កុមារឥណ្ឌាអាយុ ២ឆ្នាំម្នាក់ ដែលធ្លាក់ជាប់នៅក្នុងអណ្តូងខួងនៅភាគខាងត្បូងប្រទេសឥណ្ឌាកាលពីថ្ងៃសុក្រកន្លងទៅ បានស្លាប់បាត់ហើយ។ នេះបើតាមការចុះផ្សាយរបស់ប្រព័ន្ធផ្សព្វផ្សាយឥណ្ឌា។
មន្ត្រីឥណ្ឌានៅក្នុងរដ្ឋ Tamil Nadu បាននិយាយនៅព្រឹកថ្ងៃអង្គារនេះថា សាកសពរបស់កុមារាឈ្មោះ Sujith Wilson ត្រូវបានគេយកបានមកវិញក្នុងសភាពរលួយ។
កុមារតូចខាងលើបានធ្លាក់ចូលក្នុងអណ្តូងខួងដែលគេឈប់ប្រើ ខណៈគេកំពុងតែលេងជាមួយនឹងកុមារដទៃ។
ដំបូងគាត់ធ្លាក់ជាប់ក្នុងអណ្តូងត្រឹម ១០ម៉ែត្រប៉ុណ្ណោះ ប៉ុន្តែក្រោយមកក៏ធ្លាក់ចុះទៅទៀតរហូតដល់ជម្រៅ ១៨០ម៉ែត្រ បណ្តាលឲ្យអាជ្ញាធរឥណ្ឌាចាត់វិធានការសង្គ្រោះទ្រងទ្រាយធំអស់រយៈពេលជាច្រើនថ្ងៃ។
សូមបញ្ជាក់ថា អណ្តូងខួងគឺជាប្រភេទអណ្តូងដែលត្រូវបានគេជីកទៅខាងក្រោមដីយ៉ាងជ្រៅ ដើម្បីយកទឹក។ អាជ្ញាធរឥណ្ឌា បានប្រើប្រាស់គ្រឿងចក្រយ៉ាងច្រើនដើម្បីជីកចុះទៅក្រោមក្បែរអណ្តូងកើតហេតុនោះ ដើម្បីសង្គ្រោះកុមារអភ័ព្វនោះ។
សូមបញ្ជាក់ថា កាលពីខែមិថុនា ឆ្នាំមុនក៏មានកូនក្មេងម្នាក់ធ្លាក់ជាប់នៅក្នុងអណ្តូងដូចគ្នាដែរនៅក្នុងរដ្ឋ Punjab។ ទោះបីមានប្រតិបត្តិការសង្គ្រោះរយៈពេល ២ថ្ងៃក៏ដោយក៏មិនអាចជួយកុមារនោះឲ្យនៅរស់រានមានជីវិតដែរ។
មានការស្នើឲ្យមានការផាកពិន័យចំពោះជនទាំងឡាយណាដែលបើកអណ្តូងមិនប្រើចំហរចោល៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
