ប៉ូលីសអង់គ្លេសមិនទាន់បានធ្វើការបញ្ជាក់ថាតើមនុស្ស ៣៩នាក់ដែលស្លាប់នៅក្នុងរថយន្តកុងតឺណឺ នៅក្បែរទីក្រុងឡុងជាជនជាតិចិនឬយ៉ាងណាទេ។ នេះបើតាមការបញ្ជាក់របស់ក្រសួងការបរទេសចិន នៅថ្ងៃសុក្រនេះ។
មន្រ្តីកុងស៊ុលចិន បានធ្វើដំណើរទៅកាន់តំបន់ Essex កាលពីថ្ងៃព្រហស្បតិ៍ម្សិលមិញនេះ មួយថ្ងៃក្រោយពេលកម្មករសង្រ្គោះ បានរកឃើញសាកសពចំនួន ៣៩នាក់នៅក្នុងកុងតឺណឺមួយ ដែលចតនៅក្បែរតំបន់ឧស្សាហ៍កម្ម។
ប៉ូលីសនៅអង់គ្លេសនិយាយថា “ជនរងគ្រោះទាំងអស់ត្រូវបានគេជឿជាក់ថាជនជាតិចិន”។ រថយន្តកុងតឺណឺនោះបានធ្វើដំណើរតាមកប៉ាល់ពីប្រទេសប៊ែលហ្សិចមក។
“ប៉ូលិសអង់គ្លេសនិយាយថា ពួកគេកំពុងបញ្ជាក់ពីអត្តសញ្ញាណនៃជនរងគ្រោះ ហើយពួកគេមិនទាន់អាចបញ្ជាក់បានថា តើជាជនជាតិចិនឬយ៉ាងណាទេ”។ នេះបើតាមការបញ្ជាក់របស់ក្រសួងការបរទេសចិនថ្លែងនៅក្នុងសេចក្តីប្រកាស។
មន្រ្តីកុងស៊ុលចិនឈ្មោះ Tong Xuejun បានជួបជាមួយនឹងប៉ូលីសអង់គ្លេស។
គាត់និយាយថា “ពួកយើងនឹងជំរុញឲ្យប៉ូលីសអង់គ្លេសធ្វើការស្វែងរកការពិតបន្ថែមទៀត។ ពួកយើងនឹងបន្តធ្វើការថ្លែងប្រាប់សារព័ត៌មានពីការវិវត្តន៍នៃរឿងហេតុនោះ”។
ប៉ូលីសប្រចាំតំបន់កើតហេតុ បានបញ្ជាក់ថា ជនរងគ្រោះដែលស្លាប់ មានស្រ្តី ៨នាក់ និងបុរស ៣១នាក់។ អ្នកបើករថយន្តកុងតឺណឺត្រូវបានចាប់ខ្លួនពីបទសង្ស័យមនុស្សឃាត។
សូមបញ្ជាក់ថា កាលពីឆ្នាំ ២០០០ អន្តោប្រវេសន៍ចិនចំនួន ៥៨នាក់ត្រូវបានគេលាក់ទុកក្នុងឡានដឹកទំនិញហូឡង់ នៅកំពុងផែអង់គ្លេស។ ក្នុងចំណោមជនទាំងនោះ មានតែ ២នាក់ប៉ុណ្ណោះនៅរស់រានមានជីវិត៕
អត្ថបទប្រែសម្រួលដោយ៖ សុភ័ក្រ
ប្រភព ៖ Channelnewsasia
