ភ្នំពេញ៖ បើតាមការផ្សព្វផ្សាយព័ត៌មានលើគេហទំព័រ ក្រសួងការពារជាតិ កាលពីថ្ងៃទី២៨ខែតុលា បានឲ្យដឹងថា លោក ឧត្តមសេនីយ៍ទោ ស សំបូរធន នាយសេនាធិការកងរាជអាវុធហត្ថលើផ្ទៃប្រទេស តំណាងដ៏ខ្ពង់ខ្ពស់ឯកឧត្ត មេបញ្ជាការកងរាជអាវុធហត្ថលើផ្ទៃប្រទេស បានអញ្ជើញជាអធិបតីភាព ក្នុងពិធីផ្សព្វផ្សាយខ្លឹមសារជំនួយស្មារតីសម្រាប់វេទិការសាធារណៈ ស្តីពីសភាពការណ៍ថ្មីៗ ឧបាយកលសកម្មភាពពួកឧទ្ទាម និងការងារអប់រំចិត្តសាស្រ្ត ដល់នាយទាហាន នាយទាហានរង នៃកងរាជអាវុធហត្ថ តាមបទបញ្ជា និងគោលការណ៍ណែនាំរបស់ លោក មេបញ្ជាការកងរាជអាវុធហត្ថលើផ្ទៃប្រទេស ដោយមានការចូលរួមពីសំណាក់លោកឧត្តមសេនីយ៍ នាយរងសេនាធិការដ្ឋាន, ស្នងការរង និងនាយក នាយករង វិទ្យាស្ថានកងរាជអាវុធហត្ថ, យោធាចារ្យ, នាយការិយាល័យ, សិក្ខាកាមវគ្គបណ្តុះបណ្តាលបញ្ជាការសេនាធិការ និងសិក្ខាកាមវគ្គបណ្តុះបណ្តាលមន្ត្រីនគរបាលយុត្តិធ៌មជំនាន់ទី២២ ព្រមទាំងនាយទាហាន នាយទាហានរង កងអន្តរាគមន៍ពិសេសកងរាជអាវុធហត្ថជាច្រើនរូបទៀត កាលពីថ្ងៃទី២៥ ខែតុលា ឆ្នាំ២០១៩ នៅវិទ្យាស្ថានកងរាជអាវុធហត្ថកំបូល ។
ក្នុងពិធីផ្សព្វផ្សាយនោះលោក ឧត្តមសេនីយ៍ទោ ស សំបូរធន បានលើកឡើងអំពីឧបាយកលពួកឧទ្ទាមក្បត់ជាតិ សមវង្សី ដែលមានគោលបំណងប៉ុនប៉ងបំផ្លាញសន្តិភាព និងចង់ផ្តួលរំលំរាជរដ្ឋាភិបាលស្របច្បាប់។
លោកក៏បានលើកឡើងអំពីការពង្រឹងគោលជំហរសតិអារម្មណ៏ ដល់នាយទាហាន និងនាយទាហានរង នៃកងរាជអាវុធហត្ថគ្រប់រូប ដើម្បីអោយក្ដាប់ជាប់នូវការវិវត្តន៍ នៃសភាពការណ៏ថ្មីៗ និងបញ្ហាសន្ដិសុខនៅក្នុងប្រទេសកម្ពុជា ដើម្បីឱ្យនាយទាហាន ពលទាហាន នៃកងរាជអាវុធហត្ថទាំងអស់យល់នូវតួនាទីភារកិច្ច និងបេសកម្មក្នុងការបម្រើជាតិមាតុភូមិ និងប្រជាពលរដ្ឋប្រកបដោយមនសិការស្នេហាជាតិ និងការពារអោយបានដាច់ខាត រដ្ឋធម្មនុញ្ញ ជាតិសាសនា ព្រះមហាក្សត្រ និងរាជរដ្ឋាភិបាល ក្រោមការដឹកនាំរបស់ សម្តេចតេជោ ហ៊ុន សែន ជានាយករដ្ឋមន្ត្រី។ ជាចុងក្រោយឧត្តមសេនីយ៍បានផ្តាំផ្ញើ និងរំលឹកដល់នាយទាហាន នាយទាហានរង នៃកងរាជអាវុធហត្ថទាំងអស់ ឱ្យយល់អំពីកិច្ចការងាររបស់ខ្លួន ដែលត្រូវទទួលខុសត្រូវ ពិសេសអំពីព្រឹត្តិការណ៏ថ្មីៗ និងអនុវត្តន៍ឱ្យបានម៉ឺងម៉ាតបំផុត នូវបទបញ្ជារបស់រាជរដ្ឋាភិបាល ព្រមទាំងការពារឱ្យបានរដ្ឋាភិបាលស្របច្បាប់ មិនឱ្យពួកឧទ្ទាមក្បត់ជាតិ បំផ្លាញសន្តិភាព និងផ្តួលរំលំរាជរដ្ឋាភិបាលកម្ពុជាយើងបានជាដាច់ខាត ៕ដោយ៖បញ្ញាស័ក្តិ
