មេដឹកនាំកូរ៉េខាងជើង គីម ជុងអ៊ុន បានបញ្ជាឲ្យកម្ទេចសណ្ឋាគារ និងសំណង់អគារផ្សេងៗទៀត ដែលសង់ដោយកូរ៉េខាងត្បូងទាំងអស់ នៅតំបន់ទេសចរណ៍ដ៏ល្បីមួយរបស់ខ្លួន។
មេដឹកនាំផ្តាច់ការវ័យក្មេងខាងលើ បានចាត់ទុកសំណង់អគាររបស់កូរ៉េខាងត្បូង នៅតំបន់ទេសចរណ៍ Mount Kumgang ថាជាសំណង់អគារបណ្តោះអាសន្នប៉ុណ្ណោះ។
តំបន់ទេសចរណ៍នោះ ធ្លាប់ត្រូវបានគេចាត់ទុកជានិមិត្តរូប នៃកិច្ចសហប្រតិបត្តិការរវាងកូរ៉េទាំងពីរ។
ប៉ុន្តែក្រោយពេលបានធ្វើដំណើរមកកាន់តំបន់ទេសចរណ៍ខាងលើ លោក គីម ជុងអ៊ុនបាននិយាយថា វាគួរតែត្រូវកម្ទេចចោលប្រសើរជាគ្រប់គ្រងដោយគ្មានការចូលរួមពីកូរ៉េខាងត្បូង។
សូមបញ្ជាក់ថា រមណីយដ្ឋាន Mount Kumgang ដែលស្ថិតនៅភាគខាងកើតប្រទេសកូរ៉េខាងជើង ត្រូវបានកសាងឡើងក្នុងឆ្នាំ ១៩៩០ ដោយក្រុមហ៊ុនរបស់កូរ៉េខាងត្បូង។
អ្នកទេសចររាប់ម៉ឺននាក់មកពីកូរ៉េខាងត្បូង ត្រូវបានគេអនុញ្ញាតឲ្យចូលទៅលេងតំបន់នោះ ដោយស្ថិតក្រោយការគ្រប់គ្រងយ៉ាងតឹងរ៉ឹង ប៉ុន្តែការធ្វើដំណើរទេសចរណ៍នោះ ត្រូវបានផ្អាកទៅវិញនៅក្នុងឆ្នាំ ២០០៨ ក្រោយពេលស្រ្តីទេសចរម្នាក់ ត្រូវបានបាញ់ស្លាប់ដោយសារតែឆ្មាំរបស់កូរ៉េខាងជើង។
នៅឆ្នាំ ២០១១ កូរ៉េខាងជើង បានរឹបអូសយកទ្រព្យសម្បត្តិ និងអគាររបស់កូរ៉េខាងត្បូងទាំងអស់ នៅទីនោះ និងបានបញ្ចេញមន្រ្តីកូរ៉េខាងត្បូងទាំងអស់ចេញពីប្រទេស៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
