ភ្នំពេញ៖ ក្នុងសវនាការនៅតុលាការកំពូល កាលព្រឹកថ្ងៃទី២៨ខែតុលាឆ្នាំ២០១៩ ចៅក្រមជំនុំជម្រះនៃតុលាការកំពូល បានប្រកាសរក្សាការសម្រេចរបស់សាលាឧទ្ធរណ៍ទុកជាបានការ ដោយមិនអនុញ្ញាតឱ្យលោក រ៉ាត់ រ័ត្នមុន្នី បាននៅក្រៅឃុំជាបណ្ដោះអាសន្នតាមការស្នើសុំរបស់ចុងចោទនោះឡើយ។
មេធាវីការពារក្ដីឱ្យលោក រ័ត្នមុន្នី លោក សំ ទិត្យសីហា មានប្រសាសន៍ថា វាគឺជាប្រការគួរឱ្យសោកស្ដាយចំពោះកូនក្ដីលោកនិងក្រុមគ្រួសារ ហើយថា នឹងស្នើកាន់សាលាឧទ្ធរណ៍ដើម្បីពន្លឿនសវនាការអង្គសេចក្ដីឱ្យបានឆាប់។ លោក សំ ទិត្យសីហា មានប្រសាសន៍ថា វាពិតជាលំបាកសម្រាប់កូនក្ដីខ្ញុំ ខ្ញុំពិតជាសោកស្តាយណាស់ដែលតុលាការសម្រេចបែបនេះក្នុងនាមជាមេធាវីខ្ញុំនឹងខិតខំបន្តទៀតដើម្បីរកយុត្តិធម៌ឱ្យកូនក្ដីខ្ញុំ។
សូមបញ្ជាក់ថា លោក រ៉ាត់ រ័ត្នមុនី បានជាប់ពន្ធនាគារអស់ជាង៨ខែមកហើយ។
អ្នកស្រី ឡុង គីមហ៊ាង ភរិយារបស់លោក រ៉ាត់ រ័ត្នមុនី បានថ្លែងថា ការសម្រេចនេះពិតជាអយុត្តិធម៌ចំពោះប្ដីគាត់ណាស់។ អ្នកស្រីថា ពលរដ្ឋខែ្មរយើងជាច្រើន ពេលនេះ ក៏កំពុងព្រាត់ប្រាស់គ្រួសារ សាច់ញាតិ និងកំពុងរងភាពអយុត្តិធម៌ដូចពួកយើង ដោយសារតែតុលាការកម្ពុជា។
គួររំលឹងផងដែរថា លោក រ៉ាត់ រត្នមុនី ត្រូវបានសាលាដំបូងរាជធានីភ្នំពេញសម្រេចផ្ដន្ទាទោសកាលពីថ្ងៃទី២៦ ខែមិថុនា ឆ្នាំ២០១៩ ឱ្យជាប់ពន្ធនាគារ ២ឆ្នាំ ក្រោមបទចោទថា បាន ញុះញង់ឱ្យមានការរើសអើង។ លោកត្រូវបានចាប់ខ្លួនដោយប៉ូលីសថៃនៅក្នុងទីក្រុងបាងកកកាលពីថ្ងៃទី៧ ខែធ្នូ ឆ្នាំ២០១៨ ខណៈលោកព្យាយាមសុំសិទ្ធិជ្រកកោននៅឯការិយាល័យសុំទិដ្ឋាការទៅប្រទេសហូឡង់នៅប្រទេសថៃ។ ក្រុមគ្រួសាររបស់លោក បានសុំអន្តរាគមន៍ជាច្រើនដងច្រើនសារទៅកាន់ស្ថានទូតរុស្ស៊ីប្រចាំនៅកម្ពុជា ប៉ុន្តែមិនមានការឆ្លើយតប៕ ដោយ៖បញ្ញាស័ក្តិ