មនុស្សយ៉ាងតិចចំនួន ៦៥នាក់បានស្លាប់ នៅពេលរថភ្លើងដែលពួកគេធ្វើដំណើរត្រូវភ្លើងឆាបឆេះយ៉ាងសន្ធោរសន្ធៅ។ ពេលកើតហេតុ រថភ្លើងកំពុងធ្វើដំណើរពីទីក្រុង Karachi ឆ្ពោះទៅកាន់ទីក្រុង Rawalpindi។
រដ្ឋមន្រ្តីក្រសួងផ្លូវដែលប៉ាគីស្ថានឈ្មោះ Sheikh Rashid Ahmed បាននិយាយថា អគ្គិភ័យបង្កឡើងដោយសារតែការផ្ទុះហ្គាស ដែលអ្នកដំណើរយកមកតាមខ្លួនដើម្បីធ្វើចំអិនម្ហូបលើរថភ្លើង។
អគ្គិលភ័យបានរីករាលដាលនៅលើទូររថភ្លើងយ៉ាងតិច ៣។ ក្នុងគ្រោះថ្នាក់នោះ ក៏មានមនុស្សចំនួន ៣០នាក់ផងដែររងរបួស ហើយចំនួនអ្នកស្លាប់អាចនឹងកើនឡើង។
លោករដ្ឋមន្រ្តីខាងលើថ្លែងថា ”ចង្រ្កាន២ បានផ្ទុះ។ ពួកគេកំពុងចំអិនអាហារ និងមានប្រេងផងដែរ ដែលជាតិប្រេងឆានេះហើយធ្វើឲ្យភ្លើងឆេះកាន់តែខ្លាំង”។
លោកបញ្ជាក់ទៀតថា កាលដែលអ្នកដំណើរយកចង្រ្កានទៅជាមួយលើនៅរថភ្លើងដើម្បីចំអិនអាហារហូប ក្នុងការធ្វើដំណើរចំងាយឆ្ងាយ គឺជាបញ្ហា។
រថភ្លើងដែលបានធ្វើដំណើរពីទីក្រុង Karachi ឆ្ពោះទៅកាន់ Rawalpindi គឺជារថភ្លើងរបស់ក្រុមហ៊ុន Tezgam ដែលជាក្រុមហ៊ុនរថភ្លើងដ៏ល្បីឈ្មោះក្នុងប្រទេសប៉ាគីស្ថាន។
ខ្សែរថភ្លើងនោះបានរត់ជាប្រចាំថ្ងៃ ហើយប្រើរយៈពេល ២៥ម៉ោងកន្លះ។
សូមបញ្ជាក់ថា ការគ្រោះថ្នាក់ដោយរថភ្លើងនៅក្នុងប្រទេសប៉ាគីស្ថានមានអត្រាខ្ពស់ ដោយសារតែមានការដាក់មនុស្សលើសចំណុះ។ កាលពីឆ្នាំ ២០០៧ មនុស្ស ៥៦នាក់បានស្លាប់ក្នុងគ្រោះថ្នាក់នៅទីក្រុង Mehrabpur៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC