ភ្នំពេញ ៖នៅព្រឹកថ្ងៃទី ៣១ ខែ តុលា ឆ្នាំ ២០១៩ នេះសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ពីគណបក្សខ្មែរក្រោក បានចូលរួមកិច្ចប្រជុំប្រចាំខែ របស់ឧត្តមក្រុមប្រឹក្សាពិគ្រោះ និងផ្ដល់យោបល់ប្រចាំខែតុលា នៅទីស្ដីការនាយករដ្ឋមន្ត្រី ( វិមានសន្តិភាព )។
នៅក្នុងកិច្ចប្រជុំនេះ លោកសុខសុវណ្ណ វឌ្ឍនាសាប៊ុង ហៅ វិល្លាម បានលើកឡើងពីបេសកកម្ម១០ ខេត្ត តបតាមពាក្យបណ្ដឹង ១៦ ករណី និងបើកការស៊ើបអង្កេត១ករណី ក្នុងចំណោមករណីទាំងអស់យើងខ្ញុំបានសង្កត់ធ្ងន់ករណីធំៗ៣ ដូចខាងក្រោម៖
១ / ករណីការរកឃើញ ការប្រើអំណាចដោយខុសច្បាប់របស់មេបញ្ជាការខេត្តស្ទឹងត្រែង ដើម្បីយកទ្រព្យសម្បត្តិរបស់ពលរដ្ឋឈ្មោះ សែ ម៉េងជា , ថែមទាំងបំពានលើលិខិតរបស់អង្គភាពប្រឆាំងអំពើពុករលួយ ។ ហើយផ្គើនមិនអនុវត្តន៍ មិនគោរពតាមសេចក្ដីណែនាំ របស់ស្ថាប័នថ្នាក់ជាតិ ។
២ / ករណីអាជ្ញាធរខេត្តកំពង់ធំមិនអនុវត្តន៍ សជណ លេខ ១០៤៤ សជណ ចុះ ថ្ងៃទី២២ កក្កដា ឆ្នាំ ២០១៤ ដែលនាំឲ្យឈ្មួញជាឧត្តមសេនីយឯក ឈ្មោះ គាំសារឿន អាចយកអាងទឹករបស់រដ្ឋមកធ្វើអាជីវកម្មជិះជាន់ធ្វើបាបពលរដ្ឋ ខណៈដែល ក្រុមប្រឹក្សាឃុំគណបក្សប្រជាជន ចេញមុខមកការពារផលប្រយោជន៍ប្រជាពលរដ្ឋ ប្រឆាំង និងការជិះជាន់ គឺឈ្មួញផ្កាយ៣ ដែលធ្វើអាជីវកម្មរំលោភ សជណ បានប្ដឹងចាប់ក្រុមប្រឹក្សាឃុំនោះ ដាក់ពន្ធធនាគាទៀតផង ។
៣ / ករណី អភិបាលខេត្តមណ្ឌលគិរីភូតកុហកសម្ដេចតេជោ និងបំភ្លៃអង្គហេតុដោយចេតនា ជុំវិញទិដ្ឋភាពបរិវេណមជ្ឈមណ្ឌលវប្បធម៌ជនជាតិភាគតិចភ្នំដោះក្រមុំ ។
លោក បានលើកឡើងថា “គ្រប់ករណីទាំងអស់ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ ពីគណបក្សខ្មែរក្រោក សុទ្ធតែបានសិក្សាច្បាស់លាស់ ដោយផ្ទៀងផ្ទាត់លើ មូលដ្ឋានច្បាប់ ដែលមានឯកសាគតិយុត្តជាភស្តុតាង មុនរៀបចំជារបាយការណ៍ជូននាយករដ្ឋមន្ត្រី”៕ដោយ៖កូឡាប