ខេត្តព្រះសីហនុ៖ ព័ត៌មានក្រៀមក្រំ ពីការបាត់ខ្លួនស្ត្រីទេសចរជនជាតិអង់គ្លេសម្នាក់ នៅលើកោះរ៉ុង ក្រុងកោះរ៉ុង កាលវេលាជិតភ្លឺថ្ងៃទី២៤ ខែតុលា ឆ្នាំ២០១៩ បានក្លាយជាប្រធានបទ ឬដំណឹងសំខាន់ ដែលសារណជនជាតិ-អន្តរជាតិចង់ដឹង និងកំពងតាមដាន ពីជោគវាសនា របស់ស្ត្រីជនជាតិអង់គ្លេសរូបនោះ បន្ទាប់ពីបានបាត់ដំណឹងរយៈពេលមួយសប្តាហ៍កន្លងមកនេះ នៅខេត្តព្រះសីហនុ ក្នុងប្រទេសកម្ពុជា។
សម្រាប់ប្រតិបត្តិការស្វែងរក មន្ត្រីរដ្ឋបាលខេត្តព្រះសីហនុ ថ្លែងថា នៅព្រឹកថ្ងៃទី៣០ ខែតុលា ឆ្នាំ២០១៩នេះ កម្លាំងសមត្ថកិច្ចបានបញ្ជូនកងអន្តរាគមន៍ពិសេសបន្ថែម ជាមួយសត្វឆ្កែហិតក្លិន ឆ្ពោះទៅកាន់កោះរ៉ុង ដើម្បីបន្តស្វែងរកស្ត្រីជនជាតិអង់គ្លេសឈ្មោះ Amelia Bambridge អាយុ ២១ឆ្នាំ ដែលបានបាត់ខ្លួននៅលើកោះរ៉ុង តាំងពីទៀបភ្លឺថ្ងៃទី២៤ ខែតុលា ឆ្នាំ២០១៩។
ទាក់ទិនបញ្ហានេះដែរ មន្ត្រីរដ្ឋបាលក្រុងកោះរ៉ុង បានឲ្យដឹងនៅព្រឹកថ្ងៃទី៣០ ខែតុលា ឆ្នាំ២០១៩នេះថា ការស្វែងរកស្ត្រីជនជាតិអង់គ្លេស ដែលបាត់ខ្លួននៅលើកោះរ៉ុង ពីកម្លាំងសមត្ថកិច្ច និងក្រុមអ្នកស្ម័គ្រចិត្តនៅតែធ្វើបន្ត ប៉ុន្តែមិនទាន់ទទួលបានដំណឹងនៅឡើយទេ គិតមកត្រឹមថ្ងៃត្រង់ថ្ងៃទី៣០ ខែតុលា ឆ្នាំ២០១៩នេះ។
មន្ត្រីក្រុងកោះរ៉ុង បន្តថា ថ្ងៃនេះ កម្លាំងចម្រុះ បានបន្តចុះរុករកស្ត្រីរងគ្រោះជនជាតិអង់គ្លេស ដែលបាត់ខ្លួនជាបន្តទៀត។ ក្នុងនោះកម្លាំងជំនាញស្ថាប័នពាក់ព័ន្ធដទៃទៀត ក៏វានបន្តចុះស្រាវជ្រាវ ដើម្បីរកប្រភព និងដើមហេតុ ដែលឈានដល់បាត់ខ្លួនស្ត្រីរងគ្រោះរូបនោះ៕ ដោយ៖ ដែន សីមា
