ខេត្តព្រះសីហនុ៖ ប្រធានរដ្ឋាករទឹកខេត្តព្រះសីហនុ លោក ផន រតនៈ បានឲ្យដឹងថា បន្ទាប់ពីរូបលោកទទួលបានសេចក្តីរាយការណ៍ពីប្រជាពលរដ្ឋចំនួន ១៧គ្រួសារ រស់នៅក្រុម១៣ ភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ លើកពីកង្វល់ដាច់ទឹកស្អាតប្រើប្រាស់ជាយូរថ្ងៃ បណ្តាលមកពីអាជ្ញាធរមូលដ្ឋាននេះ នាំយកគ្រឿងចក្រកាយប្រឡាយទឹកសងខាងផ្លូវ ដើម្បីរំដោះទឹក ហើយបានប៉ះបែកទុយោបណ្តាញទឹក មិនឃើញមានការដោះស្រាយអស់ជាច្រើនថ្ងៃមកនោះ។
លោក ផន រតនៈ ប្រធានរដ្ឋាករទឹកខេត្តព្រះសីហនុ បញ្ជាក់ថា នៅថ្ងៃទី២៥ ខែតុលា ឆ្នាំ២០១៩នេះរូបបានដឹកនាំក្រុមការងារចុះពិនិត្យជាក់ស្តែងដល់ទីកន្លែង ដើម្បីជួយរកដំណោះស្រាយជូនប្រជាពលរដ្ឋ ដោយមានវត្តមានលោកអភិបាលរងស្រុកស្ទឹងហាវ និងមន្ត្រីមូលដ្ឋានមួយចំនួនទៀត ក៏បានចូលរួមដែរ។
នាឱកាសនោះ លោក ផន រតនៈ បញ្ជាក់ថា ខាងរដ្ឋាករទឹកនឹងរៀបចំផ្លាស់ប្តូរទុយោទឹកថ្មី ដើម្បីឲ្យប្រជាពលរដ្ឋមានទឹកប្រើប្រាស់ឡើងវិញ។
លោកបន្តថា ចំពោះការដោះស្រាយបញ្ហាផ្សេងៗទៀត ទៅលើដើមហេតុ នាំឲ្យបែកធ្លាយទុយោទឹកខាងលើនេះ មន្ត្រីស្ថាប័នជំនាញពាក់ព័ន្ធ នឹងរួមគ្នាដោះស្រាយតាមក្រោយទៀត។
ភ្លាមៗនេះ ក្រុមប្រជាពលរដ្ឋ ដែលកំពុងខ្វះទឹកស្អាតប្រើប្រាស់ទាំង ១៧គ្រួសារ បានសាទរ និងរីករាយចំពោះដំណោះស្រាយ របស់លោកប្រធានរដ្ឋាករទឹក បានឆ្លើយតបកង្វល់ពលរដ្ឋពួកគាត់បានទាន់ពេលវេលា។
ចំណុចនេះ ប្រជាពលរដ្ឋស្រុកស្ទឹងហាវ បានចាត់ទុក សកម្មភាព របស់មន្ត្រីថ្នាក់ដឹកនាំស្ថាប័នរដ្ឋាករទឹកខេត្តព្រះសីហនុ ថាជាមន្ត្រី ដែលមានជំនាញ ចំណេះ និងមានមនសិកាល្អ ក្នុងការចុះជួយដោះស្រាយកង្វល់ និងការលំបាកជូនប្រជាពលរដ្ឋបានទាន់ពេលវេលា៕ ដោយ៖ ដែន សីមា