ភ្នំពេញ៖ ស្របពេលដែលកម្ពុជាមានគោលនយោបាយបើកចំហវិនិយោគដោយគ្មានការរើសអើង គណៈប្រតិភូវិនិយោគិនឥណ្ឌូនេស៊ីដែលមានសមាជិកចំនួន ២០រូប បានមកបំពេញទស្សនកិច្ចស្វែងយល់ពីកាលានុវត្តភាពវិនិយោគនៅកម្ពុជា។
នារសៀលថ្ងៃទី២៥ ខែតុលា ឆ្នាំ២០១៩ នៅទីស្ដីការក្រុមប្រឹក្សាអភិវឌ្ឍន៍កម្ពុជា (ក.អ.ក) លោកសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក.អ.ក បានទទួលជួបគណៈប្រតិភូវិនិយោគិនឥណ្ឌូនេស៊ីដែលមានសមាជិកចំនួន ២០រូប ដែលបានមកបំពេញទស្សនកិច្ចស្វែងយល់ពីកាលានុវត្តភាពវិនិយោគនៅកម្ពុជា ដឹកនាំដោយលោកបណ្ឌិត តាហឺរ (Tahir) បេសកជនទទួលបន្ទុកកិច្ចការវិនិយោគ និងជាអនុប្រធានសភាពាណិជ្ជកម្មឥណ្ឌូនេស៊ី និងដោយមានវត្តមានចូលរួមរបស់លោកស៊ូឌីរម៉ាន់ ហាសែង (Sudirman Haseng) ឯកអគ្គរដ្ឋទូតសាធារណរដ្ឋឥណ្ឌូណេស៊ីប្រចាំប្រទេសកម្ពុជា ផងដែរ។
លោក សុខ ចិន្តាសោភា បានស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូ និងបានរំលឹកជូនគណៈប្រតិភូអំពីទំនាក់ទំនងដែលមានលក្ខណៈមិត្តភាពជាប្រវត្តិសាស្ត្រ និងស្និទ្ធស្នាលរវាងប្រទេសកម្ពុជា និងឥណ្ឌូណេស៊ី។ ក្នុងឱកាសនោះលោករដ្ឋមន្ត្រីប្រតិភូអមនាយករដ្ឋមន្ត្រីក៏បានជម្រាបជូនគណៈប្រតិភូអំពីការវិវត្តសំខាន់ៗនៅកម្ពុជាពាក់ព័ន្ធនឹងកាលានុវត្តភាពវិនិយោគ ក៏ដូចជាការដាក់ចេញនូវវិធានការថ្មីៗរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សំដៅធ្វើឱ្យកាន់តែប្រសើរឡើងនូវបរិយាកាសធុរកិច្ច និងវិនិយោគនៅកម្ពុជា។
តបទៅនឹងចំណាប់អារម្មណ៍របស់អ្នកវិនិយោគឥណ្ឌូនេស៊ីលើវិស័យអចលនទ្រព្យ និងសេវាមន្ទីរពេទ្យ លោកសុខ ចិន្តាសោភា បានស្វាគមន៍ការបណ្តាក់ទុននៅក្នុងវិស័យទាំងពីរនេះ ដោយកម្ពុជាមានគោលនយោបាយបើកចំហវិនិយោគដោយគ្មានការរើសអើង ហើយវិស័យទាំងពីរនេះទៀតសោតជាវិស័យដែលមានសក្តានុពលខ្លាំងនៅកម្ពុជា៕ ដោយ៖កូឡាប