ភ្នំពេញ៖ អង្គភាពប្រឆាំងអំពើពុករលួយ នឹងចេញលិខិតព្រមានលោក ចាន់ ធីចាង ហ្វាងសារព័ត៌មាន នគរមាស ដែលចុះផ្សាយនូវព័ត៌មានមិនពិត ពាក់ព័ន្ធនឹងលោក ឧត្តមសេនីយ៍ឯក ប៊ុត សុភាព នាយកសាលានាយទាហានសកម្មពីទង្វើដែលអាចឈានទៅ ដល់ការបំពានលើមាត្រា៤១ នៃច្បាប់ស្តីពីការប្រឆាំងអំពើពុករលួយ។ អ.ប.ព. ធ្វើការកោះហៅ ចាន់ ធី មកស្តាប់ចម្លើយក្នុងន័យ ដើម្បីទប់កុំឲ្យរឿងនេះ វិវត្តន៍ទៅរកបទល្មើសព្រហ្មទណ្ឌ តែបែរជា ចាន់ ធី មានកំហឹងដោយមិនពិចារណាទៅវិញ។
អង្គភាពប្រឆាំងអំពើពុករលួយកាលពីថ្ងៃទី 31 ខែតុលាបានចេញលិខិតមួយ ស្តីពីលទ្ធផលនៃការស្រាវជ្រាវ អត្ថបទសារព័ត៌មានផ្សាយជាសាធារណៈរបស់លោក ចាន់ ធី ចាងហ្វាងសារព័ត៌មាន នគរមាស អំពីមន្ត្រីពុករលួយ។
អង្គភាពប្រឆាំងអំពើពុករលួយ បានលើកឡើងថា នៅថ្ងៃទី ១៥ ខែ សីហា ឆ្នាំ ២០១៩ សារព័ត៌មាន នគរមាស បានចុះផ្សាយអត្ថបទ “តើមានមន្ត្រីពុករលួយប៉ុន្មាននាក់នៅពីក្រោយឈ្មួញដីឈ្មោះ អៀរ គុយម៉ុង ហៅ ក្តាន់ៗ ដែលក្នុងការសរសេរ និងរូបថតដែលបានចុះផ្សាយនោះ ធ្វើឲ្យអ្នកអានយល់ថា លោក ឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម
គឺជាមន្រ្តីពុករលួយនៅពីក្រោយលោក អៀវ គុយម៉ុង ហៅក្ដាន់ នោះ។
ACU បានឲ្យដឹងថា នៅថ្ងៃទី ២១ ខែ សីហា ឆ្នាំ ២០១៩ សារព័ត៌មាន នគរមាស បានចុះផ្សាយអត្ថបទបន្ទាប់ទៀត ឲ្យដឹងថា
លោក ឧត្តមសេនីយ៍ឯក ប៊ុត សុភាព និងលោក អៀវ គុយម៉ុង បានប្តឹងលោក ចាន់ ធី ចាងហ្វាងសារព័ត៌មាននគរមាស នៅកងរាជអាវុធហត្ថខេត្តកំពង់ឆ្នាំង។
ដើម្បីឲ្យមានមូលដ្ឋានថា អ.ប.ព. អាចបើកបាន ឬ មិនអាចបើកបាន ការស៊ើបអង្កេតទៅលើមន្ត្រី ដែលសារព័ត៌មាន នគរមាស បានចុះផ្សាយ អ.ប.ព. បានធ្វើការស្រាវជ្រាវប្រមូលព័ត៌មាន និងតម្រុយជាមុនសិន ហើយការស្រាវជ្រាវបានបង្ហាញថា៖
១. ពាក់ព័ន្ធ លោក ឧត្តមសេនីយ៍ឯក ប៊ុត សុភាព គឺមិនមានទាក់ទងអ្វីជាមួយឈ្មោះ អៀវ គុយម៉ុងក្រៅពីមានរូបថតមួយសន្លឹក ដែលបានថត ហើយមានជាប់រូបអ្នកទាំងពីរនេះ។
២. លោក ចាន់ ធីជាអតីតកងទ័ពរដ្ឋកម្ពុជានៅប៉ៃលិន (១៩៩៦-១៩៩៨) ហើយពីឆ្នាំ ១៩៩៨ មកបានប្រកបវិជ្ជាជីវៈជាអ្នកកាសែតឲ្យសារព័ត៌មានក្រុងកម្ពុជា ចលនាសង្គម ដើមអម្ពិល… រហូតដល់ឆ្នាំ ២០១៨ មកទល់បច្ចុប្បន្ននេះ លោក ចាន់ ធី ជាចាងហ្វាងកាសែត នគរមាស ស្លឹករឹត និងទូរទស្សន៍អនឡាញស្លឹករឹត។
៣. នៅពេលផ្តល់ចម្លើយរបស់ខ្លួននៅ អ.ប.ព. លោក ចាន់ ធី បានទទួលស្គាល់ថា ខ្លួនបានចុះផ្សាយអត្ថបទទាំងនេះមែន។ ព័ត៌មានដែលខ្លួនបានទទួល ក៏បានតែភាគីម្ខាង (ជៀម ហៃ) ដែលជាគូជម្លោះដីធ្លីនឹងឈ្មោះអៀវ គុយម៉ុង។ ឯរូបថត អៀវ គុយម៉ុង ថតជាមួយលោកឧត្តមសេនីយ៍ឯក ប៊ុត សុភាព ដែលឈ្មោះ ចាន់ ធីមិនដែលស្គាល់ គឺឈ្មោះ ចាន់ ធី បានយកចេញពី ហ្វេសប៊ុក របស់ អៀវ គុយម៉ុង។ ប្រការនេះ ចាន់ ធី សូមទទួលខុសដែលបានចុះផ្សាយដូចនេះ ហើយទទួលថា ការចុះផ្សាយបែបនេះ ពិតជាទង្វើមួយមិនត្រឹមត្រូវតាមក្រមសីលធម៌វិជ្ជាជីវៈអ្នកសារព័ត៌មាន នោះទេ។
៤. ចំពោះការចុះផ្សាយនូវអត្ថបទទី ២ បន្តទៀត ឈ្មោះ ចាន់ ធី បានឆ្លើយថា ដោយខ្លួនមានកំហឹងចំពោះលោក ឧត្តមសេនីយ៍ឯក ប៊ុត សុភាព ដែលហ៊ានប្តឹងគាត់ ពាក់ព័ន្ធនឹងការដាក់រូបថតគាត់ (ឧត្តមសេនីយ៍ឯក ប៊ុតសុភាព) ក្នុងអត្ថបទកាសែតរបស់ខ្លួន ទើបខ្លួន (ចាន់ ធី) ចុះផ្សាយនូអត្ថបទជាលើកទី ២ នេះទៀត។
៥ . ទោះបីលោក ចាន់ ធី ធ្លាប់មកទទួលយកចំណេះដឹង អំពីច្បាប់ប្រឆាំងអំពើពុករលួយ និងអ្នកសារព័ត៌មាន ក្នុងឱកាសសិក្ខាសាលានៅ អ.ប.ព. ក៏ដោយ តែយើងនៅសង្កេតឃើញថា ចាន់ ធី យល់មិនបានត្រឹមត្រូវ អំពីច្បាប់ដូចជាគិតថា អ្នកកាសែតធ្វើអ្វីខុសក៏ត្រូវ ឲ្យតែយកច្បាប់សារព័ត៌មានតែមួយគត់ មកដោះស្រាយជាមួយរូបគាត់។
អង្គភាពប្រឆាំងអំពើពុករលួយបានលើកឡើងទៀតថា “បើគេប្តឹងគាត់ លោក ចាន់ ធី មានកំហឹងភ្លាម។ ពេល អ.ប.ព. កោះហៅគាត់ លោក ចាន់ ធី ក៏មានកំហឹង។ ប្រការនេះ អ.ប.ព. ចង់បញ្ជាក់ជាថ្មីម្តងទៀតថា បើអ្នកសារព័ត៌មាន ធ្វើកំហុសពាក់ព័ន្ធវិជ្ជាជីវៈ គឺត្រូវប្រើច្បាប់ស្តីពីសារព័ត៌មាន។
បើអ្នកសារព័ត៌មានមានកំហុសពាក់ព័ន្ធចរាចរណ៍ ត្រូវទទួលខុសត្រូវមុខច្បាប់ចរាចរណ៍ ហើយបើអ្នកសារព័ត៌មាន
មានកំហុសពាក់ព័ន្ធក្រមព្រហ្មទណ្ឌដូចជា ជំរិត កំហែងហែកកេរ្តិ៍ ឬ មួលបង្កាច់ថា អ្នកណាជនពុករលួយនោះ ក៏ត្រូវ
ទទួលខុសត្រូវមុខក្រមព្រហ្មទណ្ឌ និងច្បាប់ ស្តីពីការប្រឆាំងអំពើពុករលួយ។ មាត្រា ៤១ ច្បាប់ប្រឆាំងអំពើពុករលួយ ផ្តន្ទាទោសដាក់ពន្ធនាគារពី ១ខែ ដល់ ៦ខែ និងពិន័យជាប្រាក់មួយសែនរៀល ដល់មួយលានរៀល ចំពោះការលើកអង្គហេតុបទល្មើសពុករលួយមិនពិត ហើយធ្វើឲ្យ អ.ប.ព. ធ្វើការស្រាវជ្រាវដោយឥតប្រយោជន៍។ មូលហេតុនេះហើយ ទើប អ.ប.ព. ធ្វើការកោះហៅ ចាន់ ធី មកស្តាប់ចម្លើយក្នុងន័យ ដើម្បីទប់កុំឲ្យរឿងនេះ វិវត្តន៍ទៅរកបទល្មើសព្រហ្មទណ្ឌ តែបែរជា ចាន់ ធី មានកំហឹងដោយមិនពិចារណាទៅវិញ”។
៦. លោក ចាន់ ធី បានធ្វើការសុំទោសលោក ឧត្តមសេនីយ៍ឯក ប៊ុត សុភាព ហើយសន្យាស្វែងរកប្រភពឲ្យបានគ្រប់គ្រាន់ មុននឹងធ្វើការចុះផ្សាយ និងសុំអភ័យទោស ចំពោះការចុះផ្សាយរបស់គាត់លើអត្ថបទ “ព័ត៌មានមន្ត្រីពុករលួយប៉ុន្មាននាក់ នៅពីក្រោយឈ្មួញដីឈ្មោះ អៀរ គុយម៉ុង” ដែលធ្វើឲ្យប៉ះពាល់លើកេរ្តិ៍ឈ្មោះ សេចក្តីថ្លៃថ្នូររបស់លោក ឧត្តមសេនីយ៍ឯក ប៊ុត សុភាព។
៧. អ.ប.ព, នឹងចេញលិខិតព្រមានលោក ចាន់ ធី ពីទង្វើដែលអាចឈានទៅ ដល់ការបំពានលើមាត្រា៤១ នៃច្បាប់ស្តីពីការប្រឆាំងអំពើពុករលួយ ដើម្បីបញ្ចប់ការស្រាវជ្រាវនេះ (អ.ប.ព. មិនបើកការស៊ើបអង្កេតករណីនេះ៕ ដោយ៖កូឡាប
