ប្រទេសកូរ៉េខាងជើងបាននិយាយថា ខ្លួននឹងបញ្ជូនគណៈប្រតិភូកីឡាទៅចូលរួមការប្រកួតកីឡាអូឡាំពិករដូវរងា ដែលនឹងធ្វើឡើងនៅខែកុម្ភះ ក្នុងប្រទេសកូរ៉េខាងត្បូង។
ការប្រកាសពីវត្តមានរបស់អត្ថពលិកកូរ៉េខាងជើងនេះ កើតឡើង ក្រោយពេលមន្ត្រីជាន់ខ្ពស់នៃប្រទេសទាំងពីរបានបើកកិច្ចប្រជុំកំរិតខ្ពស់ ជាមួយគ្នាលើកដំបូង ក្រោយពេលខកខានអស់រយៈពេល ២ឆ្នាំ។
ប្រទេសកូរ៉េខាងត្បូងក៏ស្នើឲ្យមានការរៀបការជួបជុំគ្រួសារឡើងវិញក្នុងកំឡុងការប្រកួតកីឡាអូឡាំពិកផងដែរ សំរាប់សាច់ញាតិរបស់
ប្រជាជននៃប្រទេសទាំងពីរ ដែលបានបែកគ្នាក្នុងកំឡុងសង្គ្រាមកូរ៉េ។
សូមរំលឹកផងដែរថា ទំនាក់ទំនងរវាងប្រទេសទាំងពីរមានភាពតានតឹងកាន់តែខ្លាំង ចាប់តាំងពីមានកិច្ចប្រជុំលើកចុងក្រោយបង្អស់នៅក្នុង ឆ្នាំ ២០១៥។
ទំនាក់ទំនងរវាងប្រទេសទាំងពីរបានបែកបាក ក្រោយពេលកូរ៉េខាងត្បូងបានព្យួរគំរោងសេដ្ឋកិច្ចរួមនៅតំបន់ឧស្សាហ៏កម្មកែសុង
(Kaesong) ស្ថិតក្នុងប្រទេសកូរ៉េខាងជើង ដោយសារតែការធ្វើតេស្តសាកល្បងមីស៊ីល និងនុយក្លេអ៊ែររបស់របបព្យុងយ៉ាង។
ជាការឆ្លើយតបវិញ កូរ៉េខាងជើងក៏បានបញ្ចប់ទំនាក់ទំនងទាំងអស់ជាមួយនឹងកូរ៉េខាងត្បូង រួមមានការកាតផ្តាចទូរស័ព្ទសំរាប់ទំនាក់ទំនង រវាងប្រទេសទាំងពីរ។ ភាពតានតឹងរឹតតែកើនឡើងខ្លាំង នៅឧបទ្វីប ។ចាប់តាំងពីកូរ៉េខាងជើងបានអភិវឌ្ឍន៏កម្មវិធីនុយក្លេអ៊ែរ និងមីស៊ីល របស់ខ្លួន និងបានធ្វើការបាញ់សាកល្បងជាញឹកញាប់ ៕ សុភ័ក្ត្រ
