អ្នកទេសចរអង់គ្លេស ២នាក់រងរបួសធ្ងន់ បន្ទាប់ពីមានការវាយប្រហារពីត្រីឆ្លាម នៅតំបន់កម្សាន្តដ៏ល្បីមួយកន្លែង ក្នុងប្រទេសអូស្រ្តាលី។
បុរសរងគ្រោះទាំង ២មានអាយុ ២២ និង ២៨ឆ្នាំ។ មុនពេលរងការវាយប្រហារពីត្រីឆ្លាម ពួកគេបានហែលទឹកលេងនៅកោះ Whitsunday ក្នុងរដ្ឋ Queensland។
អ្នកទេសចរទាំងពីររងរបួសធ្ងន់ ដោយត្រូវត្រីឆ្លាមខាំជើងរបស់ពួកគេ។ ពួកគេត្រូវបានជួយយកទៅកាន់ឆ្នេរដោយទូកទេសចរណ៍ និងធ្វើការព្យាបាលរបួសនោះទីនោះ មុនពេលបញ្ជូនពួកគេតាមយន្តហោះទៅកាន់មន្ទីរពេទ្យ។ ពួកគេស្ថិតក្នុងស្ថានភាពនឹងន។
សូមបញ្ជាក់ថា កាលពីឆ្នាំមុន មានអ្នកទេសចរ ២នាក់ផងដែរ រងការវាយប្រហារដោយត្រីឆ្លាមនៅកោះWhitsunday នោះ។ ជនរងគ្រោះទាំង ២នៅរស់រានមានជីវិត ប៉ុន្តែក្មេងស្រីរងគ្រោះម្នាក់អាយុ ១២ឆ្នាំ ត្រូវគេកាត់ជើងចោលនៅពេលបន្ទាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC