សហរដ្ឋអាមេរិច និងប្រទេសចំនួន ២២ផ្សេងទៀត នៅអង្គការសហប្រជាជាតិបានជំរុញឲ្យចិននៅថ្ងៃអង្គារម្សិលមិញនេះ បញ្ឈប់ការឃុំឃាំងជនជាតិដើមភាគតិចវីហ្គ័រ (Uighur) និងជនជាតិមូស្លីមមួយចំនួនទៀត ដែលការជំរុញនោះបណ្តាលឲ្យមន្រ្តីចិនព្រមានតបវិញថា វានឹងធ្វើឲ្យប៉ះពាល់ដំណើរការនៃការចរចាពាណិជ្ជកម្មរវាងអាមេរិច និងចិន។
ចិនបានរងការរិះគន់យ៉ាងខ្លាំង ចំពោះការបង្កើតជំរុំរបស់ខ្លួននៅតំបន់ Xinjiang ដែលខ្លួនបាននិយាយថា ជាមណ្ឌលបណ្តុះបណ្តាលវិជ្ជាជីវៈ ដើម្បីទប់នឹងការបះបោរ និងផ្តល់ឲ្យពួកគេនូវជំនាញជីវិតថ្មី។ អង្គការសហប្រជាជាតិបាននិយាយថា មានជនជាតិដើមភាគតិចវីហ្គ័រចំនួន ១លាននាក់ និងជនជាតិមូស្លីមផ្សេងទៀត ត្រូវបានឃុំខ្លួន។
ជុំវិញការរិះគន់របស់អាមេរិច ឯកអគ្គរដ្ឋទូតចិនប្រចាំអង្គការសហប្រជាជាតិ បានតបទៅនឹងអាមេរិចដោយនិយាយថា អាមេរិចកំពុងស្វែងរកកិច្ចព្រមព្រៀងពាណិជ្ជកម្មជាមួយខ្លួន ខណៈបានប្រើប្រាស់បញ្ហាផ្សេងៗ ជាពិសេសបញ្ហាសិទ្ធិមនុស្ស ដើម្បីរិះគន់លើអ្នកដទៃ។
លោក Zhang Jun ថ្លែងថា មានការរីកចម្រើននៅក្នុងកិច្ចចរចាពាណិជ្ជកម្ម ហើយលោកនិយាយថា ការរិះគន់របស់អាមេរិចលើចិននៅអង្គការសហប្រជាជាតិ មិនមានផលល្អសម្រាប់កិច្ចចរចាពាណិជកម្មនោះទេ។
សូមបញ្ជាក់ថា បច្ចុប្បន្នអាមេរិច និងចិន កំពុងតែចរចាបញ្ហាសង្រ្គាមពាណិជកម្មជាមួយគ្នា ដើម្បីរកកិច្ចព្រមព្រៀង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia