ព្រះមហាក្សត្រថៃ Maha Vajiralongkorn បានបណ្តេញមន្រ្តី ៤នាក់បន្ថែមទៀតចេញពីតំណែង ដោយសារតែការប្រព្រឹត្តិមិនត្រឹមត្រូវ និងមានមាយាទមិនល្អ។ នេះបើតាមសេចក្តីប្រកាសចំនួន ២ដែលចេញនៅថ្ងៃអង្គារម្សិលមិញនេះ។
នៅក្នុងសេចក្តីប្រកាស ១ បានឲ្យដឹងថា មន្រ្តីវាំង ២នាក់ ដែលត្រូវគេស្គាល់ថាជាឆ្មាំយាមបន្ទប់គេង ត្រូវបានបណ្តេញចេញ ដោយសារតែមានមាយាទមិនល្អខ្លាំង និងមានសហាយស្មន់ ដែលទង្វើទាំងនោះ វារំលោភទៅនឹងក្រមប្រតិបត្តិរបស់អ្នកបម្រើនៅក្នុងវាំង។
ចំណែកនៅក្នុងសេចក្តីប្រកាសមួយទៀត មន្រ្តីយោធា ២រូបត្រូវបានបណ្តេញចេញ ដោយសារតែមានភាពធូរលុង នឹងភារកិច្ចរបស់ពួកគេ ក្នុងនាមជាមន្រ្តីវាំង និងមានអាកប្បកិរិយាមិនសមរម្យ។
មន្រ្តីទាំង ៤ខាងលើត្រូវបានព្រះមហាក្សត្រដកពីតួនាទី និងតំណែងទាំងអស់។
សូមបញ្ជាក់ថ់ា ការបណ្តេញចេញមន្រ្តីវាំង ៤រូបបន្ថែមកើតឡើង ក្រោយពេលមានការបណ្តេញមន្រ្តីវាំង ៦រូបកាលពីអាទិត្យមុន ដែលពួកគេទាំងនោះ រងការចោទប្រកាន់ថា បានប្រព្រឹត្តិមិនត្រឹមត្រូវនឹងវិន័យ ដែលធ្វើឲ្យប៉ះពាល់ខ្លាំងដល់ព្រះរាជវាំង។
កាលពីអាទិត្យមុនផងដែរ ព្រះមហាក្សត្រ ក៏បានដកតំណែងពីអ្នកម្នាងម្នាក់ផងដែរ ឈ្មោះ Sineenat Wongvajirapakdi ដោយសារតែមានភាពមិនស្មោះត្រង់ និងធ្វើទទឹងទិសជាមួយនឹងព្រះមហាក្សត្រីយានី Suthida Bajrasudhabimalalakshana ដែលទើបរៀបអភិសេកជាមួយនឹងព្រះមហាក្សត្រ កាលពីខែឧសភាកន្លងទៅ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
