញពីប្រទេសថៃ តាមយន្ដហោះ ចេញពីប្រទេសថៃ ឆ្ពោះមករកការងារធ្វើ ផ្នែកកាស៊ីណូអនឡាញ (Online Casino) ជាមួយក្រុមជនជាតិចិនម៉ាឡេស៊ី ប៉ុន្តែត្រូវបានក្រុមជនជាតិចិនម៉ាឡេ មានគ្នា៤នាក់ បានចាប់បង្ខាំងទុក ដើម្បីជំរិតទារប្រាក់ពីប្ដី របស់នាង នៅឯស្រុកអារញ្ញប្រាថេត ខេត្តស្រះកែវ ប្រទេសថៃ។ ប៉ុន្តែដោយសារតែប្តី របស់ស្ត្រីរងគ្រោះ រកលុយរំដោះខ្លួនប្រពន្ធ មិនបានទើបសម្រេចចិត្តប្ដឹងប៉ូលិសខេត្តស្រះកែវ ឲ្យជួយអន្ដរាគមន៍មកកាន់ប៉ូលិសខ្មែរ ហើយនៅទីបំផុត ទើបរំដោះខ្លួនស្ត្រីរងគ្រោះ ចេញពីកណ្តាប់ដៃ របស់ជនសង្ស័យ។ ហើយយុទ្ធនាការការនោះ សមត្ថកិច្ចនគរបាលកម្ពុជា ក៏បានចាប់ខ្លួនជនសង្ស័យជាជនជាតិម៉ាឡេស៊ីចំនួន ៤នាក់ផងដែរ។
ក្រោយសមត្ថកិច្ចកម្ពុជា បានជួយរំដោះនារីរងគ្រោះ ឲ្យរួចផុតចេញពីកណ្តាប់ដៃជនល្មើស ដោយសុវត្ថិភាពរួចមក មន្ត្រីស្ថានទូតថៃប្រចាំទីក្រុងភ្នំពេញ រួមជាមួយនឹងនារីរងគ្រោះ ក៏ដូចជាតម្រួតអន្តោប្រវេសន៍ប្រចាំច្រកទ្វារអន្តរជាតិខ្លងលឹក ស្រុកអារញ្ញប្រាថេត ក៏បានថ្លែងអំណរគុណ ដល់កម្លាំងនគរបាលកម្ពុជា ដែលបានរំដោះនារី ជាជនជាតិថៃម្នាក់ ឲ្យរួចពីការចាប់បង្ខាំងជំរិតទារប្រាក់ពីសំណាក់ជនជាតិម៉ាឡេស៊ីចំនួន៤នាក់ ប្រព្រឹត្តនៅខេត្តព្រះសីហនុ។
សូមរំលឹកថា កាលពីថ្ងៃទី២០ ខែតុលា ឆ្នាំ២០១៩ កាសែតក្នុងស្រុក របស់ថៃឈ្មោះ ថៃរ៉ាត់ បានចេញផ្សាយ នូវព័ត៌មានមួយដោយបានលើកសរសើរ ដល់កងកម្លាំងសមត្ថកិច្ចកម្ពុជា ដែលបានសម្រុកចូលរំដោះនារីជនជាតិថៃ ដែលជាស្ត្រីរងគ្រោះ ឲ្យរួចផុតពីការចាប់ជំរិត របស់ជនសង្ស័យជនជាតិចិនម៉ាឡេស៊ី នៅក្នុងទឹកដីខេត្តព្រះសីហនុ ដែលទីតាំងនោះគឺជាកន្លែងបនកាស៊ីណូអនឡាញ។
សារព័ត៌មានដដែលនោះ បានឲ្យដឹងទៀតថា កាលពីថ្ងៃទី២០ ខែតុលា ឆ្នាំ២០១៩ វេលាម៉ោង១០ព្រឹក នៅចំណុចស្ថានីយ៍តម្រួតអន្តោប្រវេសន៍ប្រចាំច្រកអន្តរជាតិខ្លងលឹក ក្នុងស្រុកអារញ្ញប្រាថេត ខេត្តស្រះកែវ មានការជួបជុំមួយ ដែលក្នុងនោះមានទាំងតំណាងស្ថានទូតថៃ ប្រចាំទីក្រុងភ្នំពេញ, មេបញ្ជាការតម្រួតអន្តោប្រវេសន៍ថៃគឺលោក បេនចៈផុន រ៉តសាវ៉ាត , លោក ដេតថាត់ ឈ្លើមជីតមេបញ្ជាការកងរយ ទាហានព្រំដែនលេខ១២០១ និងអង្គភាពពាក់ព័ន្ធជាច្រើនទៀត ដែលក្នុងនោះក៏មាននារីជនជាតិ ថៃម្នាក់ អាយុ២៤ឆ្នាំ ជាជនរងគ្រោះផងដែរ។
