តំបន់ភាគខាងកើតប្រទេសជប៉ុនដែលរងគ្រោះដោយទឹកជំនន់ និងការរអិលបាក់ដីបង្កឡើងដោយព្យុះទីហ្វុង Hagibis កាលពីពេលថ្មីៗនេះ កំពុងរងការធ្លាក់ភ្លៀងយ៉ាងខ្លាំង នៅថ្ងៃសុក្រនេះ។ អាជ្ញាធរណែនាំឲ្យមានការជម្លៀសប្រជាជនរាប់ម៉ឺននាក់ចេញពីតំបន់ជុំវិញទីក្រុងតូក្យូ។
កាលពីជិត ២សប្តាហ៍មុន មនុស្សចំនួន ៨២នាក់បានស្លាប់ នៅពេលព្យុះទីហ្វុង បានបោកបក់មកលើភាគកណ្តាល និងខាងកើតប្រទេសជប៉ុន ដែលបង្កឲ្យមានភ្លៀងធ្លាក់ខ្លាំង និងខ្យល់ខ្លាំង។ មនុស្សជាច្រើននៅតែបាត់ខ្លួនរហូតមកដល់ពេលនេះ ចំណែកមនុស្សចំនួន ៣០០នាក់បានរងរបួស។
នៅថ្ងៃនេះ អាជ្ញាធរជប៉ុនបានព្រមានថា អាចនឹងមានទឹកជំនន់ និងការរអិលបាក់ដីទៀត ជាពិសេសតំបន់ដែលទើបនឹងរងការវាយប្រហារថ្មីៗ។
មានការណែនាំឲ្យជម្លៀសប្រជាជនចំនួន ៥០.០០០នាក់ចេញពីទីក្រុង Sagamihara ដែលស្ថិតនៅភាគនិរតីនៃទីក្រុងតូក្យូ ដែលទើបនឹងរងការវាយប្រហារដោយព្យុះកាលពីពេលថ្មីៗនេះ។
អាជ្ញាធរក៏ចេញការណែនាំឲ្យមានការជម្លៀសប្រជាជនចំនួន ១០.០០០នាក់ផងដែរពីតំបន់ Chiba ស្ថិតនៅភាគខាងកើតមិនឆ្ងាយប៉ុន្មានទេពីទីក្រុងតូក្យូ៕
បើតាមការព្យាករណ៍ភ្នាក់ងារឧតុនិយមរបស់ជប៉ុន បានឲ្យដឹងថា ទឹកភ្លៀងអាចមានរយៈកំពស់ពី ២០០ ទៅ ៣០០មីលីម៉ែត្រ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia