ក្រុមរដ្ឋអ៊ីស្លាម (IS) បានធ្វើការប្រកាសជាលើកដំបូងពីការស្លាប់របស់មេដឹកនាំខ្លួនឈ្មោះ Abu Bakr al-Baghdadi និងបានរើសមេដឹកនាំថ្មី។
ប្រព័ន្ធផ្សាយរបស់ក្រុម IS បានប្រកាសក្នុង Telegram ថា Abu Ibrahim al-Hashemi al-Qurashi គឺជាមេដឹកនាំថ្មីរបស់ក្រុមខ្លួន។
ការតែងតាំងមេដឹកនាំថ្មី កើតឡើងប្រមាណមួយសប្តាហ៍ប៉ុណ្ណោះ ក្រោយពេលមេដឹកនាំចាស់បានស្លាប់ នៅក្នុងការវាយឆ្មក់ដោយកងកម្លាំងរបស់អាមេរិច នៅក្នុងប្រទេសស៊ីរី។
មុនពេលបំផ្ទុះសម្លាប់ខ្លួនឯងជាមួយនឹងកូន ២នាក់ មេដឹកនាំនោះបានរត់ចូលក្នុងរូង ដោយសារតែទាល់ច្រក បន្ទាប់ពីមានការតាមប្រមាញ់ដោយឆ្កែយោធាអាមេរិច។
ប្រទេសអ៊ីរ៉ាក់ធ្លាប់បានប្រកាសផ្តល់ប្រាក់រង្វាន់ចំនួន ២៥លានដុល្លាសម្រាប់យកក្បាលមេដឹកនាំ IS នោះ ហើយនឹងត្រូវតាមប្រមាញ់ដោយអាមេរិច និងសម្ព័ន្ធមិត្ត ចាប់តាំងពីមានការងើបឡើងរបស់ក្រុម IS ៥ឆ្នាំកន្លងមកហើយ។
ក្រុម IS បានធ្វើការបញ្ជាក់ពីការស្លាប់របស់មេដឹកនាំរបស់ខ្លួន និងបានតែងតាំងមេដឹកនាំថ្មី។ មេដឹកនាំថ្មីដែលត្រូវជ្រើសតាំងប្រហែលជាជនជាតិអារ៉ាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC