ភ្នំពេញ ៖ ហ្គេមបាញ់ត្រីយីហោដាយអឺម៉ិនខាធូនវើលដ៌ នៅក្នុងមណ្ឌលកំសាន្តកោះពេជ្រ ដែលកន្លងមកត្រូវបានកម្លាំង គណៈបញ្ជាការឯកភាពខណ្ឌចំកាមនដឹកនាំបញ្ជាផ្ទាល់ដោយ លោក ថេង សុថុល អភិបាលខណ្ឌ ចំកាមនចុះបង្ក្រាបនិងដកហូតបានទូហ្គេមបាញ់ត្រីជាច្រើនទូនោះ រហូតមកដល់ពេលនេះទីតាំងនេះកំពុងបើកដំណើរការទទួលអ្នកញៀនល្បែងនេះឡើងវិញហើយសង្ស័យចរចាត្រូវគ្នា។
គួរបញ្ជាក់ថា កាលពីរសៀលថ្ងៃទី១៨ ខែសីហា នេះ រាជរដ្ឋាភិបាល កម្ពុជា បានចេញសារាចរណែនាំមួយ ដែលសម្រេចឲ្យបញ្ឈប់ចេញអាជ្ញាប័ណ្ណប្រកបរបរអាជីវកម្មល្បែងភ្នាល់ តាមប្រព័ន្ធអេឡិចត្រូនិចនិងអ៊ីនធឺណិត online គ្រប់ប្រភេទដើម្បីធានាបាននូវការថែរក្សាការពារសន្តិសុខសាធារណៈនិងសង្គម។
ប្រជាពលរដ្ឋ កំពុង ងឿងឆ្ងល់ ថា ហេតុអ្វីបានជាទីតាំងនេះអាចបើកដំណើរការណ៍បានឡើងវិញ ព្រោះកន្លង មកទីតាំងនេះត្រូវបានបង្ក្រាប២ដងរួចមកហើយ ឬមួយក៏កាចុះបង្ក្រាបនេះគ្រាន់តែជាសម្ដែងល្ខោនទេ។
គួររំលឹកថា លោក ឃួង ស្រេង ប្រធានគណៈបញ្ជាការឯកភាពរាជធានី ភ្នំពេញ នៅព្រឹកថ្ងៃទី៣១ ខែឧសភា ឆ្នាំ២០១៩នេះ បានដាក់ចេញជាវិធានការក្ដៅលើការបង្ក្រាបបទល្មើសនានា និងបង្ក្រាបល្បែងស៊ីសង់គ្រប់ប្រភេទទាំងអស់នៅទូទាំងខណ្ឌ ទាំង១៤ ក្នុងរាជធានីភ្នំពេញ ដើម្បីឱ្យប្រជាពលរដ្ឋទទួលបានរស់នៅដោយភាពកក់ក្តៅ និងសុខសាន្តក្នុងការរស់ខណៈ ដែលប្រទេសជាតិ មានសន្តិភាពពេញបរិបូណ៌។ ការដាក់ចេញនូវវិធានការបែបនេះ បានធ្វើឡើងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ដោយមាន ការចូលរួមពីកម្លាំងមានសមត្ថកិច្ចទាំងពីរភេទអាជ្ញាធរ ដែនដី ទាំង១៤ខណ្ឌ និងមន្ត្រីពាក់ព័ន្ធមួយចំនួនទៀត។
លោក ឃួង ស្រេង បានមានប្រសាសន៍ថា ការបង្កើតឱ្យមាន កិច្ចប្រជុំគណៈបញ្ជាការឯកភាពនេះ គឺធ្វើឡើងក្នុងគោលបំណង ដើម្បីដាក់ចេញជាផែនការ និងវិធានការផ្សេងទៀតក្នុងការទប់ស្កាត់បទល្មើសគ្រប់ប្រភេទ ដើម្បីភាពសុខសាន្តជូនប្រជាពលរដ្ឋនៅក្នុងរាជធានីភ្នំពេញ ។
តែផ្ទុយទៅវិញ លោក ថេង សុថុល អភិបាលនៃគណៈអភិបាល ខណ្ឌចំការមន ក៏ដូចជាលោក អធិការខណ្ឌចំការមន ហាក់មិនយកចិត្តទុកដាក់ចំពោះប្រសាសន៍ អភិបាលរាជធានី ទាល់តែសោះ ដោយល្បែងស៊ីសងនៅក្នុងមូលដ្ឋានរបស់គាត់ កំពុងវាយលុបទីផ្សារបែបនេះ៕ ដោយ៖កូឡាប
