ភ្នំពេញ៖ ដោយសារគំនុំពាក្យសម្តីជាង ១០ឆ្នាំហើយ ប្អូនថ្លៃ បានទាញកាំភ្លើង បាញ់សម្លាប់បងថ្លៃខ្លួនឯងចំនួន៣គ្រាប់ វេលាម៉ោងជិត១១ ថ្ងៃទី២៦ ខែតុលា ឆ្នាំ២០១៩នេះ នៅជិតភ្លើងស្តុបណូគៀរ ខណ្ឌទួលគោក។
មន្រ្តីនគរបាលមូលដ្ឋាន បានបញ្ជាក់ថា ឃាតកម្មនេះកើតឡើងរវាងបងប្អូនថ្លៃ តែជនដៃដល់ បានចូលសារភាព នៅប៉ុស្តិ៍នគរបាលរដ្ឋបាលទឹកល្អក់៣ហើយ។
មន្រ្តីនគរបាលមូលដ្ឋានបានបញ្ជាក់ប្រាប់ នៅពេលដែលជនសង្ស័យជាឃាតកបានចូលសារភាពថា ជននេះឈ្មោះ មាស ណារ៉ា អាយុ៤០ឆ្នាំ ជាសន្តិសុខ ចំណែកជនរងគ្រោះឈ្មោះ ជួប រតនា ស្នាក់នៅផ្ទះកើតហេតុខាងលើ ជាគ្រូបង្រៀននៅវិទ្យាល័យពងទឹក ។
ប្រភពព័ត៌មាននៅទីតាំងដែនសមត្ថកិច្ច ជននេះបានឆ្លើយប្រាប់ពីមូលហេតុថា ដោយសារខឹង ធ្វើអ្វីចេះតែខុស និងមានគំនុំគុំគួននឹងបងថ្លៃជាយូរឆ្នាំមកហើយ ជាមួយនឹងការទទួលសម្ពាធពីគ្រួសារផងនោះ ទើបខ្លួនសម្រេចចិត្តបាញ់សម្លាញ់ដោយប្រើដកកាំភ្លើង ។
នៅមុនពេលកើតមាន ទំនាស់រហូតដកកាំភ្លើងបាញ់នេះ គឺក្នុងពេលដែលជនរងគ្រោះ បានមកមើលម្តាយឈឺ នៅក្នុងផ្ទះកើតហេតុ ។ ពេលនោះ បានជួបជាមួយជនដៃដល់ជាប្អូនថ្លៃ បានមកនិយាយជាមួយ និងបង្ខំឱ្យជនរងគ្រោះផឹកស្រាបៀរ១កំប៉ុង តែត្រូវជនរងគ្រោះបានប្រកែកអត់ព្រមផឹក ក៏បង្កទៅជាជម្លោះខ្លាំងឡើងៗ ខណៈជនដៃដល់មានគំនុំជាមួយជនរងគ្រោះ១០ឆ្នាំផង ទប់លែងជាប់ដកកាំភ្លើងបាញ់ប្រហារបងថ្លៃ ។ យោងចម្លើយអះអាងជនដៃដល់ថា ខ្លួនបានទិញកាំភ្លើងនេះ ទុកជាយូរមកហើយ ។
ជនដៃដល់ បាននិយាយសារភាពថា “ខ្ញុំបាញ់៣ ទៅ៤គ្រាប់ ត្រូវ៣គ្រាប់។ គំនុំជាង ១០ឆ្នាំហើយ គំនុំពាក្យសម្តី ធ្វើអីក៏ខុស និងមានសម្ពាធខាងគ្រួសារខ្លាំង។ ខ្ញុំហៅគាត់ហូបស្រាបៀរ មួយកំប៉ុងទៅ ហើយខ្ញុំថាខ្ញុំលើកលែងឲ្យគាត់។ គាត់នៅតែនិយាយពាក្យមិនល្អ ចំពោះខ្ញុំទៀត ខ្ញុំក៏បាញ់សម្លាប់គាត់ចោលទៅ៕ដោយ៖កូឡាប