ខេត្តស្វាយរៀងៈ បុរសម្នាក់បានរងរបួសធ្ងន់ នៅក្នុងករណីគ្រោះថ្នាក់ចរាចរមួយ រវាងរថយន្តនិងម៉ូតូ ដែលហេតុការណ៍ខាងលើនេះ បានកើតឡើងកាលពីវេលាម៉ោង 9 និង 50 នាទីព្រឹកថ្ងៃទី 24 ខែ តុលាឆ្នាំ 2019 លើផ្លូវជាតិលេខ 13 ត្រង់ចំណុចភូមិតាណែងឃុំសង្កែ ស្រុករំដួលខេត្តស្វាយរៀង។ ករណីមានគ្រោះថ្នាក់ចរាចរ កើតឡើងរវាងរថយន្តនិងម៉ូតូ បញ្ច្រាសទិសគ្នា។
សមត្ថកិច្ចបានឱ្យដឹងថាៈ អ្នកបើកបររថយន្តឈ្មោះយក ប៊ូធី ភេទប្រុស អាយុ 50 ឆ្នាំរស់នៅភូមិស្រែថ្មី ឃុំឃ្សឹម ស្រុកស្នូល ខេត្តក្រចេះ បានបើករថយន្តពីជើងទៅត្បូង បើកឡានម៉ាកកាមរី ពណ៌សម្បកឪឡឹកពាក់ផ្លាកលេខ កណ្តាល 2A 0494 មកដល់ចំណុចកើតហេតុ បានបុកម៉ូតូមួយគ្រឿងទៀត ដែលធ្វើដំណើពីត្បូងទៅជើង ហើយបត់ឆ្វេងបណ្ដាលឲ្យដួល។ រួចហើយរថយន្តក៏បន្តដំណើទៅមុខ មកដល់ត្រង់ចំណុចផ្សារកំពង់ចក ត្រូវសមត្ថកិច្ចឃាត់មកសួរនាំតែម្តង។
ប្រភពដដែលបានបន្តថាៈ អ្នកបើកបរម៉ូតូ ឈ្មោះ មក ធឿន ភេទប្រុសអាយុ 47ឆ្នាំ រស់នៅភូមិតាជោរ ឃុំសង្កែ ស្រុករំដូល ខេត្តស្វាយរៀង រងរបូសធ្ងន់ (ពាក់មួកសុវត្ថិភាព) ជិះម៉ូតូម៉ាកហុងដា សេរី 2016 ពណ៌ខ្មៅពាក់ផ្លាកលេខភ្នំពេញ 1GA1385 ម៉ូតូខូចខាតធ្ងន់។ មូលហេតុ អ្នកបើកបរម៉ូតូបត់ឆ្វេង។ បច្ចុប្បន្ន អ្នកបើកបរម៉ូតូបានបញ្ជូនទៅមន្ទីរពេទ្យ ប្រទេសវៀតណាម។ អ្នកបើកបររថយន្ត យកមកសួរនាំនៅអធិការដ្ឋានស្រុករំដួល ដើម្បីបន្តនីតិវិធី។ មធ្យោបាយរក្សាទុកនៅអធិការដ្ឋាននគរបាលស្រុករំដួល៕ដោយ៖ វ៉ៃកូ
