ភ្នំពេញ៖ លោកទេសរដ្ឋមន្ត្រីឱម យ៉ិនទៀង បានរំលេចឡើងក្នុងរបាយការណ៍ខែតុលានេះ ពាក់ព័ន្ធអំពីការចោទប្រកាន់ឧត្តមសេនីយ៍ បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ, ករណីចោទប្រកាន់កងរាជអាវុធហត្ថខេត្តកំពង់ឆ្នាំងថាបានយកលុយពីម្ចាស់ឡានដែលត្រូវបានឃាត់ទុក, ករណីបណ្តាញសង្គមផ្សព្វផ្សាយទាំឱ្យជឿជាក់ថា ឧត្តមសេនីយ៍ឯក ប៊ុត សុភាពនាយកសាលានាយទាហានសកម្មត្មាតពង ពុករលួយ ដោយការពារអ្នកទំនាស់ដីធ្លីនៅខេត្តកំពង់ឆ្នាំង និងករណីនាយកវិទ្យាល័យ ហ៊ុន សែន ចាក់អង្រៃ ដែលបានទារប្រាក់ ៣០ ដុល្លារពេលសិស្សមកចុះឈ្មោះចូលរៀន។
សេចក្តីជូនដំណឹង ស្តីពី កិច្ចប្រជុំលើកទី៥១ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) នៅថ្ងៃចន្ទ ទី២៨ ខែតុលា ឆ្នាំ២០១៩ ក្រោមអធិបតីភាព លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ។
យោងតាមរបាយការណ៍របស់ឯកឧត្តមទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ និងលោកស្រី អ៊ូ ស៊ីថា ប្រធាននាយកដ្ឋានអប់រំ បង្ការ និងទប់ស្កាត់ នៃអង្គភាពប្រឆាំងអំពើពុករលួយ អំពីសកម្មភាពការងាររបស់អង្គភាពប្រឆាំងអំពើពុករលួយ ក្នុងអំឡុងខែតុលា ឆ្នាំ២០១៩ គឺការប្រកាសទ្រព្យសម្បត្តិ និងបំណុលតាមរបប ២ឆ្នាំ (២០១៨-២០១៩) មានចំនួន២២៦៥៤នាក់ ក្នុងនោះនៅខ្វះ ១៩នាក់ មិនទាន់បានធ្វើការប្រកាសទ្រព្យសម្បត្តិនិងបំណុលគឺ៥នាក់ ជាប់បេសកកម្មនៅក្រៅប្រទេស មិនទាន់ត្រលប់មកវិញ។ ៣នាក់ មានជំងឺនៅមន្ទីរពេទ្យ ដែលមិនអាចធ្វើការប្រកាសបាន។ ១១នាក់ បាត់ដំណឹង- អង្គភាពប្រឆាំងអំពើពុករលួយ មិនអាចទំនាក់ទំនងបាន។ ការប្រកាសទ្រព្យសម្បត្តិ និងបំណុលក្នុងខែនេះ គឺ៥នាក់ តាមរបបប្រកាស២ឆ្នាំ (២០១៨-២០១៩)។ ១០៥នាក់ ប្រកាសលើកទី១ ព្រោះទើបទទួលបានការតែងតាំងថ្មី។ ១៦នាក់ ប្រកាសទ្រព្យសម្បត្តិ និងបំណុលជាលើកចុងក្រោយ បន្ទាប់ពីលាឈប់ពីការងារ -ចប់អាណត្តិ – ត្រូវបញ្ឈប់ពីការងារ។
នាយកដ្ឋានប្រកាសទ្រព្យសម្បត្តិ និងបំណុល បានចាប់ផ្តើមផ្សព្វផ្សាយប្រតិទិនសម្រាប់ការប្រកាសទ្រព្យសម្បត្តិ និងបំណុល តាមរបប២ឆ្នាំថ្មី (២០១៨-២០២០) ។
