ភ្នំពេញ៖ បន្ទាប់ពីក្រុមហ៊ុនហ្វេសប៊ុកបិទហ្វេសប៊ុកនិងផេកហ្វេសប៊ុករបស់ខៀវកាញារីទ្ធ រដ្ឋមន្ត្រីក្រសួងព័ត៌មានរយៈពេល២ថ្ងៃមកនោះ លោករដ្ឋមន្ត្រីក្រសួងព័ត៌មាន បានអះអាងថា នឹងធ្វើសំណើមួយ ទៅក្រុមហ៊ុនហ្វេសប៊ុក ដើម្បីលុបចោលគណនីទាំងឡាយណាដែលប្រើឈ្មោះលោក មិនបានត្រឹមត្រូវចេញពី បណ្តាញសង្គមហ្វេសប៊ុកទាំងអស់។
លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងអំណរគុណចំពោះក្រុមហ៊ុនហ្វេសប៊ុកដែលបានជួយបើកហ្វេសប៊ុករបស់លោកឱ្យដំណើរការជាប្រក្រតីដូចដើមឡើងវិញ បន្ទាប់ពីជនអនាមិកបាន Unblock មិនឱ្យបង្ហោះរូបភាព ឬព័ត៌មានផ្សេងៗបាន រយៈពេល២ថ្ងៃ កន្លងទៅនេះ។
ក្នុងជំនួបជាមួយអ្នកកាសែតនៅព្រឹកថ្ងៃចន្ទ ទី២៨ ខែតុលា ឆ្នាំ២០១៩នៅទីស្ដីការក្រសួងព័ត៌មាន លោក ខៀវ កាញារីទ្ធ បានមានប្រសាសន៍ថា ជនអនាមិកបានប្លុកហ្វេសប៊ុករបស់លោកចាប់តាំងពីថ្ងៃសុក្រទី២៥ ខែតុលាមកម្លេះ នៅពេលដែលហ្វេសប៊ុករបស់លោកបានផ្សព្វផ្សាយការពិតពីរឿងព្រំដែនឆ្លើយតបទៅនឹងក្រុមប្រឆាំងមួយចំនួន បានបំភ្លៃការពិតពាក់ព័ន្ធរឿងព្រំដែនថា ដីខ្មែររួញតូចជាងមុន ដីខ្មែរបាត់បង់អស់ខ្លះហើយជាដើម។ លោករដ្ឋមន្ត្រី បានគូសបញ្ជាក់ថា នៅពេលហ្វេសប៊ុកប្រើប្រាស់រាល់ថ្ងៃត្រូវបានគេប្លុកធ្វើឱ្យប្រើលែងកើតលោកអាចនឹងបង្កើតហ្វេសប៊ុកថ្មីក៏បាន ប៉ុន្តែលោកមិនធ្វើឡើយ ដោយចង់ទុកបញ្ហានេះឱ្យក្រុមហ៊ុនហ្វេសប៊ុកទទួលខុសត្រូវ។
លោកបានបន្តថា គិតមកដល់ថ្ងៃទី២៨ ខែតុលានេះ គណនីហ្វេសប៊ុករបស់លោកមន្ត្រី ដែលមានឈ្មោះថា Kanharith Khieu ត្រូវបានក្រុមហ៊ុនហ្វេសប៊ុកដោះស្រាយ និងបានដំណើរការឡើងវិញ ហើយលោក ខៀវ កាញារីទ្ធ ក៏បានថ្លែងអំណរគុណចំពោះក្រុមហ៊ុនហ្វេសប៊ុក ដែលបានសហការដោះស្រាយបានយ៉ាងល្អ។ លោករដ្ឋមន្រ្ដីបានលើកឡើងថា កិច្ចការបន្ទាប់ក្រុមការងារលោករដ្ឋមន្ត្រី នឹងធ្វើសំណើមួយទៀតទៅក្រុមហ៊ុនហ្វេសប៊ុក ដើម្បីលុបចោលគណនីទាំងឡាយណាដែលប្រើឈ្មោះលោកមិនបានត្រឹមត្រូវចេញពី បណ្តាញសង្គមហ្វេសប៊ុកទាំងអស់។
លោករដ្ឋមន្ត្រីបានបន្តថា បច្ចុប្បន្ន លោកប្រើប្រាស់តែគណនីហ្វេសប៊ុកពីរប៉ុណ្ណោះគឺ Kanharith Khieu និងផេកឈ្មោះ Kanharith ដែលមន្ត្រី និងប្រជាពលរដ្ឋ អាចទទួលបានព័ត៌មានពិត ពីព្រឹត្តិការណ៍ជាតិ និងអន្តរជាតិ តាមរយៈគណនីទាំងពីរនេះ៕ដោយ៖បញ្ញាស័ក្តិ
