ខេត្តស្វាយរៀង ៖ លោកជំទាវកិត្តិសង្គហបណ្ឌិត ម៉ែន សំអន រដ្ឋមន្ដ្រីក្រសួងទំនាក់ទំនងជាមួយរដ្ឋសភាព្រឹទ្ធសភា និង អធិការកិច្ច និងជាប្រធានក្រុមការងារគណបក្សប្រជាជនកម្ពុជាចុះជួយខេត្តស្វាយរៀងនាព្រឹកថ្ងៃអាទិត្យ១៤រោច ខែអស្សុច ឆ្នាកុរ ឯកស័ក ព.ស២៥៦៣ ត្រូវនឹងថ្ងៃទី ២៧ខែតុលា ឆ្នាំ ២០១៩នេះ បានអញ្ជើញជាអធិបតី បើកពិធីប្រណាំងទូកប្រពៃណីខ្នាតអន្តរជាតិ និងទូកក្តារបីសន្លឹក ឆ្នាំ ២០១៩ នៅទន្លេវ៉ៃគោ (ទំនប់តាណេង) ក្រុងស្វាយរៀង ខេត្តស្វាយរៀង។
ពិធីនេះក៏មានការអញ្ជើញចូលរួមពីសំណាក់ អស់លោក លោកស្រី សមាជិកព្រឹទ្ធសភា រដ្ឋសភា ទេសរដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការ ក្រសួង ស្ថាប័នរាជរដ្ឋាភិបាល អស់ លោក លោកស្រី ក្រុមការងារថ្នាក់ជាតិចុះមូលដ្ឋាន នៅខេត្តស្វាយរៀង ឯកឧត្ដម លោកជំទាវ លោក លោកស្រី គណៈប្រតិភូយោធភូមិភាគទី៧កងពលលេខ ៥ កងទ័ពប្រជាជនវៀតណាម និងគណៈប្រតិភូខេត្តឡុងអានខេត្តតៃនីញ លោកប្រធានក្រុមប្រឹក្សាខេត្ត លោកអភិបាលខេត្ត លោក លោកស្រីសមាជិក សមាជិកាក្រុមប្រឹក្សាខេត្ត អភិបាលរងខេត្ត លោកឧកញ៉ា អ្នកឧកញ៉ា លោក លោកស្រី ភ្ញៀវកិត្តិយសបងប្អូនកីឡាករ កីឡាការិនីប្រណាំងទូកនឹងបងប្អូនប្រជាពលរដ្ឋចូលរួមយ៉ាងច្រើនកុះករ។
លោក ម៉ែន វិបុល អភិបាលខេត្តស្វាយរៀង បានថ្លែងថា នៅឆ្នាំនេះមិនខុសពីបណ្ដាឆ្នាំកន្លងទៅ នោះទេ ហើយក្នុងឆ្នាំ២០១៩នេះ ពិធីប្រណាំងទូកនៅខេត្តស្វាយរៀង មានការចូលរួមពីប្រតិភូ និងកីឡាករ កីឡាការិនីមកពីគ្រប់បណ្ដារាជធានីខេត្តនៅទូទាំងប្រទេស ដោយមានទូកមកចូលរួមប្រណាំងសរុប ចំនួន៥៤គ្រឿងមានកីឡាករ សរុបចំនួន ១.២៨៣នាក់ (នារី ០៩នាក់) ក្នុងនោះ កីឡាករពេញសិទ្ធិ ៩៩៦នាក់ និងកីឡាករបម្រុង ២៨៧នាក់ និង មានប្រតិភូដឹកនាំទូក ២១២នាក់ រួមមាន ៖ប្រភេទទូកប្រពៃណីខ្នាតអន្តរជាតិ ចំណុះ២២នាក់ មាន ៤៤គ្រឿង រួមមានទូកនៅក្នុងខេត្តស្វាយរៀង ១៤គ្រឿង ទូករបស់កងរាជអាវុធហត្ថលើផ្ទៃប្រទេស និងកងរាជអាវុធហត្ថ រាជធានី-ខេត្ត ២៦គ្រឿង ទូកខេត្តព្រៃវែង ១គ្រឿង ទូកខេត្តកណ្ដាល១គ្រឿង ទូករបស់កងពលតូចថ្មើរជើងលេខ ៥១ ខេត្តបន្ទាយមានជ័យ១គ្រឿង និងទូករបស់រដ្ឋបាល ខេត្តព្រះវិហារ ១គ្រឿង។ ប្រភេទទូកក្ដារបីសន្លឹក ចំណុះ៣នាក់ មានចំនួន ១០គ្រឿង ក្នុងនោះ ប្រភេទទូកបុរស ៨គ្រឿង និងប្រភេទទូកនារី ២គ្រឿង រួមមាន ទូកក្នុងខេត្ត៤គ្រឿង ទូករបស់កងរាជអាវុធហត្ថ ខេត្តកណ្ដាល ១គ្រឿង ទូករបស់សមាគមទូកខេត្តកណ្ដាល ២គ្រឿង ទូកខេត្តបន្ទាយមានជ័យ ១គ្រឿង និងទូករបស់វត្តស្លាកែត ខេត្តកណ្ដាល ២គ្រឿង ។
លោកអភិបាលខេត្តបានបញ្ជាក់ថា តាងនាមគណៈកម្មការរៀបចំពិធីប្រណាំងទូក ឆ្នាំ២០១៩ នៅខេត្តស្វាយរៀង មានជំនឿជាក់យ៉ាងមុតមាំថា ក្រោមការសហការជួយរៀបចំលើការងារបច្ចេកទេសពីមន្ទីរអប់រំ យុវជន និងកីឡាខេត្តនឹងធ្វើឲ្យពិធីប្រណាំងទូកនៅខេត្តស្វាយរៀងយើងឆ្នាំនេះ ប្រព្រឹត្តទៅបានដោយរលូន ត្រឹមត្រូវតាមលក្ខណៈបច្ចេកទេស និងមានភាពសុក្រឹត្យ យុត្តិធម៌ សម្រាប់កីឡាករ កីឡាការិនីទូកទាំងអស់ និងសូមស្នើដល់គណៈកម្មការគ្រប់គ្រងទូក និងកីឡាករ កីឡាការិនី សូមខិតខំប្រឹងប្រែងយកអស់កម្លាំងកាយចិត្តបញ្ចេញឲ្យអស់លទ្ធភាពដោយឈរលើស្មារតីមិត្តភាព ភាតរភាព និងសាមគ្គីភាព ដើម្បីទទួលបានលទ្ធផលឈ្នះ-ឈ្នះទាំងអស់គ្នា ៕ វ៉ៃកូ