ពាក្យប្តឹងក្នុងខែមាន ៦៥ពាក្យប្តឹង (អនាមិក ២៣ពាក្យ) មានពាក្យប្តឹង ២៤ ដែលអង្គភាពប្រឆាំងអំពើពុករលួយឆ្លើយតបទៅម្ចាស់បណ្ដឹងថា មិនស្ថិតនៅក្នុងសមត្តកិច្ចអង្គភាពប្រឆាំងអំពើពុករលួយទេ ឬមិនមាន
តយអំពីអំពើពុករលួយឡើយ។ អង្គភាពប្រឆាំងអំពើពុករលួយបានកោះហៅជនរងការចោទពីពាក្យប្តឹង ២នាក់មកផ្តល់ចម្លើយ។ អង្គភាពប្រឆាំងអំពើពុករលួយ បានធ្វើលិខិតជូនស្ថាប័ន និងបុគ្គលដែលពាក្យប្តឹងបានលើកឡើងចំនួន ៣៩លិខិត។ អង្គភាពប្រឆាំងអំពើពុករលួយ បានទទួលការបំភ្លឺមកវិញពីក្រសួងស្ថាប័ន និងបុគ្គលតាមពាក្យប្តឹងចំនួន ៤៤លិខិត ។
លោកទេសរដ្ឋមន្ត្រី ក៏បានរំលេចឡើងក្នុងរបាយការណ៍ ពាក់ព័ន្ធអំពីការចោទប្រកាន់ឧត្តមសេនីយ៍ បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យថា បានប្រព្រឹត្តអំពើពុករលួយ ដោះលែងជនជាប់សង្ស័យគ្រឿងញៀន ។ លិខិតអនាមិកបានចោទឧត្តមសេនីយ៍ បោន ប៊ិន រួមជាមួយព្រះរាជអាជ្ញាខេត្តបន្ទាមានជ័យ មាស ច័ន្ទពិសិដ្ឋ ក្នុងករណ៍ចាប់គ្រឿងញៀនកាលពីថ្ងៃទី៩ ខែមីនា ឆ្នាំ២០១៧ នៅក្រុងសិរីសោភ័ណ្ឌ ចំនួន ៧ នាក់ ហើយមានការសូកប៉ាន់សរុបជាងមួយលានដុល្លារ ឱ្យដោះលែង ៣ នាក់ ហើយ ៤ នាក់ទៀត កំពុងបន្តរៀបចំដោះលែង ។
ដោយតមួយព័ត៌មានទាំងនោះ ពីម្ចាស់បណ្តឹងអនាមិកមិនច្បាស់លាស់ អង្គភាពប្រឆាំងអំពើពុករលួយ មិនទាន់សម្រេចបើកការស៊ើបអង្កេតលើករណីនេះ ហើយបានបាត់នីតិវិធីប្រមូលព័ត៌មាន យកមកវិភាគថ្លឹងថ្លែងជាមុនសិន ។ ជាលទ្ធផលឃើញថា ម្ចាស់បណ្ដឹងមានគំនុំជាមួយឧត្តមសេនីយ៍ បោន ប៊ិន ដែលពួកខ្លួន (រាប់ទាំងមេធារី បានមកទទួលសុំឱ្យលើកលែង ករណីម្ចាស់បណ្តឹងអនាមិកនេះ ដែលជាប់ចោទពីករណីគាស់ទូដែកយកប្រាក់ ២០ ម៉ឺនដុល្លារ ដែលជាសំណុំរឿង ក្នុងដៃកងរាជអាវុធហត្ថខេត្តបន្ទាយមានជ័យ ទើបម្ចាស់បណ្តឹងអនាមិក២នាក់ប្ដីប្រពន្ធនឹងហើយបានសារភាពថា ពួកខ្លួនប្តឹងពីឈ្មោះ បោន ប៊ិន ព្រោះតែ បោន ប៊ិន ចាត់ការមិនព្រមលើកលែង ឱ្យពួកខ្លួនដែលជាប់បទលួច មានស្ថានទម្ងន់ទោស លួចលុយពីទូដែក របស់បងស្រីរបស់ខ្លួន កាលពីខែមិថុនា ឆ្នាំ២០១៨នេះ ។
