កណ្ដាល៖លោកព្រុំ សំណាង អធិការប៉ូលិសស្រុកកៀនស្វាយ បានបញ្ជាកម្លាំងព្រហ្មទណ្ឌស្រុកកៀនស្វាយ បង្ក្រាបល្បែងស៊ីសងកន្ទុយលេខ និងឃាត់ខ្លួនអ្នកកត់កន្ទុយលេខម្នាក់ កាលពីល្ងាចថ្ងៃទី២៣ ខែតុលា ឆ្នាំ២០១៩ នៅចំណុចភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល ។
ពាក់ព័ន្ធករណីមហាជន បានសម្តែងការកើតសរសើរដល់សមត្ថកិច្ចថា ពិតជាពូកែមែន ចាប់បានអ្នកកត់កន្ទុយលេខតូចតាច ។ មជ្ឈដ្ឋាននានា បានបញ្ចេញមតិថា ចំណែកមេឆ្នោតកន្ទុយលេខធំ ពុំដែលឃើញចាប់សោះ សង្ស័យត្រូវថ្នាំមេឆ្នោតហើយទេដឹង។
នគរបាលស្រុកកៀនស្វាយ បានឲ្យដឹងថា ជនសង្ស័យ ឈ្មោះញឹម សាវ៉ន ភេទស្រី អាយុ ៣៧ឆ្នាំ សញ្ជាតិខ្មែរ មុខរបរកត់ឆ្នោត មានទីលំនៅភូមិអង្គរជ័យឃុំ បន្ទាយដែក ស្រុកកៀនស្វាយ ខេត្ត កណ្តាល។ វត្ថុតាងចាប់យករួមមាន៖ ម៉ូតូ១គ្រឿងម៉ាកហុងដា C125 ពណ៌ខ្មៅ សេរីឆ្នាំ២០១៦ ពាក់ផ្លាកលេខ1FL2605 ទូរស័ព្ទដៃចំនួន 2គ្រឿង ក្រដាស់កាត់តូចៗសម្រាប់កត់លេខឆ្នោតវៀតណាមរួច ចំនួន18សន្លឹក និងមិនទាន់កត់លេខឆ្នោតវៀតណាម ចំនួន២៩សន្លឹក ឆ្នោតមហាសំណាងយាយសំ យាយសយ49សន្លឹកកោសរួច (ឆ្នោតខ្មែរ) ។
ឆ្នោតមហាសំណាងយាយសំក្តីស្រម៉ៃ ចំនួន7សន្លឹក កោសរួច(ឆ្នោតខ្មែរ) ឆ្នោតមហាសំណាងឥតព្រំដែនចំនួន2សន្លឹក កោសរួច (ឆ្នោតខ្មែរ) ឆ្នោតឆ្នាំកុរនាំសំណាងចំនួន43សន្លឹក កោសរួច (ឆ្នោតខ្មែរ) ប៊ុចសរសេរចំនួន7ដើម កាស្យូ1 ក្រដាស់កាបោនទ្រាប់កត់ឆ្នោតវៀតណាមចំនួន ២សន្លឹក។ ក្រដាស់ធំកត់លេខឆ្នោតវៀតណាមរួចចំនួន 27សន្លឹក និងមិនទាន់កត់ឆ្នោតវៀតណាម ចំនួន15សន្លឹក ប្រាក់រៀលចំនួន450000រៀល ប្រាក់ដុល្លារ ចំនួន70ដុល្លារ ប្រដាប់កិបក្រដាស1 កាបូបស្ពាយមួយពណ៌ខ្មៅ។
លោកអធិការបន្តទៀតថា កម្លាំងជំនាញ បានចុះល្បាតក្នុងភូមិសាស្រ្ត ដើម្បីមើលមុខសញ្ញារហូតដល់មាន ការបង្រ្កាបបទល្មើសល្បែងស៊ីសងខុសច្បាប់ (កត់ឆ្នោត) រួចឃាត់ខ្លួនបានជនសង្ស័យ រួមទាំងវត្ថុតាងសម្រាប់កត់ឆ្នោតវៀតណាម យកមកអធិការដ្ឋាននគរបាលស្រុកកៀនស្វាយ ដើម្បីសាកសួរ។ ក្រោយពីសាកសួររួច ជនសង្ស័យបានសារភាពថា ខ្លួនពិតជាបានប្រព្រឹត្តល្បែងកត់ឆ្នោតខ្មែរ និងឆ្នោតវៀតណាម ពិតប្រាកដមែន៕ ដោយ៖កូឡាប