ក្រោយនគរបាលកម្ពុជារំដោះខ្លួនរួច ស្រ្តីជនជាតិថៃរូបនោះ ក៏បាននិយាយរៀបរាប់ថា កាលពីថ្ងៃទី ១៤ ខែតុលា ឆ្នាំ២០១៩ នាងបានធ្វើដំណើរ ចេញពីប្រទេសថៃតាមយន្តហោះ ឆ្ពោះទៅកាន់ខេត្តព្រះសីហនុ ដើម្បីសុំការងារធ្វើ ជាភ្នាក់ងារកាស៊ីណូអនឡាញ។ ប៉ុន្តែនៅពេលទៅដល់ទីនោះ រូបនាងត្រូវបានជនជាតិចិនម៉ាឡេស៊ីចំនួន ៤ នាក់ ចាប់រូបនាង យកទៅឃុំបង្ខាំង ព្រមទាំងបានធ្វើទារុណកម្មដោយមានការវាយដំ ព្រមទាំងបានយកកន្ទុយបារីមកដុតលើជើង របស់នាងជាច្រើនកន្លែងថែមទៀតផង។
ស្ត្រីរងគ្រោះបន្តថា ចំពោះការឃុំខ្លួននោះ រូបនាងត្រូវបានក្រុមជនសង្ស័យទាំងនោះបង្អត់អាហារចំនួន ៣ថ្ងៃ ដោយឲ្យនាងទាក់ទងតាមទូរស័ព្ទ ទៅក្រុមគ្រួសារជាពិសេស ទៅប្តី របស់នាងដែលរស់នៅក្នុងស្រុកអារញ្ញប្រាថេត ឲ្យរកប្រាក់មកប្រគល់ឲ្យពួកគេ ចំនួន ១៥ម៉ឺនបាត។
បន្ថែមលើនេះ ជនសង្ស័យទាំងនោះ ក៏បានគំរាមថា បើរកប្រាក់មកប្រគល់ឲ្យពួកគេមិនបានទេ នឹងកាត់ម្រាមដៃនាងផ្ញើទៅឲ្យស្វាមីមើលថែមទៀតផង។
ទោះជាបែបនេះក្តី ចំពោះការដើររកលុយ ពីសំណាក់ប្តី របស់ស្ត្រីរងគ្រោះវិញ គឺមិនបានដូចបំណងទេ ដោយសារតែរកប្រាក់មិនបាន។ ហើយម៉្យាងទៀត ដោយមានការភិតភ័យផងនោះ ទីបំផុតទៅនៅថ្ងៃទី១៨ ខែតុលា ឆ្នាំ២០១៩ ទើបប្តី របស់ស្ត្រីរងគ្រោះ បានសម្រេចចិត្តចូលខ្លួនទៅប្តឹងតម្រួតខេត្តស្រះកែវ ដើម្បីសុំអន្តរាគមន៍ពីកម្លាំងប៉ូលិសកម្ពុជា។ ហើយនៅទីបំផុតសមត្ថកិច្ចកម្ពុជា ក៏បានស្រាវជ្រាវរកឃើញទីតាំងប្រព្រឹត្តបទល្មើសនោះ ព្រមទាំងបានម្រុកចូលទៅរំដោះស្ត្រីរងគ្រោះ បានដោយសុវត្ថិភាព និងបានចាប់ខ្លួនជនជាតិចិនម៉ាឡេស៊ី ចំនួន៤នាក់ ដើម្បីកសាងសំណុំរឿងបញ្ជូនទៅតុលាការបន្តនីតិវិធីតាមច្បាប់។
ព្រមជាមួយគ្នានេះ សមត្ថកិច្ចនគរបាលកម្ពុជា ក៏បានបញ្ជូនខ្លួន នារីរងគ្រោះ ទៅកាន់ស្រុកកំណើត នៅប្រទេសថៃវិញ ដោយសុវត្ថិភាព ។
ចំពោះជោគជ័យដ៏ធំធេង របស់សមត្ថកិច្ចនគរបាលកម្ពុជាខាងលើនេះ ងាកទៅស្ត្រីរងគ្រោះ ក៏ដូចជាសមត្ថកិច្ចថៃ ជាពិសេស តំណាងស្ថានទូតថៃ ប្រចាំទីក្រុងភ្នំពេញបានថ្លែងអំណរគុណ ដល់សមត្ថកិច្ចកម្ពុជា ដែលបានសហការយ៉ាងល្អប្រសើរ ក្នុងការបង្ក្រាបបទល្មើសចាប់ជំរិត ទទួលបានជោគជ័យដ៏ត្រចេះត្រចង់។
ចំណែកស្ត្រីរងគ្រោះជនជាតិថៃវិញ ក៏បានបញ្ជាក់ថា រូបនាងពិតជាត្រេកអររកអ្វីមកប្រៀបផ្ទឹមពុំបានទេ ប្រៀបបី ដូចជាបានកើតម្តងទៀត នៅពេលរូបនាង ឃើញសកម្មភាពរបស់សមត្ថកិច្ចកម្ពុជា ចូលជួយរំដោះរូបនាង និងជូននាងទៅដល់ប្រទេសថៃវិញ៕ ដោយ៖ ដែន សីមា