ការស្រាវជ្រាវបង្ហាញថា ករណីចាប់គ្រឿងញៀនថ្ងៃទី៩ ខែមិនា ឆ្នាំ២០១៧ នេះ។ ទី១ ជាករណីបង្ក្រាបដោយនគរបាល មិនមែនស្ថិតក្រោមករណ៍កងរាជអាវុធហត្ថខេត្តបន្ទាយមានជ័យទេ។ ទី២ ឆ្នាំ២០១៧នោះ ឧត្តមសេនីយ៍ បោន ប៊ិន មិនទាន់ត្រូវបានតែងតាំង ជាមេបញ្ជាការកងរាជអាវុធហត្ថខេត្តបន្ទាយមានជ័យ។ ទី៣ ឆ្នាំ២០១៧ ព្រះរាជអាជ្ញា មាស ច័ន្ទពិសិដ្ឋ និងឧត្តមសេនីយ៍ បោន ប៊ិនមិនទាន់បានស្គាល់គ្នាទេ។ តាមការស្រាវជ្រាវផ្សេងៗទៀត រាប់ទាំងចម្លើយរបស់ម្ចាស់បណ្តឹងអនាមិក ទាំងពីរនាក់ប្តីប្រពន្ធ ចម្លើយរបស់អ្នកពាក់ព័ន្ធផ្សេងៗទៀត បង្ហាញច្បាស់ថា បណ្តឹងនេះមានចេតនាគាបសង្កត់មកលើរូបឧត្តមសេនីយ៍ បោន ប៊ិន ដែលមិនមានពាក់ព័ន្ធអ្វីសោះនឹងករណីចាប់ ឬដោះជនសង្ស័យគ្រឿងញៀននេះ ហើយដែលប្រការនេះ នាំឱ្យប៉ះពាល់យ៉ាងខ្លាំងដល់កិត្តិយស សេចក្តីថ្លៃថ្នូររបស់ឧត្តមសេនីយ៍ បោន ប៊ិន ដែលមិនបានប្រព្រឹត្តអំពើពុករលួយ ដូចក្នុងបណ្តឹងអនាមិកនេះបានបរិហារទេ ។
អង្គភាពប្រឆាំងអំពើពុករលួយ សម្រេចមិនបើកការស៊ើបអង្កេត លើករណីចោទប្រកាន់មកលើឧត្តមសេនីយ៍ បោន ប៊ិន ទេ ។ អង្គភាពប្រឆាំងអំពើពុករលួយ នៅបន្តមួយជំហ៊ានទៀត ដើម្បីសុំការបំភ្លឺចំណុចមួយចំនួនទៀតពីលោក មាស ច័ន្ទពិសិដ្ឋ ព្រះរាជអាជ្ញាខេត្តបន្ទាយមានជ័យ ថាតើមានពាក់ព័ន្ធដូចការចោទប្រកាន់ របស់ម្ចាស់បងអនាមិកដែរឬទេ?
លោកបានបន្ថែមថា ករណីចោទប្រកាន់កងរាជអាវុធហត្ថខេត្តកំពង់ឆ្នាំង ថាបានយកលុយពីម្ចាស់ឡាន
ដែលត្រូវបានឃាត់ទុក ។ ការស្រាវជ្រាវបង្ហាញថា ពិតជាមានការទាវ-ការទទួលប្រាក់ដូចការផ្សព្វផ្សាយមែន ។ អង្គភាពប្រឆាំងអំពើពុករលួយ នៅត្រូវការពេលវេលាបន្តិចទៀតដើម្បីវាយតម្លៃថា ការទារប្រាក់-ការទទួលប្រាក់នេះយ៉ាងដូចម្តេចខ្លះ ដើម្បីមានមូលដ្ឋានបន្តនិតិវិធីបើក ឬមិទបើកការស៊ើបអង្កេតករណីនេះ ។
លោកទេសរដ្ឋមន្ត្រី បានលើកឡើងពី ករណីបណ្តាញសង្គមផ្សព្វផ្សាយទាំឱ្យជឿជាក់ថា ឧត្តមសេនីយ៍ឯក ប៊ុត សុភាពនាយកសាលានាយទាហានសកម្មត្មាតពង ពុករលួយ ដោយការពារអ្នកទំនាស់ដីធ្លីនៅខេត្តកំពង់ឆ្នាំង ។ ការស្រាវជ្រាវបង្ហាញថា អ្នកចុះផ្សាយមិនមានព័ត៌មានពីរឿងនេះហើយមានកំហឹង ក៏ជ្រុលចុះផ្សាយបរិហារឧត្តមសេនីយឯក ប៊ុត សុភាព ទៅ ។ ម្ចាស់បណ្តាញសង្គមបានធ្វើការសុំទោសឧត្តមសេនីយ៍ឯក ប៊ុត សុភាព រួចហើយ ។
ពាក្យបណ្ដឹងក្នុងវិស័យអប់រំគឺ អង្គភាពប្រឆាំងអំពើពុករលួយ បានប្រមូល និងបានជម្រាបជូនទៅរដ្ឋមន្ត្រីក្រសួងអប់រំយុវជន និងកីឡា រួចហើយ អំពីបណ្ដឹងនានាជុំវិញការប្រឡងបាក់ឌុបកន្លងមក ។
ករណីនាយកវិទ្យាល័យ ហ៊ុន សែន ចាក់អង្រៃ ដែលបានទារប្រាក់ ៣០ ដុល្លារពេលសិស្សមកចុះឈ្មោះចូលរៀន ។ អង្គភាពប្រឆាំងអំពើពុករលួយ បានស្រាវជ្រាវឃើញថា ពិតជាមានការទារយកប្រាក់ ៣០ ដុល្លារ (១២ម៉ឺនរៀល) ពីកូនសិស្សពេលចុះឈ្មោះពិតប្រាកដមែន។ នាយកសាលានេះ ធ្លាប់រងពាក្យប្តឹងចំនួនច្រើនលើកមកហើយ។ អង្គភាពប្រឆាំងអំពើពុករលួយ កំពុងបន្ត ដើម្បីសុំការបំភ្លឺមួយចំនួនពីនាយកសាលា និងពីថ្នាក់ដឹកនាំមន្ទីរ និងក្រសួងអប់រំ យុវជន និងកីឡា។ ដើម្បីធានាថា គោលការណ៍ស្ម័គ្រចិត្តនេះ មិនប៉ះពាល់ដល់គោលការណ៍រដ្ឋដែលធានាថា ការសិក្សា ១២ ឆ្នាំមិនបង់ថ្ងៃទេ ។
ករណីបណ្ដឹងទាក់ទងដល់មន្ត្រីសុរិយោដីមន្ត្រីមូលដ្ឋាន ទារកម្រៃខុសច្បាប់ក្នុងការទទួលកម្មសិទ្ធិ ។
បន្ទាប់ពីការដេញដោល ផ្លាស់ប្តូរយោបល់ទៅលើចំណុចនីមួយៗ ក្រុមប្រឹក្សាជាតិប្រឆាំងអំពើពុករលួយ នៅតែវាយតម្លៃខ្ពស់ ចំពោះការទទួលខុសត្រូវខ្ពស់ ការអនុវត្តច្បាប់ និងការចូលរួមជាមួយការលំបាកនានា ក្នុងការកែទម្រង់របស់រដ្ឋ ពីសំណាក់អង្គភាពប្រឆាំងអំពើពុករលួយ ។
លោកតុប សំ បានថ្លែងថា ក្រុមប្រឹក្សាជាតិប្រឆាំងអំពើពុករលួយ ផ្តល់អនុសាសន៍ ដល់ប្រធានអង្គភាពប្រឆាំងអំពើពុករលួយមួយចំនួនដូចជា កោតសរសើរប្រធានអង្គភាពប្រឆាំងអំពើពុករលួយ ដែលចេះទាញយកព័ត៌មាន ពីបណ្តាញសង្គម ហើយមានការលើកទឹកចិត្តបណ្តាញសង្គម ឱ្យបន្តការងារជាជាងចាប់កំហុស អូសដំណើរ។ ក្រុមប្រឹក្សាជាតិប្រឆាំងអំពើពុករលួយ លើកទឹកចិត្តប្រធានអង្គភាពប្រឆាំងអំពើពុករលួយ ឱ្យខិតខំពុះពារការលំបាកថែមទៀត ដើម្បីធ្វើការឆ្លើយតបឱ្យបានទូលំទូលាយ នៅបណ្តាញសង្គម អំពីលទ្ធផល នៃការស្រាវជ្រាវរបស់ខ្លួន ។
ជំរុញការប្រយុទ្ធប្រឆាំងអំពើពុករលួយ ឱ្យបានខ្លាំងក្លាថែមទៀត ទាំងការងារអប់រំទាំងការងារបង្ការទប់ស្កាត់ និងទាំងការងារបង្ក្រាបបញ្ជូនទៅតុលាការ ៕ ដោយ៖កូឡាប
