មេដឹកនាំក្រុមរដ្ឋអ៊ីស្លាម (IS) បានធ្វើអត្តឃាតខ្លួនឯង ក្នុងអំឡុងពេលប្រតិបត្តិការវាយឆ្មក់របស់យោធាអាមេរិច នៅក្នុងប្រទេសស៊ីរី។ នេះបើតាមការបញ្ជាក់របស់ប្រធានាធិបតីអាមេរិច ដូណាល់ ត្រាំ។
ថ្លែងនៅសេតវិមាន លោកត្រាំ បាននិយាយថា Abu Bakr al-Baghdadi បានបំផ្ទុះសម្លាប់ខ្លួនឯង ក្រោយពេលរត់ចូលក្នុងរូង និងត្រូវតាមប្រមាញ់ដោយឆ្កែយោធាអាមេរិច។
Abu Bakr al-Baghdadi បានលេចធ្លោខ្លាំងកាលពីឆ្នាំ ២០១៤ នៅពេលមេដឹកនាំរូបនោះបានប្រកាសបង្កើតរដ្ឋអ៊ីស្លាម ដែលដឹកនាំដោយកាលីហ្វ នៅតំបន់មួយចំនួន ក្នុងប្រទេសអ៊ីរ៉ាក់ និងស៊ីរី។
ក្រុមរដ្ឋអ៊ីស្លាមនោះបានធ្វើអំពើឃោរឃៅជាច្រើន ដែលបណ្តាលឲ្យស្លាប់មនុស្សរាប់ពាន់នាក់។
ការស្លាប់របស់មេដឹកនាំក្រុមអ៊ីស្លាមរូបនោះ គឺជាជោគជ័យដ៏ធំសម្រាប់លោក ត្រាំ ខណៈដែលគាត់កំពុង រងការរិះគន់ដូចរងទឹកភ្លៀង ជុំវិញការសម្រេចិត្តដកទ័ពចេញពីប្រទេសស៊ីរី។
នៅក្នុងសេចក្តីប្រកាសកាលពីព្រឹកថ្ងៃអាទិត្យម្សិលមិញនេះ លោកត្រាំ បានរៀបរាប់លំអិតពីប្រតិបត្តិការ ពេលរាត្រីរបស់ទ័ពអាមេរិចនៅស៊ីរី។ លោកបានលើកឡើងថា Abu Bakr al-Baghdadi បានរត់ចូលក្នុងរូងមរណៈ ដោយយំខ្លាំង ខណៈកំពុងត្រូវតាមប្រមាញ់ដោយឆ្កែយោធាអាមេរិច។
Abu Bakr al-Baghdadi បានផ្តាច់ជិវិតរបស់ខ្លួន ព្រមទាំងកូន ៣នាក់ដោយចុចបំផ្ទុះអាវអត្តឃាតខ្លួនឯង ធ្វើឲ្យរូងបានបាក់រលំ។ ពុំមានយោធាអាមេរិចណាម្នាក់ បានស្លាប់នោះទេ ប៉ុន្តែឆ្កែយោធាមួយក្បាលបានរងរបួសធ្ងន់ ក្នុងហេតុការណ៍បំផ្ទុះគ្រាប់បែកអត្តឃាតនោះ។ នេះជាការបញ្ជាក់របស់លោកត្រាំ។
លោកត្រាំ ថ្លែងទៀតថា គ្រឿងផ្ទុះនោះធ្វើឲ្យខ្លួនប្រាណរបស់មេដឹកនាំក្រុមអ៊ីស្លាមនោះបែកខ្ទេចខ្ទី ប៉ុន្តែបើតាមការពិនិត្យ DNA វាបញ្ជាក់ថាជា Abu Bakr al-Baghdadi។
កងកម្លាំងពិសេសរបស់អាមេរិច បានចំណាយពេល ២ម៉ោងនៅក្នុងតំបន់ប្រតិបត្តិការ និងបានប្រមូលវត្ថុងាយនឹងផ្ទុះ។
លោកត្រាំថ្លែងថា “ជនឧក្រិដ្ឋដែលព្យាយាមបំភ័យ និងគំរាមកំហែងអ្នកដទៃបានចំណាយចុងក្រោយរបស់ខ្លួន នៅក្នុងស្ថានភាពភ័យខ្លាច និងតក់ស្លុក ហើយត្រូវបង្រ្កាបដោយកងកម្លាំងដ៏ក្លាហ៊ានរបស់អាមេរិច”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
