ប្រទេសកូរ៉េខាងជើងបានធ្វើការបាញ់មីស៊ីលចំនួន ២គ្រាប់ចូលទៅក្នុងសមុទ្រខាងកើត ដែលស្គាល់ថាសមុទ្រជប៉ុន។ នេះបើតាមការបញ្ជាក់របស់យោធាកូរ៉េខាងត្បូង។
បើតាមក្រសួងការពារជាតិជប៉ុនបានឲ្យដឹងថា វត្ថុដែលកូរ៉េខាងជើងបាញ់នោះទំនងជាមីស៊ីផ្លោង។
ការបាញ់នោះត្រូវបានគេគិតថាបាញ់ចេញពីខេត្ត Pyongan ភាគខាងត្បូង។ ហើយតាមការបញ្ជាក់របស់ឆ្មាំសមុទ្រជប៉ុន មីស៊ីលរបស់កូរ៉េខាងជើងបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ជប៉ុន។
សូមបញ្ជាក់ថា ប្រសិននោះជាការបាញ់សាកល្បងមីស៊ីល វាជាការបាញ់លើកទី ១២ហើយ របស់របបក្រុងព្យុងយ៉ាងសម្រាប់ឆ្នាំនេះ។
កាលពីដើមខែនេះ ប្រទេសកូរ៉េខាងជើងបានធ្វើការបាញ់សាកល្បងប្រភេទមីស៊ីលថ្មី ដែលត្រូវគេគិតថា វាអាចធ្វើការបាញ់ចេញពីនាវាមុជទឹកបាន។
មីស៊ីលប្រភេទថ្មីនោះអាចមានសមត្ថភាពបំពាក់អាវុធនុយក្លេអ៊ែរបាន។ ការបាញ់មីស៊ីលចេញពីនាវាមុជទឹក វានឹងធ្វើឲ្យរ៉ាដាមានការពិបាកក្នុងការចាប់ និងធ្វើឲ្យវាចូលបានកាន់តែកៀកគោលដៅ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC