មនុស្សយ៉ាងតិចចំនួន ៦នាក់ក្នុងចំណោម ៣៩នាក់ដែលត្រូវគេរកឃើញសាកសព នៅក្នុងរថយន្តកុងតឺណឺមួយនៅតំបន់ Essex ប្រទេសអង់គ្លេស ប្រហែលជាមកពីប្រទេសវៀតណាម។
សារព័ត៌មាន BBC បានសាកសួរគ្រួសារវៀតណាមចំនួន ៦ ដែលបានសម្តែងការភ័យខ្លាចថា មានសមាជិករបស់ពួកគេ ស្ថិតក្នុងចំណោមអ្នកស្លាប់ទាំង ៣៩នាក់នោះ។
ក្នុងចំណោមនោះ មានស្រ្តីម្នាក់ឈ្មោះ Pham Thi Tr My អាយុ ២៦ឆ្នាំ។ នាងមិនត្រូវបានគេទទួលដំណឹងចាប់តាំងពីនាងបានផ្ញើសារកាលពីថ្ងៃអង្គារទៅគ្រួសារ ដោយក្នុងសារនោះនាងបញ្ជាក់ថា នាងមិនអាចដកដង្ហើមបានទេ។
ជុំវិញហេតុការស្លាប់មនុស្ស ៣៩នាក់នៅក្នុងកុងតឺណឺ មនុស្សចំនួន ៤នាក់ត្រូវបានចាប់ខ្លួនពីបទមនុស្សឃាតដោយចេតនា និងរួមផ្សំគំនិតជួញដូរមនុស្ស។
បងប្រុសរបស់ Pham Thi Tr My ប្រាប់ BBC ថា “ប្អូនស្រីរបស់ខ្ញុំបានបាត់ខ្លួនចាប់តាំងពីថ្ងៃទី ២៣ កំពុងពេលធ្វើដំណើរពីវៀតណាម ទៅកាន់អង់គ្លេស ហើយពួកយើងមិនអាចទាក់ទងនាងបានសោះ។ ពួកយើងព្រួយបារម្ភថា នាងប្រហែលជាស្ថិតក្នុងចំណោមមនុស្សដែលស្លាប់ក្នុងទូកុងតឺណឺនោះ”។
“ពួកយើងបានស្នើឲ្យប៉ូលីសអង់គ្លេសធ្វើការស៊ើបអង្កេត ដូច្នេះប្អូនស្រីរបស់ខ្ញុំអាចត្រឡប់មករកគ្រួសារវិញ”។
សារដែលគ្រួសាររបស់នាងទទួលបានគឺនៅថ្ងៃអង្គារ ២ម៉ោងមុនពេលរថយន្តកុងតឺណឺបានធ្វើដំណើរពីតំបន់ Zeebrugge ទៅដល់ស្ថានីយ៍ Purfleet ក្នុងប្រទេសប៊ែលហ្សិច។
សារដែលនាងបានផ្ញើសារទៅកាន់គ្រួសារលើកចុងក្រោយមានអត្ថន័យដូច្នេះថា “ខ្ញុំពិតជាសុំទោសផង ម៉ាក់ និងប៉ា។ ដំណើររបស់ខ្ញុំទៅកាន់ទឹកដីបរទេសបានបរាជ័យហើយ”។
“ខ្ញុំជិតស្លាប់ហើយ។ ខ្ញុំមិនអាចដកដង្ហើមបានទេ។ ខ្ញុំស្រឡាញ់ម៉ាក់ និងប៉ាណាស់។ ខ្ញុំសុំទោសម៉ាក់”។
សូមបញ្ជាក់ថា កាលពីពេល ២ថ្ងៃកន្លងទៅនេះ ប៉ូលីសអង់គ្លេសបានរកឃើញសាកសពចំនួន ៣៩នាក់នៅក្នុងរថយន្តកុងតឺណឺមួយដែលធ្វើដំណើរមកពីប៊ែលហ្សិច។ អាជ្ញាធរអង់គ្លេសបញ្ជាក់ថា ជនទាំងនោះប្រហែលជាជនជាតិចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC