ភ្នំពេញ៖ បុណ្យកឋិនទានសាមគ្គីដែលផ្តួចផ្តើមឡើងដោយគណៈអភិបាលរាជធានីភ្នំពេញ ក្រុមប្រឹក្សារាជធានីភ្នំពេញ មន្ត្រីរាជការអាជ្ញាធរដែនដី មន្ទីរអង្គភាពជុំវិញរាជធានីភ្នំពេញប្រមូលបានបច្ច័យចំនួន១០ម៉ឺនដុល្លារ ដើម្បីវេរប្រគេនព្រះសង្ឃដែលគង់ចាំព្រះវស្សា អស់កាលត្រីមាសក្នុងពុទ្ធសីមាវត្តចំនួន២ នោះគឺវត្តព្រះបារមីវង្គដ្ឋបូរីកបិលភ័ស្ថ ស្ថិតក្នុងសង្កាត់ទឹកថ្លា ខណ្ឌ សែនសុខ និងវត្តវិមានតេជះ (ហៅវត្តស្រះចក) ស្ថិតក្នុងសង្កាត់ស្រះចក ខណ្ឌដូនពេញ ។
កម្មវិធីបុណ្យនេះ ពោលគឺកាលពីវេលាល្ងាចថ្ងៃទី៣០តុលា បានធ្វើពិធីជួបជុំពុទ្ធបរិស័ទប្រារព្ធពិធីក្រុងពាលី និងនមស្កាព្រះរតនត្រ័យសមាទានសីល និមន្តព្រះសង្ឃច្រើនព្រះបរិត្ត និងសម្តែងធម៌ទេសនា
នៅក្នុងបរិវេណសាលាក្រុងភ្នំពេញ ជាមួយការចូលចាប់មគ្គផលតាមកម្លាំងសទ្ធាជ្រះថ្លារៀងៗខ្លួន ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធបុព្វការីជនមានមាតា បិតា ញាតិការទាំង៧សណ្តាន និងឧទ្ទិសដល់ដួងវិញ្ញាណក្ខន្ធវីរយុទ្ធជន វីរយុទ្ធនារីដែលបានពលីជីវិត ដើម្បីបុព្វហេតុជាតិមាតុភូមិ។ លុះព្រឹកឡើងត្រូវនឹងថ្ងៃទី៣១ តុលា ទើបអង្គកឋិនទាននេះ ដង្ហែរមកវេរប្រគេនព្រះសង្ឃដែលគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តខាងលើតែម្តង ដោយក្នុងនោះលោកឃួង ស្រេង អភិបាលរាជធានី និងលោកស្រី ដឹកនាំអង្គកឋិនទាននេះ ដង្ហែរមកវេរប្រគេនព្រះសង្ឃដែលគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តព្រះបារមីវង្គដ្ឋបូរីកបិលភ័ស្ថ ស្ថិតក្នុងសង្កាត់ទឹកថ្លា ខណ្ឌ សែនសុខ។ ចំណែកលោកស៊ុយ សេរិទ្ធ អភិបាលរងរាជធានី ជាអ្នកដឹកនាំអង្គកឋិនទានដង្ហែរមកវេរប្រគេនព្រះសង្ឃ ដែលគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តវិមានតេជះ (ហៅវត្តស្រះចក) ស្ថិតក្នុងសង្កាត់ស្រះចក ខណ្ឌដូនពេញ ។
គួរបញ្ជាក់ផងដែរថា បច្ច័យចំនួន១០ម៉ឺនដុល្លារនេះ រដ្ឋបាលរាជធានីភ្នំពេញ បានប្រគេនដល់ដែលគង់នៅ
វត្តព្រះបារមីវង្គដ្ឋបូរីកបិលភ័ស្ថ ចំនួន៥ម៉ឺនដុល្លារ និងប្រគេនដល់ព្រះសង្ឃដែលគង់ចាំព្រះវស្សាអស់កាលត្រីមាសក្នុងពុទ្ធសីមាវត្តវិមានតេជះ (ហៅវត្តស្រះចក) ចំនួន៥ម៉ឺនដុល្លារដូចគ្នា។
ពិធីបុណ្យកឋិនទាន បានប្រតិស្ថានតាំងពីជាង២៥០០ឆ្នាំមុន ពោលគឺតាំងពីសម័យកាលដែលព្រះពុទ្ធអង្គព្រះសម្មាសម្ពុទ្ធបរមគ្រូគង់នៅ និងបានព្រះរាជទានអនុញ្ញាតឲ្យពុទ្ធបរិស័ទប្រារព្ធពិធីនេះឡើង ដើម្បីនាំយកចីវរទានដែលមានអង្គសំខាន់៣ គឺស្បង់ ចីវរ និងសង្ឃាដី ទៅវេរប្រគេនព្រះភិក្ខុសង្ឃ ដែលគង់ចាំព្រះវស្សាអស់កាលត្រីមាស ក្នុងពុទ្ធសីមាតាមទីអារាមនានា។
ប្រជាពុទ្ធបរិស័ទគ្រប់មជ្ឈដ្ឋាន គ្រប់ទីកន្លែងទូទាំងព្រះរាជាណាចក្រកម្ពុជា អនុមោទនាដោយសទ្ធាជ្រះថ្លា ដ៏បរិសុទ្ធបានចាប់ផ្តើមប្រារព្ធពិធីបុណ្យកឋិនទាន តាមពុទ្ធានុញ្ញាតដោយសប្បាយរីករាយ និងប្រកបដោយមោទនភាព ជ្រះថ្លាចំពោះសិទ្ធិសេរីភាពពេញលេញ នៅក្នុងជំនឿសាសនា ក៏ដូចជា នៅក្នុងជីវភាពរស់នៅប្រចាំថ្ងៃនាសម័យតេជោ ដែលពោរពេញដោយសុខសន្តិភាព ស្ថេរភាពនិង មានការអភិវឌ្ឍន៍រីកចម្រើនយ៉ាងឆាប់រហ័សលើគ្រប់វិស័យ៕ដោយ៖កូឡាប
